FIFA WorldCup: ಸತತ 2ನೇ ಜಯದೊಂದಿಗೆ ನಾಕೌಟ್ಗೇರಿದ ಆತಿಥೇಯ ಅಮೆರಿಕ
ಸಿಯಾಟಲ್: ಮೆಕ್ಸಿಕೋದ ನಂತರ ಮತ್ತೊಂದು ಸಹ-ಆತಿಥೇಯ ದೇಶವಾಗಿರುವ ಅಮೆರಿಕ ಕೂಡ ಫಿಫಾ ವಿಶ್ವಕಪ್ (FIFA WorldCup) 23ನೇ ಆವೃತ್ತಿಯಲ್ಲಿ ಸತತ 2ನೇ ಜಯದೊಂದಿಗೆ ನಾಕೌಟ್ ಪ್ರವೇಶ ಖಾತ್ರಿಪಡಿಸಿಕೊಂಡಿದೆ. ಸ್ಟಾರ್ ಆಟಗಾರ ಕ್ರಿಶ್ಚಿಯನ್ ಪುಲಿಸಿಕ್ ಗೈರಿನ ನಡುವೆಯೂ ಅಮೆರಿಕ ತಂಡ ಆಸ್ಟ್ರೆಲಿಯಾ ವಿರುದ್ಧದ ತನ್ನ 2ನೇ ಪಂದ್ಯದಲ್ಲಿ 2-0 ಅಂತರದಿಂದ ಜಯ ದಾಖಲಿಸಿತು. ಸ್ಟಾರ್ಸ್ ಆಂಡ್ ಸ್ಟ್ರಿಪ್ಸ್ ಖ್ಯಾತಿಯ ಅಮೆರಿಕ 1930ರ ಬಳಿಕ ವಿಶ್ವಕಪ್ನಲ್ಲಿ ಮೊದಲ ಬಾರಿ ಸತತ 2 ಪಂದ್ಯ ಗೆದ್ದ ಸಾಧನೆ ಮಾಡಿದೆ.
ಭಾರತೀಯ ಕಾಲಮಾನ ಪ್ರಕಾರ ಶುಕ್ರವಾರ ರಾತ್ರಿ ನಡೆದ ಪಂದ್ಯದಲ್ಲಿ ಅಮೆರಿಕ 11ನೇ ನಿಮಿಷದಲ್ಲಿ ಮುನ್ನಡೆ ಸಾಧಿಸಿತು. ಕಳೆದ ಪಂದ್ಯದ ಹೀರೋ ಫೋಲಾರಿನ್ ಬಾಲೋಗುನ್, ರಿಕಾರ್ಡೊ ಪೆಪಿಗೆ ಪಾಸ್ ಮಾಡಿದ ಚೆಂಡನ್ನು ತಡೆಯಲು ಅಡ್ಡ ಬಂದ ಆಸೀಸ್ ಡಿಫೆಂಡರ್ ಕ್ಯಾಮರೂನ್ ಬರ್ಗೆಸ್ ಆಕಸ್ಮಿಕವಾಗಿ ತಮ್ಮ ತಂಡದ ಗೋಲು ಪೆಟ್ಟಿಗೆಯೊಳಗೆ ಚೆಂಡನ್ನು ಒದ್ದು ಸ್ವಗೋಲಿನ ಪ್ರಮಾದ ಎಸಗಿದರು. ಬಳಿಕ 43ನೇ ನಿಮಿಷದಲ್ಲಿ ಅಮೆರಿಕ ತಂಡದ ಅತಿ ಕಿರಿಯ ಆಟಗಾರರೆನಿಸಿರುವ 21 ವರ್ಷದ ಅಲೆಕ್ಸ್ ಫ್ರೀಮನ್ ಮುನ್ನಡೆಯನ್ನು 2-0ಕ್ಕೆ ವಿಸ್ತರಿಸಿದರು.
ಮೊದಲಿಗೆ ಆಫ್ಸೈಡ್ ನೀಡಲಾದ ಈ ಗೋಲು, ವಿಎಆರ್ ಪರಾಮರ್ಶೆಯ ಬಳಿಕ ಮಾನ್ಯಗೊಂಡಿತು. ಅಲೆಕ್ಸ್ ಸೂಪರ್ಬೌಲ್ ಚಾಂಪಿಯನ್ ಆಂಟೋನಿಯೊ ಫ್ರೀಮನ್ ಪುತ್ರರಾಗಿದ್ದಾರೆ.
ಅಮೆರಿಕ ದ್ವೀತಿಯಾರ್ಧದಲ್ಲಿ ಗೋಲು ಬಾರಿಸಲು ಶಕ್ತವಾಗಲಿಲ್ಲ. ಆದರೆ ಪಂದ್ಯದುದ್ದಕ್ಕೂ ಪ್ರಾಬಲ್ಯ ಕಾಯ್ದುಕೊಳ್ಳುವಲ್ಲಿ ಯಶಸ್ವಿಯಾಯಿತು. 87 ಪಂದ್ಯಗಳಲ್ಲಿ 33 ಗೋಲು ಸಿಡಿಸಿರುವ ಪುಲಿಸಿಕ್ ಗಾಯದಿಂದಾಗಿ ಪಂದ್ಯದಿಂದ ಹೊರಗುಳಿದರು.
*ಕ್ಯಾಮರೂನ್ ಬರ್ಗೆಸ್ (11, ಸ್ವಗೋಲು)
*7: ಹಾಲಿ ಟೂರ್ನಿಯ ಮೊದಲ 32 ಪಂದ್ಯಗಳಲ್ಲೇ 7ನೇ ಸ್ವಗೋಲು ದಾಖಲಾಗಿದೆ. 2018ರಲ್ಲಿ 12 ಸ್ವಗೋಲು ದಾಖಲಾಗಿದ್ದು ಗರಿಷ್ಠ.
*6: ಅಮೆರಿಕ ವಿಶ್ವಕಪ್ನ ಲೀಗ್ ಹಂತದಲ್ಲಿ 6 ಗೋಲು ಸಿಡಿಸಿದ್ದು ಇದೇ ಮೊದಲಾಗಿದೆ. ಜತೆಗೆ 1930, 2002ರ ಟೂರ್ನಿಯಲ್ಲಿ ಒಟ್ಟು 7 ಗೋಲು ಬಾರಿಸಿದ ಸಾಧನೆಯನ್ನೂ ಹಿಮ್ಮೆಟ್ಟಿಸುವ ಅವಕಾಶ ಪಡೆದಿದೆ.
4: ಅಮೆರಿಕ ಫಿಫಾ ವಿಶ್ವಕಪ್ನಲ್ಲಿ ಸತತ 4ನೇ ಬಾರಿ ನಾಕೌಟ್ ಹಂತಕ್ಕೇರಿದೆ. ಅಲ್ಲದೆ 3ನೇ ಬಾರಿ ಗುಂಪಿನ ಅಗ್ರಸ್ಥಾನ ಖಚಿತಪಡಿಸಿಕೊಂಡಿದೆ.