ಬೆಂಗಳೂರು: ಯುಕೆಯ ಮ್ಯಾಂಚೆಸ್ಟರ್‌ನಲ್ಲಿ ಇತ್ತೀಚೆಗೆ ನಡೆದ 2026ರ 'ಅಮೆಚೂರ್ ವರ್ಲ್ಡ್ ಪವರ್‌ಲಿಫ್ಟಿಂಗ್ ಕಾಂಗ್ರೆಸ್' ವಿಶ್ವ ಚಾಂಪಿಯನ್‌ಷಿಪ್‌ನಲ್ಲಿ ಭರ್ಜರಿ ಯಶಸ್ಸು ಸಾಧಿಸಿ ಚಿನ್ನದ ಪದಕ ಗೆದ್ದುಕೊಂಡ 19 ವರ್ಷದ ಸೋಹರ್ಷ್ ಶಂಕರ್ ಅವರನ್ನು ಕರ್ನಾಟಕ ಸರ್ಕಾರದ ವಿಕಲಚೇತನರ ಸಬಲೀಕರಣ ಇಲಾಖೆಯ ಆಯುಕ್ತರಾದ ಮಹೇಶ್ ಬಾಬು ಸನ್ಮಾನಿಸಿದರು.
ಸೋಹರ್ಷ್ ಶಂಕರ್ ಅವರು ಬೆಂಗಳೂರಿನ 'ಫೈಸಿಸ್ ಬೈ ಟಾಲ್ಕ್' ಸಂಸ್ಥೆಯ ಹಳೆಯ ವಿದ್ಯಾರ್ಥಿಯಾಗಿದ್ದು, ಅವರ ಈ ಜಾಗತಿಕ ಸಾಧನೆಯನ್ನು ಗೌರವಿಸಲು 'ಫೈಸಿಸ್ ' ಸಂಸ್ಥೆಯು ಈ ಅಭಿನಂದನಾ ಕಾರ್ಯಕ್ರಮವನ್ನು ಆಯೋಜಿಸಿತ್ತು. ವಿಶೇಷ ಅಗತ್ಯವುಳ್ಳ ಮಕ್ಕಳ ಪ್ರತ್ಯೇಕ ಅಗತ್ಯಗಳು, ಸಾಮರ್ಥ್ಯಗಳು ಹಾಗೂ ಆಕಾಂಕ್ಷೆಗಳನ್ನು ಗುರುತಿಸಿ ಪ್ರೋತ್ಸಾಹಿಸುವ ವಾತಾವರಣವನ್ನು ನಿರ್ಮಿಸುವ ಮೂಲಕ 'ಸಮಗ್ರತೆ ಮತ್ತು ಸಮಾನತೆ' ಎಂಬ ಪರಿಕಲ್ಪನೆಗೆ ಹೊಸ ವ್ಯಾಖ್ಯಾನ ನೀಡುವ ಅಗತ್ಯವನ್ನು ಈ ಸಮಾರಂಭವು ಎತ್ತಿಹಿಡಿಯಿತು.
ಡೌನ್ ಸಿಂಡ್ರೋಮ್ ಹೊಂದಿರುವ ಅಥ್ಲೀಟ್ ಸೋಹರ್ಷ್, 75 ಕೆಜಿ ಜೂನಿಯರ್ ಸ್ಪೆಷಲ್ ಒಲಿಂಪಿಕ್ಸ್ ಕ್ಲಾಸಿಕ್ ರಾ ವಿಭಾಗದಲ್ಲಿ ಒಟ್ಟು 242.5 ಕೆಜಿ ತೂಕವನ್ನು ಎತ್ತುವ ಮೂಲಕ ಸಾಧನೆ ಮಾಡಿದರು. ಇದರಲ್ಲಿ 90 ಕೆಜಿ ಸ್ಕ್ವಾಟ್, 50 ಕೆಜಿ ಬೆಂಚ್ ಪ್ರೆಸ್ ಮತ್ತು 102.5 ಕೆಜಿ ಡೆಡ್‌ಲಿಫ್ಟ್ ಸೇರಿವೆ. ಕಳೆದ ಸೆಪ್ಟೆಂಬರ್‌ನಲ್ಲಿ ನಡೆದ ಈ ಕೂಟದಲ್ಲಿ 15 ದೇಶಗಳ ಸ್ಪರ್ಧಿಗಳು ಭಾಗವಹಿಸಿದ್ದರು. ಸೋಹರ್ಷ್ ಅವರ ಈ ಪ್ರಶಸ್ತಿಯು ಅವರ ವರ್ಷಗಳ ನಿರಂತರ ಶ್ರಮ, ಕಠಿಣ ತರಬೇತಿ ಹಾಗೂ ಅವರ ಪೋಷಕರು, ತರಬೇತುದಾರರು, ಪ್ರಾಯೋಜಕರು, ಶಾಲೆ ಮತ್ತು ಸಮಾಜ ನೀಡಿದ ಬೆಂಬಲದ ಫಲವಾಗಿದೆ.
ಕಾರ್ಯಕ್ರಮದಲ್ಲಿ ಮಾತನಾಡಿದ 'ಫೈಸಿಸ್ ಬೈ ಟಾಲ್ಕ್' ಸಂಸ್ಥೆಯ ಸಂಸ್ಥಾಪಕಿ ಲತಾ ಗಂಗಾಧರನ್, "ನಾವು 'ಸಮಗ್ರತೆ'ಯ ಅರ್ಥವನ್ನು ಮರುವ್ಯಾಖ್ಯಾನಿಸಬೇಕಾಗಿದೆ. ಮಗುವನ್ನು ಈಗಿರುವ ವಾತಾವರಣಕ್ಕೆ ಒಗ್ಗುವಂತೆ ಒತ್ತಾಯಿಸುವುದು ಮಾತ್ರ ಸಮಗ್ರತೆಯಲ್ಲ. ಪ್ರತಿಯೊಂದು ಮಗುವೂ ಶಿಕ್ಷಣ, ಕ್ರೀಡೆ, ಸ್ನೇಹ ಮತ್ತು ಸಾಮಾಜಿಕ ಅನುಭವಗಳನ್ನು ಒಳಗೊಂಡ ಪರಿಪೂರ್ಣ ಬಾಲ್ಯವನ್ನು ಪಡೆಯಲು ಅರ್ಹವಾಗಿದೆ. ಸೋಹರ್ಷ್ ಅವರ ಈ ಸಾಧನೆಯು ಸಂಭ್ರಮಿಸಲು ಸೂಕ್ತವಾದ ಸಂದರ್ಭವಾಗಿದ್ದು, ಪ್ರತಿಯೊಂದು ಮಗುವೂ ಸ್ವೀಕಾರಾರ್ಹತೆ ಮತ್ತು ತಮ್ಮದೇ ಆದ ಗುರಿಗಳನ್ನು ಅನುಸರಿಸುವ ಸ್ವಾತಂತ್ರ್ಯವನ್ನು ಹೊಂದಿರಬೇಕು ಎಂಬುದೇ ನಮ್ಮ ಮುಖ್ಯ ಸಂದೇಶ. ಪೋಷಕರು ಮತ್ತು ಸಮಾಜವು ಒಟ್ಟಾಗಿ ಕೆಲಸ ಮಾಡಿದಾಗ, ಮಕ್ಕಳು ತಮ್ಮ ಸಾಮರ್ಥ್ಯಗಳನ್ನು ಬೆಳೆಸಿಕೊಳ್ಳಲು ಮತ್ತು ಸಾರ್ಥಕ ಜೀವನ ನಡೆಸಲು ಸಾಧ್ಯವಾಗುತ್ತದೆ" ಎಂದು ಅಭಿಪ್ರಾಯಪಟ್ಟರು.
ಕೇವಲ ಶೈಕ್ಷಣಿಕ ಸಾಧನೆಗಷ್ಟೇ ಸೀಮಿತವಲ್ಲದ ಕಲಿಕೆ
ವಿಶೇಷ ಅಗತ್ಯವುಳ್ಳ ಮಕ್ಕಳು ತಮ್ಮ ಬಾಲ್ಯದ ಸಾರ್ಥಕತೆಗೆ ಬೇಕಾದ ಎಲ್ಲಾ ದೈನಂದಿನ ಅನುಭವಗಳು ಮತ್ತು ಅವಕಾಶಗಳನ್ನು ಪಡೆಯಬೇಕು ಎಂದು 'ಫೈಸಿಸ್' ಸಂಸ್ಥೆ ನಂಬುತ್ತದೆ. ಕೇವಲ ಶೈಕ್ಷಣಿಕ ವಿಷಯಗಳ ಮೇಲಷ್ಟೇ ಗಮನಹರಿಸದೆ, ಮಕ್ಕಳ ಸರ್ವಾಂಗೀಣ ಬೆಳವಣಿಗೆಗೆ ಪೂರಕವಾದ ಕ್ರೀಡೆ, ಸೃಜನಶೀಲ ಚಟುವಟಿಕೆಗಳು, ಸ್ನೇಹ ಸಂಬಂಧಗಳು, ಹಬ್ಬ-ಸಂಭ್ರಮಗಳು, ರಾತ್ರಿ ಉಳಿದುಕೊಳ್ಳುವ ಶೈಕ್ಷಣಿಕ ಪ್ರವಾಸಗಳುಮತ್ತು ಇತರ ಸಾಮಾಜಿಕ ಅನುಭವಗಳಲ್ಲಿ ಭಾಗವಹಿಸುವುದನ್ನು ಸಂಸ್ಥೆಯು ಪ್ರೋತ್ಸಾಹಿಸುತ್ತದೆ.
3 ರಿಂದ 20 ವರ್ಷದವರೆಗಿನ ಮಕ್ಕಳಿಗೆ ಸೂಕ್ತ ಬೆಂಬಲ ನೀಡುವ ಮೂಲಕ ಸಂಸ್ಥೆಯು ಅವರ ಶೈಕ್ಷಣಿಕ, ದೈಹಿಕ, ಮಾನಸಿಕ ಹಾಗೂ ಸಾಮಾಜಿಕ ಬೆಳವಣಿಗೆಗೆ ಶ್ರಮಿಸುತ್ತಿದೆ.
ಸಂಸ್ಥೆಯು 'ಟಾಲ್ಕ್'ನ ಪರಿವರ್ತನಾ ಶಿಕ್ಷಣ ಮಾದರಿಯನ್ನು ಅನುಸರಿಸುತ್ತಿದ್ದು, ಇದು ದೇಹ-ಮನಸ್ಸು-ಬುದ್ಧಿಮತ್ತೆಯ ಸಮಗ್ರ ಕಲಿಕೆಯ ವಿಧಾನವನ್ನು ಒಳಗೊಂಡಿದೆ. ಕ್ರೀಡೆ, ಜಿಮ್ನಾಸ್ಟಿಕ್ಸ್, ನೃತ್ಯ, ಮುಕ್ತ ಆಟ ಹಾಗೂ ಆಕ್ಯುಪೇಷನಲ್ ಥೆರಪಿ ಸೇರಿದಂತೆ ದೈಹಿಕ ಚಟುವಟಿಕೆಗಳು ಮಕ್ಕಳಲ್ಲಿ ದೈಹಿಕ ಜಾಗೃತಿ ಮತ್ತು ನಿಯಂತ್ರಣವನ್ನು ಬೆಳೆಸಲು ನೆರವಾಗುತ್ತವೆ. ಕಲೆ ಮತ್ತು ಮಡಿಕೆ ಮಾಡುವಿಕೆ ಯಂತಹ ಸೃಜನಶೀಲ ಚಟುವಟಿಕೆಗಳು ಹಾಗೂ ಭಾವನಾತ್ಮಕ ಕಲಿಕಾ ತರಗತಿಗಳು ಅವರ ಮಾನಸಿಕ ಆರೋಗ್ಯವನ್ನು ಬೆಂಬಲಿಸುತ್ತವೆ. ಇದರೊಂದಿಗೆ ರಾಷ್ಟ್ರೀಯ ಮುಕ್ತ ಶಾಲಾ ಸಂಸ್ಥೆ ಮೂಲಕ ಶಿಕ್ಷಣವನ್ನು ನೀಡಲಾಗುತ್ತಿದ್ದು, ವಿದ್ಯಾರ್ಥಿಗಳು 10ನೇ ಮತ್ತು 12ನೇ ತರಗತಿಯ ಪರೀಕ್ಷೆಗಳನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಲು ನೆರವಾಗುತ್ತಿದೆ.
ಬಾಲ್ಯದಲ್ಲಿ ಕಡಿಮೆ ಮಾಂಸಖಂಡಗಳ ದೃಢತೆ ಯೊಂದಿಗೆ ಜನಿಸಿದ ಸೋಹರ್ಷ್, ನಡಿಗೆ ಮತ್ತು ಮಾತು ಸೇರಿದಂತೆ ಪ್ರಮುಖ ದೈಹಿಕ ಹಾಗೂ ಮಾನಸಿಕ ಬೆಳವಣಿಗೆಯ ಹಂತಗಳಲ್ಲಿ ವಿಳಂಬವನ್ನು ಎದುರಿಸಿದ್ದರು. ವರ್ಷಗಳ ಕಾಲ ನೀಡಿದ ಆರಂಭಿಕ ಆರೈಕೆ ಫಿಸಿಯೋಥೆರಪಿ, ಆಕ್ಯುಪೇಷನಲ್ ಥೆರಪಿ ಮತ್ತು ಕುಟುಂಬದ ನಿರಂತರ ಬೆಂಬಲದಿಂದ ಅವರು ಈ ಸವಾಲುಗಳನ್ನು ಹಂತ ಹಂತವಾಗಿ ಮೆಟ್ಟಿ ನಿಂತರು.
ಕ್ರೀಡೆ ಮತ್ತು ದೈಹಿಕ ಚಟುವಟಿಕೆಗೆ ಆದ್ಯತೆ ನೀಡುವ ಕುಟುಂಬದ ಹಿನ್ನೆಲೆಯಿಂದ ಬಂದ ಸೋಹರ್ಷ್ ಅವರಿಗೆ ಕ್ರೀಡೆಯಲ್ಲಿ ತೀವ್ರ ಆಸಕ್ತಿ ಮೂಡಿತು. ಟೆನ್ನಿಸ್ ಕ್ರೀಡೆಯ ಮೇಲಿದ್ದ ಅವರ ಒಲವು ಕಾಲಕ್ರಮೇಣ ಪವರ್‌ಲಿಫ್ಟಿಂಗ್‌ನತ್ತ ಕರೆದೊಯ್ದು, ಕರ್ನಾಟಕ ಚಾಂಪಿಯನ್ ಹಂತದಿಂದ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಭಾರತಕ್ಕೆ ಚಿನ್ನದ ಪದಕ ಗೆದ್ದುಕೊಡುವ ಹಂತಕ್ಕೆ ಬೆಳೆಯುವಂತೆ ಮಾಡಿತು.
ಅವರ ಪೋಷಕರಾದ ಅನಿತಾ ಮತ್ತು ಉದಯ ಶಂಕರ್ ಅವರು ಶಿಕ್ಷಣದ ಜೊತೆಗೆ ಕ್ರೀಡೆ ಮತ್ತು ಇತರ ಆಸಕ್ತಿಗಳನ್ನು ಮುಂದುವರಿಸಲು ಸೋಹರ್ಷ್ ಅವರಿಗೆ ನಿರಂತರ ಪ್ರೋತ್ಸಾಹ ನೀಡಿದ್ದಾರೆ. 'ಫೈಸಿಸ್' ಸಂಸ್ಥೆಯಲ್ಲಿ ಸೋಹರ್ಷ್ ಅವರಿಗೆ ಮಗು-ಕೇಂದ್ರಿತ ಕಲಿಕಾ ವಾತಾವರಣ ದೊರೆಯಿತು. ಅಲ್ಲಿ ಅವರು ಕ್ರೀಡೆ, ಚಾರಣ ನೃತ್ಯ, ಧ್ಯಾನ, ಸಾಮಾಜಿಕ ಪ್ರವಾಸಗಳಲ್ಲಿ ಭಾಗವಹಿಸುತ್ತಾ ಉತ್ತಮ ಗೆಳೆಯರ ಬಳಗವನ್ನು ಪಡೆದುಕೊಂಡರು. ಇದರ ಜೊತೆಗೆ, ಈ ವರ್ಷದ ಆರಂಭದಲ್ಲಿ NIOS ಮೂಲಕ ತಮ್ಮ 12ನೇ ತರಗತಿಯ ಪರೀಕ್ಷೆಯನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದ್ದಾರೆ.
ಈ ಕುರಿತು ತಮ್ಮ ಅನುಭವ ಹಂಚಿಕೊಂಡ ಸೋಹರ್ಷ್ ಅವರ ತಾಯಿ ಅನಿತಾ ಶಂಕರ್, "ಕ್ರೀಡೆ ಮತ್ತು ಫಿಟ್‌ನೆಸ್ ಯಾವಾಗಲೂ ನಮ್ಮ ಕುಟುಂಬದ ಜೀವನಶೈಲಿಯ ಭಾಗವಾಗಿತ್ತು. ಹಾಗಾಗಿ ಸೋಹರ್ಷ್ ದೈಹಿಕವಾಗಿ ಸಕ್ರಿಯವಾಗಿರಲು ನಾವು ಸಹಜವಾಗಿಯೇ ಪ್ರೋತ್ಸಾಹಿಸಿದೆವು. ಟೆನ್ನಿಸ್‌ನಲ್ಲಿದ್ದ ಅವರ ಆಸಕ್ತಿ ನಂತರ ಪವರ್‌ಲಿಫ್ಟಿಂಗ್‌ಗೆ ಹೊರಳಿತು. ಬಾಲ್ಯದಲ್ಲಿ ಕಡಿಮೆ ಮಾಂಸಖಂಡಗಳ ದೃಢತೆ ಮತ್ತು ಬೆಳವಣಿಗೆಯ ವಿಳಂಬದ ಸವಾಲು ಎದುರಿಸುತ್ತಿದ್ದ ಮಗು, ಇಂದು ವಿಶ್ವ ಚಾಂಪಿಯನ್ ಷಿಪ್‌ನಲ್ಲಿ 242.5 ಕೆಜಿ ತೂಕ ಎತ್ತುವ ಹಂತಕ್ಕೆ ತಲುಪಲು ವರ್ಷಗಳ ಶ್ರಮ, ತರಬೇತಿ ಮತ್ತು ಬೆಂಬಲವೇ ಕಾರಣ. 'ಫೈಸಿಸ್' ಸಂಸ್ಥೆಯು ಅವರ ಬೆಳವಣಿಗೆಯ ವರ್ಷಗಳಲ್ಲಿ ಪ್ರಮುಖ ಪಾತ್ರ ವಹಿಸಿದೆ. ಅಲ್ಲಿ ಅವರಿಗೆ ಕಲಿಯಲು, ಕ್ರೀಡೆಯಲ್ಲಿ ಭಾಗವಹಿಸಲು, ಸ್ನೇಹ ಬೆಳೆಸಲು ಮತ್ತು ಪ್ರತಿಯೊಂದು ಮಗುವೂ ಪಡೆಯಬೇಕಾದ ಅನುಭವಗಳನ್ನು ಆನಂದಿಸಲು ಸೂಕ್ತವಾದ ವಾತಾವರಣ ದೊರೆಯಿತು.
NIOS ಮೂಲಕ 12ನೇ ತರಗತಿ ಪೂರ್ಣಗೊಳಿಸಿದ್ದು ಅವರ ಜೀವನದ ಮತ್ತೊಂದು ಪ್ರಮುಖ ಮೈಲಿಗಲ್ಲು. ನಾವು ಕೇವಲ ಪದಕಗಳನ್ನು ಗೆಲ್ಲುವ ಉದ್ದೇಶವನ್ನಷ್ಟೇ ಇಟ್ಟುಕೊಂಡಿರಲಿಲ್ಲ; ಸೋಹರ್ಷ್ ಸಂತೋಷದಾಯಕ, ಸಕ್ರಿಯ ಮತ್ತು ಸಾರ್ಥಕ ಜೀವನ ನಡೆಸಬೇಕು ಎಂಬುದೇ ನಮ್ಮ ಮುಖ್ಯ ಗುರಿಯಾಗಿತ್ತು. ಅವರ ಈ ಚಿನ್ನದ ಪದಕ ನಮ್ಮ ಕುಟುಂಬಕ್ಕೆ ಅತ್ಯಂತ ಹೆಮ್ಮೆಯ ಕ್ಷಣ. ಅವರ ಈ ಪ್ರಯಾಣವು ಇತರ ಪೋಷಕರಿಗೂ ತಮ್ಮ ಮಕ್ಕಳಿಗಾಗಿ ಹೊಸ ಸಾಧ್ಯತೆಗಳನ್ನು ಅನ್ವೇಷಿಸಲು ಪ್ರೇರಣೆಯಾಗಲಿದೆ ಎಂದು ಆಶಿಸುತ್ತೇವೆ" ಎಂದರು.
ಶಾಲೆಯ ಶಿಕ್ಷಣ ಮುಗಿದ ನಂತರವೂ ವಿಶೇಷ ಅಗತ್ಯವುಳ್ಳ ಯುವಜನತೆಗೆ ಹೆಚ್ಚಿನ ಅವಕಾಶಗಳನ್ನು ಸೃಷ್ಟಿಸಬೇಕಾದ ಅಗತ್ಯವನ್ನು ಅನಿತಾ ಅವರು ಒತ್ತುಕೊಟ್ಟು ಹೇಳಿದರು. ಸೋಹರ್ಷ್ ಪ್ರಸ್ತುತ ಟೆನ್ನಿಸ್ ಮತ್ತು ಪವರ್‌ಲಿಫ್ಟಿಂಗ್ ಅನ್ನು ಮುಂದುವರಿಸುತ್ತಿದ್ದು, ಸ್ವಾವಲಂಬನೆ ಹಾಗೂ ವಯಸ್ಕರ ಜೀವನಕ್ಕೆ ಸಿದ್ಧರಾಗಲು ಉನ್ನತ ಶಿಕ್ಷಣ ಮತ್ತು ವೃತ್ತಿಪರ ತರಬೇತಿಯ ಅವಕಾಶಗಳನ್ನು ಕುಟುಂಬವು ಅನ್ವೇಷಿಸುತ್ತಿದೆ.
ಸಮಾಜಕ್ಕೆ ಮಾದರಿಯಾದ ಯಶಸ್ಸು
ಈ ಅಭಿನಂದನಾ ಸಮಾರಂಭದ ಮೂಲಕ, ವಿಶೇಷ ಅಗತ್ಯವಿರುವ ಮಕ್ಕಳಿಗಾಗಿ ಅರ್ಥಪೂರ್ಣ ಅವಕಾಶಗಳನ್ನು ಸೃಷ್ಟಿಸುವಲ್ಲಿ ಕುಟುಂಬಗಳು ಮತ್ತು ಸಮಾಜದ ಜವಾಬ್ದಾರಿಯ ಕುರಿತು ಹೆಚ್ಚಿನ ಜಾಗೃತಿ ಮೂಡಿಸಲು 'ಫೈಸಿಸ್' ಶ್ರಮಿಸುತ್ತಿದೆ. ಸೋಹರ್ಷ್ ಅವರ ಯಶಸ್ಸು ಅವರ ಈ ಪಯಣದಲ್ಲಿದ್ದ ಪ್ರತಿಯೊಬ್ಬರಿಗೂ ಹೆಮ್ಮೆಯ ಕ್ಷಣವಾಗಿದ್ದು, "ಸಮಗ್ರತೆ ಎಂಬುದು ಕೇವಲ ಅಸಾಧಾರಣ ಸಾಧನೆಗಳಿಗೆ ಮಾತ್ರ ಸೀಮಿತವಾಗಿರದೆ, ಪ್ರತಿಯೊಂದು ಮಗುವೂ ಗೌರವ, ಸ್ವೀಕಾರಾರ್ಹತೆ, ಒಡನಾಟ ಮತ್ತು ಸಾರ್ಥಕ ಜೀವನ ನಡೆಸುವ ಅವಕಾಶ ಪಡೆಯಲು ಅರ್ಹವಾಗಿದೆ" ಎಂಬ ದೊಡ್ಡ ಸಂದೇಶವನ್ನು ಸಮಾಜಕ್ಕೆ ಸಾರುತ್ತಿದೆ.