ಚೀಫ್​ ಮಿನಿಸ್ಟರ್ಸ್​ ಕಪ್ ಫುಟ್​ಬಾಲ್​: ಸಿವಿ ರಾಮನ್​, ಶಾಂತಿ ನಗರಕ್ಕೆ ಜಯ

ಸಿ.ವಿ. ರಾಮನ್​ ನಗರ ಮತ್ತು ಶಾಂತಿನಗರ ತಂಡಗಳು ಕರ್ನಾಟಕ ರಾಜ್ಯ ಫುಟ್​ಬಾಲ್​ ಸಂಸ್ಥೆ (ಕೆಎಸ್​ಎ್​ಎ) ಆಶ್ರಯದಲ್ಲಿ ನಡೆಯುತ್ತಿರುವ 2ನೇ ಆವೃತ್ತಿಯ ಚೀಫ್​ ಮಿನಿಸ್ಟರ್ಸ್​ ಕಪ್ (Chief Minister Cup)​ ಫುಟ್​ಬಾಲ್​ ಟೂರ್ನಿಯಲ್ಲಿ ಶುಭಾರಂಭ ಕಂಡಿವೆ.

ಬೆಂಗಳೂರು ಫುಟ್​ಬಾಲ್​ ಸ್ಟೇಡಿಯಂನಲ್ಲಿ ಭಾನುವಾರ ಆರಂಭಗೊಂಡ ಟೂರ್ನಿಯಲ್ಲಿ ಸಿ.ವಿ. ರಾಮನ್​ ನಗರ ತಂಡ ಎ ಗುಂಪಿನ ಮೊದಲ ಪಂದ್ಯದಲ್ಲಿ ಶಿವಾಜಿನಗರ ತಂಡವನ್ನು 2-0 ಗೋಲುಗಳಿಂದ ಮಣಿಸಿತು. ಸಿ.ವಿ.ರಾಮನ್​ ನಗರ ಪರ ಆರ್​. ಸಚಿನ್​ (20ನೇ ನಿಮಿಷ) ಮತ್ತು ಆರ್​. ಸತೀಶ್​ ಕುಮಾರ್​ (77ನೇ ನಿಮಿಷ) ತಲಾ ಒಂದು ಗೋಲು ಬಾರಿಸಿದರು.

ಬಿ ಗುಂಪಿನ ಪಂದ್ಯದಲ್ಲಿ ಶಾಂತಿನಗರ ತಂಡ ಆರ್​ಆರ್​ ನಗರವನ್ನು 4-1 ಗೋಲುಗಳಿಂದ ಸೋಲಿಸಿತು. ಶಾಂತಿನಗರ ಪರ ಸಂಜಯ್​ ಎಸ್​. (83, 90+7) ಎರಡು ಗೋಲು ಸಿಡಿಸಿದರೆ, ರೋಶನ್​ ಸಿಂಗ್​ (14), ಜಿ. ಜಾನ್​ ಪೀಟರ್​ (50) ತಲಾ ಒಂದು ಗೋಲು ಬಾರಿಸಿದರು. ಆರ್​ಆರ್​ ನಗರ ಪರ ರಾಬಿನ್​ಸನ್​ (41) ಒಂದು ಗೋಲು ಗಳಿಸಿ ಸೋಲಿನ ಅಂತರ ತಗ್ಗಿಸಿದರು.

ಅಖಿಲ ಭಾರತ ಫುಟ್​ಬಾಲ್​ ಒಕ್ಕೂಟದ (ಎಐಎಫ್​​ಎಫ್​) ಉಪಾಧ್ಯಕ್ಷ, ಕೆಎಸ್​ಎಫ್​​ಎ ಅಧ್ಯಕ್ಷ ಹಾಗೂ ಶಾಂತಿನಗರ ಶಾಸಕ ಎನ್​.ಎ. ಹ್ಯಾರಿಸ್​ ಟೂರ್ನಿಗೆ ಚಾಲನೆ ನೀಡಿದರು. ಪ್ರಧಾನ ಕಾರ್ಯದರ್ಶಿ ಎಂ. ಸತ್ಯನಾರಾಯಣ ಮತ್ತು ಮೊಹಮದ್​ ಹ್ಯಾರಿಸ್​ ನಲಪಾಡ್​ ಹಾಜರಿದ್ದರು.