ರಿಯೋ ಡಿ ಜನೈರೋ: ಬ್ರೆಜಿಲ್ನ ರಾಷ್ಟ್ರೀಯ ಮತ್ತು ಕ್ಲಬ್ ಫುಟ್ಬಾಲ್ ತಂಡಗಳು ಅಂತಾರಾಷ್ಟ್ರೀಯ ಸ್ಪರ್ಧೆಗಳಿಂದ ನಿಷೇಧಕ್ಕೆ ಒಳಗಾಗುವ ಭೀತಿಯಲ್ಲಿವೆ. ಬ್ರೆಜಿಲ್ ಫುಟ್ಬಾಲ್ ಸಂಸ್ಥೆಯಲ್ಲಿ (ಸಿಬಿಎಫ್) ಮೂರನೆಯವರ ಹಸ್ತಕ್ಷೇಪದಿಂದಾಗಿ ಈ ಭೀತಿ ಎದುರಾಗಿದೆ.
ಬ್ರೆಜಿಲ್ ಫುಟ್ಬಾಲ್ ಸಂಸ್ಥೆಯ ಅಧ್ಯಕ್ಷ ಎಡ್ನಾಲ್ಡೊ ರೋಡ್ರಿಗಸ್ರನ್ನು ಆರ್ಥಿಕ ಅವ್ಯವಹಾರಗಳ ಆರೋಪದ ಮೇರೆಗೆ ಬ್ರೆಜಿಲ್ ಕೋರ್ಟ್ ಇತ್ತೀಚೆಗೆ ವಜಾಗೊಳಿಸಿದ್ದು, ಜನವರಿಯಲ್ಲಿ ಹೊಸದಾಗಿ ಚುನಾವಣೆ ಆಯೋಜಿಸಲು ಸೂಚಿಸಿದೆ. ಇದನ್ನು ಮೂರನೆಯವರ ಹಸ್ತಕ್ಷೇಪವೆಂದು ಪರಿಗಣಿಸಿರುವ ವಿಶ್ವ ಫುಟ್ಬಾಲ್ ಆಡಳಿತ ಸಂಸ್ಥೆ ಫಿಫಾ, ಸಿಬಿಎಫ್ಅನ್ನು ನಿಷೇಧಿಸುವ ಎಚ್ಚರಿಕೆ ರವಾನಿಸಿದೆ.
ಫಿಫಾ ತನ್ನ ಸದಸ್ಯ ರಾಷ್ಟ್ರೀಯ ಸಂಸ್ಥೆಗಳಲ್ಲಿ ಸರ್ಕಾರ, ನ್ಯಾಯಾಲಯ ಅಥವಾ ಬೇರಾವುದೇ ಮೂರನೆಯವರ ಹಸ್ತಕ್ಷೇಪವನ್ನು ಒಪ್ಪುವುದಿಲ್ಲ. ಹೀಗಾಗಿ 5 ಬಾರಿಯ ಫಿಫಾ ವಿಶ್ವಕಪ್ ಚಾಂಪಿಯನ್ ಬ್ರೆಜಿಲ್ಗೆ ಈ ವಿವಾದ ಬಗೆಹರಿಯುವವರೆಗೆ ಅಂತಾರಾಷ್ಟ್ರೀಯ ಸ್ಪರ್ಧೆಯಿಂದ ಹೊರಗುಳಿಯಬೇಕಾದ ಆತಂಕ ಎದುರಾಗಿದೆ.