FIFA WorldCup: ಲಿಯೋನೆಲ್ ಮೆಸ್ಸಿಗೆ ಲೈಫ್ ನೀಡಿದ ದೇಶವೇ ಫೈನಲ್ ಎದುರಾಳಿ!
ನ್ಯೂಜೆರ್ಸಿ: ಲಿಯೋನೆಲ್ ಮೆಸ್ಸಿಗೆ ಜನ್ಮ ನೀಡಿದ್ದು ಅರ್ಜೆಂಟೀನಾವಾದರೂ, ವರ್ಣರಂಜಿತ ಫುಟ್ಬಾಲ್ ಜೀವನ ನೀಡಿದ್ದು ಸ್ಪೇನ್ನ ಬಾರ್ಸಿಲೋನಾ. 12ನೇ ವಯಸ್ಸಿನಲ್ಲಿ ಹಾಮೋರ್ನ್ ಕೊರತೆಯಿಂದ ದುರ್ಬಲವಾಗಿದ್ದ ಮೆಸ್ಸಿ 13ನೇ ವಯಸ್ಸಿನಲ್ಲಿ ಬಾರ್ಸಿಲೋನಾ ಅಕಾಡೆಮಿಗೆ ಸೇರಿದ ಬಳಿಕ ಬದುಕು ಬದಲಾಗಿತ್ತು. ಬಳಿಕ 21 ವರ್ಷಗಳ ಕಾಲ ಅವರು ಸ್ಪೇನ್ ನಗರದ ಕ್ಲಬ್ ಪರ ಆಡಿ ಫುಟ್ಬಾಲ್ ಮಾಂತ್ರಿಕರಾಗಿ ಬೆಳೆದಿದ್ದರು.
ಕ್ಸಾವಿ ಹರ್ನಾಂಡೆಜ್, ಆಂಡ್ರೆಸ್ ಇನೀಸ್ಟ, ಸೆರ್ಗಿಯೊ ಬಸ್ಕೆಟ್ಸ್ರಂಥ ಸ್ಪೇನ್ ದಿಗ್ಗಜರೊಂದಿಗೆ ಆಡಿ ಪಳಗಿದ್ದರು. ಬಾರ್ಸಿಲೋನಾ ಪರ ಆಡಿದ 17 ವರ್ಷಗಳಲ್ಲಿ 10 ಲಾ ಲೀಗಾ, 4 ಚಾಂಪಿಯನ್ಸ್ ಲೀಗ್, 7 ಕೋಪಾ ಡೆಲ್ ರೇ ಪ್ರಶಸ್ತಿ ಜಯಿಸಿದ್ದರು ಮತ್ತು 672 ಗೋಲು ಸಿಡಿಸಿದ್ದರು. ಆದರೆ ರಾಷ್ಟ್ರೀಯ ತಂಡದ ವಿಚಾರಕ್ಕೆ ಬಂದಾಗ, ಜನ್ಮನಿಡಿದ ಅರ್ಜೆಂಟೀನಾವನ್ನೇ ಆರಿಸಿಕೊಂಡಿದ್ದ ಮೆಸ್ಸಿ, ಈಗ 2ನೇ ಬಾರಿ ವಿಶ್ವಕಪ್ (FIFA WorldCup) ಗೆಲ್ಲಬೇಕಾದರೆ ಜೀವನದ ನೀಡಿದ ದೇಶದ ತಂಡವನ್ನೇ ಮಣಿಸಬೇಕಾದ ಭಾವನಾತ್ಮಕ ಸವಾಲು ಹೊಂದಿದ್ದಾರೆ. ರಾಜತಾಂತ್ರಿಕವಾಗಿ ಅರ್ಜೆಂಟೀನಾ-ಸ್ಪೇನ್ ಉತ್ತಮ ಸಂಬಂಧ ಹೊಂದಿದ್ದು, ಫುಟ್ಬಾಲ್ನಲ್ಲೂ ವೈರತ್ವವಿಲ್ಲದೆ, ಸೌಹಾರ್ದ ಸಂಬಂಧವಿದೆ.
ವಿಶ್ವಕಪ್ನಲ್ಲಿ ಏಕೈಕ ಮುಖಾಮುಖಿ
ಅರ್ಜೆಂಟೀನಾ-ಸ್ಪೇನ್ ತಂಡಗಳು ಫಿಫಾ ವಿಶ್ವಕಪ್ನಲ್ಲಿ ಈ ಹಿಂದೆ ಏಕೈಕ ಬಾರಿ ಮುಖಾಮುಖಿ ಆಗಿವೆ. 1966ರಲ್ಲಿ ಒಂದೇ ಗುಂಪಿನಲ್ಲಿದ್ದಾಗ ಅರ್ಜೆಂಟೀನಾ 2-1ರಿಂದ ಸ್ಪೇನ್ಗೆ ಸೋಲುಣಿಸಿತ್ತು. ಅಂತಾರಾಷ್ಟ್ರೀಯ ಫುಟ್ಬಾಲ್ನಲ್ಲಿ 14 ಬಾರಿ ಮುಖಾಮುಖಿ ಆಗಿರುವ ಉಭಯ ತಂಡಗಳು ತಲಾ 6ರಲ್ಲಿ ಗೆದ್ದಿದ್ದು, 2 ಪಂದ್ಯ ಡ್ರಾಗೊಂಡಿವೆ. 2018ರಲ್ಲಿ ಕೊನೇ ಬಾರಿ ಮುಖಾಮುಖಿ ಆದಾಗ ಸ್ಪೇನ್ 6-1ರಿಂದ ಗೆದ್ದಿತ್ತು. ಆದರೆ ಈ ಪಂದ್ಯದಲ್ಲಿ ಮೆಸ್ಸಿ ಆಡಿರಲಿಲ್ಲ.