ಜೋಹರ್ (ಮಲೇಷ್ಯಾ): ಭಾರತದ ಕಿರಿಯರ ತಂಡ ಸುಲ್ತಾನ್ ಜೋಹರ್ ಕಪ್ 21 ವಯೋಮಿತಿ ಹಾಕಿ ಟೂರ್ನಿಯ ಮೊದಲ ಪಂದ್ಯದಲ್ಲಿ ಜಪಾನ್ ವಿರುದ್ಧ 4-2 ಗೋಲುಗಳಿಂದ ಗೆಲುವು ದಾಖಲಿಸಿದೆ. ಇದರೊಂದಿಗೆ ಮಾಜಿ ಗೋಲು ಕೀಪರ್ ಪಿಆರ್ ಶ್ರೀಜೇಶ್ ಕಿರಿಯರ ತಂಡದ ಮುಖ್ಯ ಕೋಚ್ ಆಗಿ ಗೆಲುವಿನ ಆರಂಭ ಕಂಡಿದ್ದಾರೆ.
ಶನಿವಾರ ನಡೆದ ಪಂದ್ಯದಲ್ಲಿ ಆಮಿರ್ ಅಲಿ (12ನೇ ನಿಮಿಷ) ಗುಜೋರ್ತ್ ಸಿಂಗ್ (36), ಆನಂದ್ ಸೌರಭ್ ಕುಶ್ವಾಹ (44) ಮತ್ತು ಅಂಕಿತ್ ಪಾಲ್ (47) ಭಾರತ ಪರ ಗೋಲು ದಾಖಲಿಸಿದರು. ಜಪಾನ್ ಪರ ಸುಬಸ ತನಕ (26) ಮತ್ತು ರಕುಸಿ ಯಮನಕ (57) ಗೋಲು ಗಳಿಸಿ ಸೋಲಿನ ಅಂತರ ತಗ್ಗಿಸಿದರು.
ಪಂದ್ಯದ ಆರಂಭದಿಂದಲೂ ಆಕ್ರಮಣಕಾರಿಯಾಗಿ ಆಡಿದ ಗೋಲು ಗಳಿಸುವ ಹಲವು ಅವಕಾಶಗಳನ್ನು ಸೃಷ್ಟಿಸಿಕೊಂಡಿತು. 12ನೇ ನಿಮಿಷದಲ್ಲಿ ಮುನ್ನಡೆ ಸಾಧಿಸಿದ ಭಾರತ ಮೊದಲಾರ್ಧದಲ್ಲಿ 1-1 ಸಮಬಲದಲ್ಲಿತ್ತು. ದ್ವೀತಿಯಾರ್ಧದ 6ನೇ ನಿಮಿಷದಲ್ಲಿ ಭಾರತ ಮತ್ತೆ ಮುನ್ನಡೆ ಸಾಧಿಸಿತು. ನಂತರ ಮತ್ತೆ 2 ಗೋಲು ಗಳಿಸಿ 4-1 ಮುನ್ನಡೆಗೇರಿತು. ಪಂದ್ಯ ಮುಕ್ತಾಯಕ್ಕೆ 3 ನಿಮಿಷ ಬಾಕಿ ಇರುವಾಗ ಜಪಾನ್ ಮತ್ತೊಂದು ಗೋಲು ಗಳಿಸಿ ಸೋಲಿನ ಅಂತರ ತಗ್ಗಿಸಿಕೊಂಡಿತು.
ಮಾಜಿ ಚಾಂಪಿಯನ್ ಭಾರತ ಮುಂದಿನ ಪಂದ್ಯದಲ್ಲಿ ಭಾನುವಾರ ಬ್ರಿಟನ್ ವಿರುದ್ಧ ಆಡಲಿದೆ.