ಪಾಕಿಸ್ತಾನದಲ್ಲೂ ಫಿಫಾ ವಿಶ್ವಕಪ್ ಆಯೋಜನೆ ಸಾಧ್ಯ ಎಂದ ಸಂಸದ ನಬೀಲ್ ಗಬೋಲ್
- ಪಾಕಿಸ್ತಾನದಲ್ಲೂ ಫಿಫಾ ವಿಶ್ವಕಪ್ ಆಯೋಜನೆ ಸಾಧ್ಯ ಎಂದ ಸಂಸದ ನಬೀಲ್ ಗಬೋಲ್
- ನಮ್ಮ ಲಿಯಾರಿಯಲ್ಲಿ ಮೈದಾನವಿದೆ ಎಂದ ಪಾಕ್ ಸಂಸದ
- ಸೋಷಿಯಲ್ ಮೀಡಿಯಾನಲ್ಲಿ ಸಂಸದನ ಹೇಳಿಕೆ ವೈರಲ್
ಇಸ್ಲಾಮಾಬಾದ್: ಸದ್ಯ ಪ್ರಪಂಚದಲ್ಲಿ ಎಲ್ಲಿ ನೋಡಿದರೂ ಫಿಫಾ ಫುಟ್ಬಾಲ್ನದ್ದೇ ಸದ್ದು ಕೇಳಿ ಬರುತ್ತಿದೆ. ಈ ಭಾರಿಯ ಫಿಫಾ ವಿಶ್ವಕಪ್ನ್ನು ಅಮೆರಿಕ, ಕೆನಡಾ ಹಾಗೂ ಮೆಕ್ಸಿಕೋ ಮೂವರು ಸೇರಿಕೊಂಡು ಆಯೋಜನೆ ಮಾಡುತ್ತಿದ್ದಾರೆ. ಫಿಫಾ ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ ಮೂರು ದೇಶಗಳು ಸೇರಿಕೊಂಡು ಫಿಫಾ ವಿಶ್ವಕಪ್ನ್ನು ಆಯೋಜನೆ ಮಾಡಿತ್ತಿವೆ.
ಇದೇ ಸಂದರ್ಭದಲ್ಲಿ ಪಾಕಿಸ್ತಾನದ ಸಂಸದರೊಬ್ಬರು ನಮ್ಮ ದೇಶದಲ್ಲಿ ಕೂಡ ಮೈದಾನವಿದೆ, ನಾವೇಕೆ ಫಿಫಾ ವಿಶ್ವಕಪ್(Nabil Gabol on FIFA)ನ್ನು ಆಯೋಜನೆ ಮಾಡಬಾರದೆಂದು ಸಂಸತ್ತಿನಲ್ಲಿ ಹೇಳಿರುವ ವಿಡಿಯೋ ಸೋಷಿಯಲ್ ಮೀಡಿಯಾನಲ್ಲಿ ಸಖತ್ ವೈರಲ್ ಆಗುತ್ತಿದೆ.
ಲಿಯಾರಿನಲ್ಲಿ ಆಯೋಜನೆ ಮಾಡೋಣ!
ಬಾಲಿವುಡ್ನ ಖ್ಯಾತ ಸಿನಿಮಾ ಧುರಂಧರ್ನಲ್ಲಿ ಜಮೀಲ್ ಜಮಾಲಿ ಪಾತ್ರದ ಪ್ರೇರಣೆ ಎಂದು ಹೇಳಲಾಗುವ ಲಿಯಾರಿ ಎಂಪಿ ನಬೀಲ್ ಗಬೋಲ್, ಪಾಕ್ ಸಂಸತ್ತಿನಲ್ಲಿ ನಮ್ಮ ಲಿಯಾರಿನಲ್ಲಿ ಅದ್ಭುತವಾದ ಕ್ರೀಡಾಂಗಣವಿದೆ. ನಾವು ಕೂಡ ಫಿಫಾ ವಿಶ್ವಕಪ್ನ್ನು ಆಯೋಜನೆ ಮಾಡಬಹುದು ಎಂದು ಹೇಳಿದ್ದಾರೆ.
ಪಾಕಿಸ್ತಾನ ಮತ್ತು ಫುಟ್ಬಾಲ್ ಸಂಬಂಧ ಬಹಳ ಪುರಾತನವಾಗಿದ್ದು, ನಮ್ಮಲ್ಲಿ ಸಹ ಉತ್ತಮ ಆಟಗಾರರಿದ್ದಾರೆ, ನಮ್ಮಲ್ಲಿ ಸಹ ಉತ್ತಮವಾದ ಮೈದಾನಗಳಿವೆ. ನಾವು ಫಿಫಾವನ್ನು ಆಯೋಜನೆ ಮಾಡಿದರೆ ಜಾಗತಿಕ ಮೌಲ್ಯ ವೃದ್ಧಿಯಾಗುತ್ತೆ ಎಂದು ಹೇಳಿದ್ದಾರೆ.
ಫಿಫಾದಲ್ಲಿ ಪಾಕಿಸ್ತಾನದ ಫುಟ್ಬಾಲ್ಗಳು!
ಫಿಫಾ ವಿಶ್ವಕಪ್ 2026 ರಲ್ಲಿ ಬಳಕೆಯಾಗುತ್ತಿರುವ ಅಧಿಕೃತ ಚೆಂಡನ್ನು ಟ್ರಿಯೋಂಡಾ ಎಂದು ಕರೆಯಲಾಗುತ್ತಿದೆ. ಟ್ರಿಯೋಂಡಾ ಎಂದರೆ ಈ ಭಾರಿ ಫಿಫಾ ವಿಶ್ವಕಪ್ನ್ನು ಆಯೋಜಿಸುತ್ತಿರುವ ದೇಶ( ಅಮೆರಿಕ, ಮೆಕ್ಸಿಕೋ ಮತ್ತು ಕೆನಡಾ)ಗಳ ಸಂಗಮ ಎಂಬರ್ಥದಲ್ಲಿ ವಿನ್ಯಾಸ ಮಾಡಲಾಗಿದೆ.
ಈ ಟ್ರಿಯೋಂಡಾ ಚೆಂಡನ್ನು ಪಾಕಿಸ್ತಾನದ ಸಿಲಾಕೋಟ್ನಲ್ಲಿ ತಯಾರು ಮಾಡಲಾಗುತ್ತಿದೆ ಮತ್ತು ಪಾಕಿಸ್ತಾನದಲ್ಲಿ ತಯಾರಾಗುವ ಚೆಂಡಗಳನ್ನು 1982 ರಿಂದ ನಡೆಯುವ ಎಲ್ಲಾ ಫಿಫಾ ವಿಶ್ವಕಪ್ಗಳಲ್ಲಿ ಬಳಕೆ ಮಾಡಲಾಗುತ್ತಿದೆ ಎಂದು ತಿಳಿದು ಬಂದಿದೆ. ಪಾಕಿಸ್ತಾನದಲ್ಲಿರುವ ಸಿಲಾಕೋಟ್, ಜಾಗತಿಕ ಫುಟ್ಬಾಲ್ ತಯಾರಿಕೆಯಲ್ಲಿ ಭಾರಿ ಖ್ಯಾತಿಯನ್ನು ಗಳಸಿದೆ. ಇಲ್ಲಿ ತಯಾರಾಗುವ ಹೆಚ್ಚಿನ ಚೆಂಡುಗಳನ್ನು ವಿದೇಶಗಳಲ್ಲಿ ನಡೆಯುವ ಫುಟ್ಬಾಲ್ ಟೂರ್ನಿಗಳಲ್ಲಿ ಬಳಸಲಾಗುತ್ತದೆ.
ಸ್ವಾತಂತ್ರಪೂರ್ವ ಕಾಲದಿಂದ ಸಿಲಾಕೋಟ್ನಲ್ಲಿ ಫುಟ್ಬಾಲ್ ತಯಾರಿಕೆ ನಡೆಯುತ್ತಿದ್ದು, ಇಲ್ಲಿ ಹೆಚ್ಚಾಗಿ ಚೆಂಡುಗಳನ್ನು ಕೈಯಿಂದ ತಯಾರಿಸುವ ಕಾರಣ ಜಾಗತಿಕ ಮಾರುಕಟ್ಟೆಯಲ್ಲಿ ಭಾರಿ ಬೇಡಿಕೆ ಪಡೆದಿದೆ ಎಂದು ಹೇಳಲಾಗುತ್ತದೆ. ಹೀಗೆ ಫಿಫಾ ವಿಶ್ವಕಪ್ನಲ್ಲಿ ಪಾಕಿಸ್ತಾನ ತಂಡ ಭಾಗವಹಿಸದಿದ್ದರೂ ಸಹ ಅಲ್ಲಿ ತಯಾರಾದ ಚೆಂಡು ಮೈದಾನಲ್ಲಿ ಮೋಡಿ ಮಾಡುತ್ತಿದೆ ಎಂದರೆ ತಪ್ಪಾಗದು, (ಏಜನ್ಸೀಸ್).