ಕ್ರೀಡಾ ಸಚಿವಾಲಯದಿಂದ ಎನ್​ಎಸ್​ಬಿ, ಎನ್​ಎಸ್​ಟಿ ನಿಯಮಗಳ ಅಧಿಸೂಚನೆ

ಕಳೆದ ವರ್ಷ ಸಂಸತ್ತಿನಲ್ಲಿ ಅಂಗೀಕರಿಸಲಾಗಿರುವ ರಾಷ್ಟ್ರೀಯ ಕ್ರೀಡಾ ಆಡಳಿತ ಕಾಯ್ದೆಯಡಿಯಲ್ಲಿ ಇವೆರಡು ಸಂಸ್ಥೆಗಳು ರಚನೆಯಾಗಲಿದ್ದು, ಎರಡರ ಪಾತ್ರಗಳನ್ನು ತಿಳಿಸುವ ಪ್ರತ್ಯೇಕ ಅಧಿಸೂಚನೆ ಹೊರಡಿಸಲಾಗಿದೆ. ಕ್ಯಾಬಿನೆಟ್​ ಕಾರ್ಯದರ್ಶಿ ಮೇಲ್ವಿಚಾರಣೆಯಲ್ಲಿ ಸರ್ಚ್​ ಮತ್ತು ಆಯ್ಕೆ ಸಮಿತಿಯನ್ನು ರಚಿಸುವ ಪ್ರಕ್ರಿಯೆಯೂ ನಡೆಯುತ್ತಿದೆ ಎಂದು ಸಚಿವಾಲಯ ತಿಳಿಸಿದೆ.

ಕ್ರೀಡೆಗಳಿಗೆ ಸಂಬಂಧಿಸಿದ ವಿವಾದಗಳನ್ನು ಇತ್ಯರ್ಥಪಡಿಸಲು ಮೀಸಲಾದ ಪ್ರತ್ಯೇಕ ನ್ಯಾಯಾಲಯವೇ ರಾಷ್ಟ್ರೀಯ ಕ್ರೀಡಾ ನ್ಯಾಯಮಂಡಳಿ (ಎನ್​ಎಸ್​ಟಿ). ಇದರ ತೀರ್ಪನ್ನು ಸುಪ್ರೀಂ ಕೋರ್ಟ್​ನಲ್ಲಿ ಮಾತ್ರ ಪ್ರಶ್ನಿಸಲು ಅವಕಾಶವಿರಲಿದೆ. ಇದರ ಸಂಖ್ಯಾಬಲವನ್ನು ಸರ್ಕಾರ ರ್ನಿದಿಷ್ಟಪಡಿಸಿಲ್ಲ. ಆದರೆ ಕ್ರೀಡಾ ವಿವಾದ, ಸೂಚನೆ, ಪ್ರತಿಕ್ರಿಯೆ, ದಾಖಲೆ ಮತ್ತು ಸ್ಪಷ್ಟೀಕರಣಗಳ ಸಲ್ಲಿಕೆಗೆ ಮೀಸಲಾದ ಪೋರ್ಟಲ್​ ರಚನೆಗೆ ಅಧಿಸೂಚನೆ ಹೊರಡಿಸಲಾಗಿದೆ. ನ್ಯಾಯಮಂಡಳಿಯ ಸಂವಹನ, ಆದೇಶಗಳ ಪ್ರಕಟಣೆ, ವರ್ಚುವಲ್​ ವಿಚಾರಣೆ ಮತ್ತು ಪ್ರಕ್ರಿಯೆ-ಆದೇಶಗಳಿಗೆ ಸಂಬಂಧಿಸಿದ ದಾಖಲೆಗಳ ನಿರ್ವಹಣೆಯೂ ಈ ಪೋರ್ಟಲ್​ ಮೂಲಕ ಆಗಲಿದೆ. ಕ್ರೀಡಾಪಟುಗಳು ಸಿವಿಲ್​ ನ್ಯಾಯಾಲಯಗಳನ್ನು ಅವಲಂಬಿಸುವುದನ್ನು ಎನ್​ಎಸ್​ಬಿ ಕಡಿಮೆ ಮಾಡಲಿದೆ. ಜತೆಗೆ ಕ್ರೀಡಾ ಆಡಳಿತ ಮತ್ತು ಅದಕ್ಕೆ ಸಂಬಂಧಿಸಿದ ವಿವಾದಗಳ ಸ್ವತಂತ್ರ, ತ್ವರಿತ, ಪರಿಣಾಮಕಾರಿ ಮತ್ತು ಕಡಿಮೆ ವೆಚ್ಚದ ವಿಲೇವಾರಿಯನ್ನೂ ಎನ್​ಎಸ್​ಬಿ ಖಚಿತಪಡಿಸಲಿದೆ. ಎನ್​ಎಸ್​ಬಿಯ ಅಧ್ಯಕ್ಷರು ಅಥವಾ ಸದಸ್ಯರು ಸುಪ್ರೀಂ ಕೋರ್ಟ್​ ಅಥವಾ ಹೈಕೋರ್ಟ್​ ನ್ಯಾಯಾಧೀಶರಾಗಿದ್ದರೆ, ಅವರು ಕ್ರೀಡಾ ನ್ಯಾಯಮಂಡಳಿ ಸೇರುವ ಮೊದಲು ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಬೇಕು ಅಥವಾ ಸ್ವಯಂಪ್ರೇರಿತ ನಿವೃತ್ತಿ ಪಡೆಯಬೇಕು ಎಂದು ಕ್ರೀಡಾ ಸಚಿವಾಲಯ ತಿಳಿಸಿದೆ.

ರಾಷ್ಟ್ರೀಯ ಕ್ರೀಡಾ ಮಂಡಳಿಯು (ಎನ್​ಎಸ್​ಬಿ) ರಾಷ್ಟ್ರೀಯ ಕ್ರೀಡಾ ಒಕ್ಕೂಟಗಳಿಗೆ (ಎನ್​ಎಸ್​ಎಫ್​​) ಮಾನ್ಯತೆ ನೀಡುವ, ಆಡಳಿತ, ಹಣಕಾಸು ಮತ್ತು ನೈತಿಕ ಮಾನದಂಡಗಳ ಪಾಲನೆಯನ್ನು ಖಚಿತಪಡಿಸಿಕೊಳ್ಳುವ ಕೇಂದ್ರ ಪ್ರಾಧಿಕಾರವಾಗಿ ಕಾರ್ಯನಿರ್ವಹಿಸಲಿದೆ. ಇದು ಓರ್ವ ಅಧ್ಯಕ್ಷ ಮತ್ತು ಇಬ್ಬರು ಸದಸ್ಯರನ್ನು ಹೊಂದಿರುತ್ತದೆ. ಇವರ ಅಧಿಕಾರಾವಧಿ 3 ವರ್ಷ. ರಾಷ್ಟ್ರೀಯ ಕ್ರೀಡಾ ಚುನಾವಣಾ ಸಮಿತಿಯ ಪಟ್ಟಿಯನ್ನು ಮತ್ತು ಎನ್​ಎಸ್​ಎಫ್​ಗಳ ಅಂಗಸಂಸ್ಥೆಗಳ ನೋಂದಣಿಯ ಕೆಲಸವನ್ನೂ ಎನ್​ಎಸ್​ಬಿ ನಿರ್ವಹಿಸಲಿದೆ. ಕ್ರೀಡಾ ಆಡಳಿತದ ಕುರಿತು ಮಾದರಿ ಮಾರ್ಗಸೂಚಿ ಅಥವಾ ನಿಯಮಗಳನ್ನು ರ್ನಿದಿಷ್ಟಪಡಿಸಲು ಕೂಡ ಎನ್​ಎಸ್​ಬಿಗೆ ಅಧಿಕಾರ ನೀಡಲಾಗಿದೆ. ಸದಸ್ಯರಿಗೆ 65 ವರ್ಷ ವಯಸ್ಸಿನ ಮಿತಿಯನ್ನೂ ನಿಗದಿಪಡಿಸಲಾಗಿದೆ.