ವಿಜಯವಾಣಿ ಸುದ್ದಿಜಾಲ ಬೆಂಗಳೂರು
ಸೆನೆಗಲ್ನ ಡಕಾರ್ನಲ್ಲಿ ನಡೆಯುತ್ತಿರುವ ಯೂತ್ ಒಲಿಂಪಿಕ್ಸ್ನಲ್ಲಿ ಅವಳಿ ಕಂಚಿನ ಪದಕ ಗೆದ್ದು ಸೋಮವಾರ ತವರಿಗೆ ಮರಳಿದ ಕರ್ನಾಟಕದ ಈಜುತಾರೆ ಧಿನಿಧಿ ದೇಸಿಂಘುಗೆ ಬೆಂಗಳೂರಿನ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಕರ್ನಾಟಕ ಈಜು ಸಂಸ್ಥೆ (ಕೆಎಸ್ಎ) ವತಿಯಿಂದ ಭವ್ಯ ಸ್ವಾಗತ ನೀಡಲಾಯಿತು. ಬಳಿಕ ನಡೆದ ಸಮಾರಂಭದಲ್ಲಿ ಕೆಎಸ್ಎ ವತಿಯಿಂದ ಸನ್ಮಾನಿಸಿ ಗೌರವಿಸಲಾಯಿತು.
ಯೂತ್ ಒಲಿಂಪಿಕ್ಸ್ನಲ್ಲಿ ಬೆಂಗಳೂರಿನ 16 ವರ್ಷದ ಧಿನಿಧಿ ಮಹಿಳೆಯರ 100 ಮೀ. ಫ್ರೀಸ್ಟೈಲ್ ಮತ್ತು 200 ಮೀ. ಫ್ರೀಸ್ಟೈಲ್ ಸ್ಪರ್ಧೆಗಳಲ್ಲಿ ಕಂಚಿನ ಪದಕ ಜಯಿಸಿದ್ದರು. ಈ ಮೂಲಕ ಅವರು ಯೂತ್ ಒಲಿಂಪಿಕ್ಸ್ ಆವೃತ್ತಿಯೊಂದರಲ್ಲಿ ಅವಳಿ ಪದಕ ಜಯಿಸಿದ ಭಾರತದ ಮೊದಲ ಮಹಿಳೆ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದರು. ಧಿನಿಧಿ ಸಾಧನೆ ಕರ್ನಾಟಕದ ಈಜು ವಲಯದಲ್ಲೂ ಅಮೋ ಮೈಲಿಗಲ್ಲು ಆಗಿದ್ದು, ದೇಶದೆಲ್ಲೆಡೆಯ ಯುವ ಈಜುಪಟುಗಳಿಗೆ ಸ್ಫೂರ್ತಿದಾಯಕವೆನಿಸಿದೆ.
ವಿಮಾನ ನಿಲ್ದಾಣದಲ್ಲಿ ಧಿನಿಧಿ ಮತ್ತು ಅವರ ಕೋಚ್ ನಿಹಾರ್ ಅಮೀನ್ಗೆ ಡೊಳ್ಳು ಕುಣಿತದೊಂದಿಗೆ ಸಾಂಪ್ರದಾಯಿಕ ಸ್ವಾಗತವನ್ನು ನೀಡಲಾಯಿತು. ಗಂಧದ ಹಾರ, ಮೈಸೂರು ಪೇಟ, ಹೈಗುಚ್ಛ ಮತ್ತು ಸಿಹಿತಿಂಡಿಗಳನ್ನು ನೀಡಿ ಧಿನಿಧಿಗೆ ಅಭಿನಂದನೆ ಸಲ್ಲಿಸಲಾಯಿತು.
ಬಳಿಕ ಡಾಲ್ಫಿನ್ ಅಕಾಡೆಮಿಯಯ ಕ್ರೀಡಾ ಶ್ರೇಷ್ಠತಾ ಕೇಂದ್ರದಲ್ಲಿ ಕೆಎಸ್ಎ ಆಯೋಜಿಸಿದ್ದ ಸಮಾರಂಭದಲ್ಲಿ ಧಿನಿಧಿ ಮತ್ತು ಅವರ ಕೋಚ್ಗೆ ಸ್ಮರಣಿಕೆಗಳನ್ನು ನೀಡಿ ಸನ್ಮಾನಿಸಲಾಯಿತು.
ಈ ವೇಳೆ ಕೆಎಸ್ಎ ಅಧ್ಯಕ್ಷ ಗೋಪಾಲ್ ಬಿ. ಹೊಸೂರು, ಉಪಾಧ್ಯಕ್ಷ ಸುನೀಲ್ ಕುಮಾರ್, ಕಾರ್ಯದರ್ಶಿ ಸತೀಶ್ ಕುಮಾರ್, ಜಂಟಿ ಕಾರ್ಯದರ್ಶಿ ಸುಂದರೇಶ್, ಸ್ವಿಮ್ಮಿಂಗ್ ಡೆವಲಪ್ಮೆಂಟ್ ಅಧಿಕಾರಿ ರೋಹಿತ್ ಬಾಬು ಮತ್ತು ಧಿನಿಧಿ ಪೋಷಕರು ಹಾಜರಿದ್ದರು.