ಬೆಂಗಳೂರು: ಮೊದಲ 4 ಪಂದ್ಯಗಳ ಗೆಲುವಿನ ಬಳಿಕ ಸತತ 3 ಸೋಲಿನೊಂದಿಗೆ ಲಯ ತಪ್ಪಿರುವ ಹಾಲಿ ರನ್ನರ್ಅಪ್ ನ್ಯೂಜಿಲೆಂಡ್ ಮತ್ತು ಸತತ 4 ಸೋಲಿನ ಬಳಿಕ ಬಾಂಗ್ಲಾ ಎದುರು ಕೊನೆಗೂ ಲಯಕ್ಕೆ ಮರಳಿರುವ ಪಾಕಿಸ್ತಾನ ತಂಡಗಳು ಏಕದಿನ ವಿಶ್ವಕಪ್ನಲ್ಲಿ ಶನಿವಾರ ಉದ್ಯಾನನಗರಿಯ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆಯಲಿರುವ ಪಂದ್ಯದಲ್ಲಿ ಮುಖಾಮುಖಿ ಆಗಲಿವೆ. ಕಿವೀಸ್ ಸೆಮೀಸ್ ಅವಕಾಶ ವೃದ್ಧಿಸಿಕೊಳ್ಳುವ ಮತ್ತು ಪಾಕ್ ಸೆಮಿಫೈನಲ್ ಆಸೆ ಜೀವಂತ ಉಳಿಸಿಕೊಳ್ಳುವ ದೃಷ್ಟಿಯಿಂದ ಇದು ಮಹತ್ವದ ಕಾದಾಟವೆನಿಸಿದೆ.
ಆರಂಭಿಕ 4 ಪಂದ್ಯಗಳಲ್ಲಿ ಗೆದ್ದಾಗ ಬಲಿಷ್ಠವಾಗಿ ಕಂಡಿದ್ದ ಕಿವೀಸ್ ತಂಡ ನಂತರದಲ್ಲಿ ಲಯ ತಪ್ಪಿದೆ. ಕಳೆದ 3 ಪಂದ್ಯಗಳಲ್ಲಿ ಅಂಕಪಟ್ಟಿಯ ಮೇಲಿನ 3 ಸ್ಥಾನದಲ್ಲಿರುವ ಭಾರತ, ಆಸ್ಟ್ರೆಲಿಯಾ, ದಕ್ಷಿಣ ಆಫ್ರಿಕಾ ವಿರುದ್ಧ ಸೋತಿರುವ ಕಿವೀಸ್ಗೆ ಗಾಯದ ಸಮಸ್ಯೆಗಳಿಂದಲೂ ಹೆಚ್ಚಿನ ಹೊಡೆತ ಬಿದ್ದಿದೆ. ನಾಯಕ ಕೇನ್ ವಿಲಿಯಮ್ಸನ್ ಗಾಯದಿಂದಾಗಿ ಟೂರ್ನಿಯಲ್ಲಿ ಇದುವರೆಗೆ ಒಂದೇ ಪಂದ್ಯ ಆಡಿದ್ದರೆ, ಫಗ್ಯುರ್ಸನ್, ಚಾಪ್ಮನ್ ಕೂಡ ಗಾಯದ ಸಮಸ್ಯೆ ಎದುರಿಸಿದ್ದಾರೆ. ಕಳೆದ ಪಂದ್ಯದಲ್ಲಿ ಗಾಯಗೊಂಡ ವೇಗಿ ಮ್ಯಾಟ್ ಹೆನ್ರಿ ಇದೀಗ ವಿಶ್ವಕಪ್ನಿಂದಲೇ ಹೊರಬಿದ್ದಿದ್ದಾರೆ. ಅವರ ಬದಲಿಗೆ ಮತ್ತೋರ್ವ ವೇಗಿ ಕೈಲ್ ಜೇಮಿಸನ್ ತಂಡಕ್ಕೆ ಸೇರ್ಪಡೆಯಾಗಿದ್ದಾರೆ. ಜೇಮ್ಸ್ ನೀಶಾಮ್ ಕೂಡ ಹರಿಣಗಳ ಎದುರಿನ ಪಂದ್ಯದಲ್ಲಿ ಗಾಯಗೊಂಡಿದ್ದು, ಪಾಕ್ ವಿರುದ್ಧ ಆಡುವ ಖಚಿತತೆ ಇಲ್ಲ. ಆಸೀಸ್ ಎದುರು 388 ಮತ್ತು ದಕ್ಷಿಣ ಆಫ್ರಿಕಾ ಎದುರು 357 ರನ್ ಬಿಟ್ಟುಕೊಟ್ಟಿರುವ ಕಿವೀಸ್ ಬೌಲಿಂಗ್ ವಿಭಾಗಕ್ಕೆ ಚಿನ್ನಸ್ವಾಮಿಯ ಸಣ್ಣ ಬೌಂಡರಿ ಇನ್ನಷ್ಟು ಸವಾಲೊಡ್ಡಲಿದೆ. ಬೆಂಗಳೂರು ಮೂಲದ ಆಲ್ರೌಂಡರ್ ರಚಿನ್ ರವೀಂದ್ರ ಪ್ರೇಕ್ಷಕರಿಂದ ಉತ್ತಮ ಬೆಂಬಲ ಪಡೆಯುವ ನಿರೀಕ್ಷೆ ಇದೆ.
ಇತ್ತ ಭಾರತ, ಆಸ್ಟ್ರೆಲಿಯಾ, ಅಫ್ಘಾನಿಸ್ತಾನ, ದಕ್ಷಿಣ ಆಫ್ರಿಕಾ ವಿರುದ್ಧ ಸೋತಿದ್ದ ಪಾಕ್, ಬಾಂಗ್ಲಾ ಎದುರು ಕೊನೆಗೂ ಗೆಲುವಿನ ಲಯಕ್ಕೆ ಮರಳಿದೆ. ಆರಂಭಿಕ ಫಖರ್ ಜಮಾನ್ ಲಯಕ್ಕೆ ಮರಳಿರುವುದು ಇನ್ನಷ್ಟು ಸಮಾಧಾನ ನೀಡಿದೆ. ಬಾಂಗ್ಲಾ ವಿರುದ್ಧದ ಬೌಲಿಂಗ್ ನಿರ್ವಹಣೆಯನ್ನು ಪಾಕ್ ಮುಂದುವರಿಸಬೇಕಾದ ಅಗತ್ಯವಿದೆ. ವಿಶ್ವಕಪ್ನಲ್ಲಿ ಕಿವೀಸ್ ವಿರುದ್ಧದ ಉತ್ತಮ ದಾಖಲೆಯೂ ಪಾಕ್ಗೆ ಸ್ಫೂರ್ತಿಯಾಗಿದೆ.
ಸೆಮಿಫೈನಲ್ ಲೆಕ್ಕಾಚಾರ...
ನ್ಯೂಜಿಲೆಂಡ್: ಇದುವರೆಗೆ ಆಡಿದ 7 ಪಂದ್ಯಗಳಲ್ಲಿ 4ರಲ್ಲಿ ಗೆದ್ದು, 3ರಲ್ಲಿ ಸೋತು ಅಂಕಪಟ್ಟಿಯಲ್ಲಿ ಸದ್ಯ 4ನೇ ಸ್ಥಾನದಲ್ಲಿರುವ ಕಿವೀಸ್, ಪಾಕ್ ಮತ್ತು ಶ್ರೀಲಂಕಾ (ನ.9) ವಿರುದ್ಧದ ಮುಂದಿನೆರಡೂ ಪಂದ್ಯ ಗೆದ್ದರೆ ಹೆಚ್ಚಿನ ಲೆಕ್ಕಾಚಾರವಿಲ್ಲದೆ ಸೆಮಿಫೈನಲ್ಗೇರಲಿದೆ. ಉಳಿದ 2ರಲ್ಲಿ 1ರಲ್ಲಿ ಮಾತ್ರ ಗೆದ್ದರೆ ಕಿವೀಸ್ ರನ್ರೇಟ್ ಲೆಕ್ಕಾಚಾರದಲ್ಲೂ ಮೇಲುಗೈ ಸಾಧಿಸಿದರಷ್ಟೇ ಸೆಮೀಸ್ಗೇರಲಿದೆ. ಅದರಲ್ಲೂ ಪಾಕ್ ವಿರುದ್ಧ ಸೋತರೆ, ಕೊನೇ ಪಂದ್ಯದಲ್ಲಿ ಲಂಕಾ ವಿರುದ್ಧ ಗೆಲ್ಲಲೇಬೇಕಾದ ಒತ್ತಡ ಎದುರಾಗಲಿದೆ. ಉಳಿದೆರಡೂ ಪಂದ್ಯ ಸೋತರೆ ಕಿವೀಸ್ ಸೆಮೀಸ್ ಆಸೆ ಕೈಚೆಲ್ಲಬೇಕಾಗುತ್ತದೆ.
ಪಾಕಿಸ್ತಾನ: ಇದುವರೆಗೆ ಆಡಿದ 7 ಪಂದ್ಯಗಳಲ್ಲಿ 3ರಲ್ಲಿ ಗೆದ್ದು, 4ರಲ್ಲಿ ಸೋತಿರುವ ಪಾಕ್, ಉಳಿದೆರಡೂ ಪಂದ್ಯಗಳಲ್ಲಿ ಗೆದ್ದು, ರನ್ರೇಟ್ನಲ್ಲೂ ಮೇಲುಗೈ ಸಾಧಿಸಿದರೆ ಸೆಮಿಫೈನಲ್ಗೇರುವ ಅವಕಾಶ ಹೊಂದಿದೆ. ಕಿವೀಸ್ ವಿರುದ್ಧ ಪಾಕ್ ಗೆದ್ದರೆ, ಕೊನೇ ಪಂದ್ಯದಲ್ಲಿ ಇಂಗ್ಲೆಂಡ್ (ನ.11) ವಿರುದ್ಧ ಸೋತರೂ, ಸೆಮಿಫೈನಲ್ಗೇರುವ ಅವಕಾಶ ಹೊಂದಿರುತ್ತದೆ. ಆದರೆ ಇದಕ್ಕೆ ಆಸೀಸ್ ಉಳಿದ 3, ಕಿವೀಸ್, ಆ್ಘನ್ ಉಳಿದ ಎರಡೂ ಪಂದ್ಯ ಸೋಲಬೇಕು. ಆಗ 3-4 ತಂಡಗಳು ತಲಾ 8 ಅಂಕ ಗಳಿಸಲಿದ್ದು, ಉತ್ತಮ ರನ್ರೇಟ್ ಆಧಾರದಲ್ಲಿ ಸೆಮಿಫೈನಲ್ಗೇರಬಹುದು. ಆದರೆ ಕಿವೀಸ್ ವಿರುದ್ಧ ಸೋತರೆ ಪಾಕ್ಗೆ ಸೆಮೀಸ್ ಬಾಗಿಲು ಬಹುತೇಕ ಬಂದ್ ಆಗಲಿದೆ.
ಏಕದಿನ ಮುಖಾಮುಖಿ: 115
ನ್ಯೂಜಿಲೆಂಡ್: 51, ಪಾಕಿಸ್ತಾನ: 60, ಟೈ: 1, ರದ್ದು: 3
ವಿಶ್ವಕಪ್ ಮುಖಾಮುಖಿ: 9
ನ್ಯೂಜಿಲೆಂಡ್: 2, ಪಾಕಿಸ್ತಾನ: 7
ಆರಂಭ: ಬೆಳಗ್ಗೆ 10.30
ನೇರಪ್ರಸಾರ: ಸ್ಟಾರ್ ಸ್ಪೋರ್ಟ್ಸ್
ಮಳೆ ಮುನ್ಸೂಚನೆ ಇದೆ...
ಬೆಂಗಳೂರಿನಲ್ಲಿ ಪಾಕ್-ಕಿವೀಸ್ ಪಂದ್ಯದ ವೇಳೆ ಮಳೆ ಸುರಿಯುವ ಬಗ್ಗೆ ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ. ಶನಿವಾರ ಮಧ್ಯಾಹ್ನದ ನಂತರ ಮಳೆಯಾಗುವ ಸಾಧ್ಯತೆ ಶೇ.70-80ರಷ್ಟಿದೆ. ಬೆಂಗಳೂರಿನಲ್ಲಿ ಶುಕ್ರವಾರವೂ ಮಧ್ಯಾಹ್ನದ ನಂತರ ಅಲ್ಪ ಪ್ರಮಾಣದಲ್ಲಿ ಮಳೆಯಾಗಿದೆ. ಆದರೆ ಇದು ಹಗಲು ಪಂದ್ಯವಾಗಿರುವುದರಿಂದ, ಕನಿಷ್ಠ ಡಕ್ವರ್ತ್-ಲೂಯಿಸ್ ನಿಯಮದನ್ವಯವಾದರೂ, ಸ್ಪಷ್ಟ ಫಲಿತಾಂಶವನ್ನು ಕಾಣಲು ಯಾವುದೇ ತೊಂದರೆ ಇಲ್ಲವೆನಿಸಿದೆ. ಹೀಗಾಗಿ ಉಭಯ ತಂಡಗಳು ಅಂಕಹಂಚಿಕೊಳ್ಳುವ ಸಾಧ್ಯತೆ ಕಡಿಮೆ ಇದೆ. ಒಂದು ವೇಳೆ ಪಂದ್ಯ ರದ್ದಾದರೆ, ಕಿವೀಸ್ಗಿಂತ ಪಾಕಿಸ್ತಾನದ ಸೆಮೀಸ್ ಆಸೆಗೆ ಹೆಚ್ಚಿನ ಹಿನ್ನಡೆಯಾಗಲಿದೆ.