ನವದೆಹಲಿ: ಆಟದ ಮೇಲೆ ಗಮನ ಹರಿಸದೆ ರಾಜಕೀಯ ಮಾಡುತ್ತಿದ್ದಾಳೆ ಎಂದು ಟೀಕೆ ಮಾಡಿದವರಿಗೆ ಕುಸ್ತಿಪಟು ವಿನೇಶ್ ಪೋಗಟ್ ಸರಿಯಾದ ತಿರುಗೇಟು ನೀಡಿದ್ದಾರೆ. ಪ್ಯಾರಿಸ್ ಒಲಿಂಪಕ್ಸ್ನಲ್ಲಿ ಮಹಿಳೆಯರ 50 ಕೆಜಿ ಕುಸ್ತಿ ಸ್ಪರ್ಧೆಯಲ್ಲಿ ಫೈನಲ್ಗೆ ಲಗ್ಗೆ ಇಡುವ ಮೂಲಕ ವಿನೇಶ್ ಇತಿಹಾಸ ಬರೆದಿದ್ದಾರೆ. ಒಲಿಂಪಿಕ್ಸ್ ಇತಿಹಾಸದಲ್ಲೇ ಭಾರತೀಯಳೊಬ್ಬಳು ಮಹಿಳೆಯರ ಕುಸ್ತಿ ಸ್ಪರ್ಧೆಯಲ್ಲಿ ಫೈನಲ್ ತಲುಪಿದ್ದು ಇದೇ ಮೊದಲು.
ವಿನೇಶ್ ಅವರ ಈ ಸಾಧನೆಯ ಹಿಂದಿನ ಹಾದಿ ಮಾತ್ರ ಸುಲಭವಾಗಿರಲಿಲ್ಲ. ಸಾಕಷ್ಟು ಟೀಕೆಗಳನ್ನು ಮತ್ತು ಕೆಟ್ಟ ಬೈಗುಳಗಳನ್ನು ಎದುರಿಸಿದ್ದಾರೆ. ನಿಮಗೆ ಗೊತ್ತಿರಬಹುದು ಕಳೆದ ವರ್ಷದ ಭಾರತ ಕುಸ್ತಿ ಒಕ್ಕೂಟದಲ್ಲಿ (ಡಬ್ಲ್ಯುಎಫ್ಐ) ದೊಡ್ಡ ಹೋರಾಟವೇ ನಡೆಯಿತು. ಈ ಸಂದರ್ಭದಲ್ಲಿ ಕುಸ್ತಿ ಒಕ್ಕೂಟದ ಅಧ್ಯಕ್ಷರಾಗಿದ್ದ ಬ್ರಿಜ್ ಭೂಷಣ್ ಶರಣ್ ಸಿಂಗ್ ವಿರುದ್ಧ ಲೈಂಗಿಕ ಕಿರುಕುಳದಂತಹ ಗಂಭೀರ ಆರೋಪ ಕೇಳಿಬಂದಿತ್ತು. ಈ ಬಗ್ಗೆ ಸರ್ಕಾರ ಗಮನ ಹರಿಸದೇ ಇದ್ದಾಗ ವಿನೇಶ್ ಪೋಗಟ್, ಭಜರಂಗ್ ಪೂನಿಯಾ ಮತ್ತು ಸಾಕ್ಷಿ ಮಲಿಕ್ ಅವರು ಬ್ರಿಜ್ ಭೂಷಣ್ ಶರಣ್ ಸಿಂಗ್ ವಿರುದ್ಧ ಮುಂಚೂಣಿಯಲ್ಲಿ ನಿಂತು ಇತರೆ ಕುಸ್ತಿಪಟುಗಳ ಜತೆ ಪ್ರತಿಭಟನೆ ನಡೆಸಿದ್ದರು. ಈ ವೇಳೆ ವಿನೇಶ್ ವಿರುದ್ಧ ಸಾಕಷ್ಟು ಮಂದಿ ನೆಗಿಟಿವ್ ಆಗಿ ಮಾತನಾಡಿದ್ದರು. ಹೊಸ ಸಂಸತ್ ಭವನಕ್ಕೆ ಮುತ್ತಿಗೆ ಹಾಕಲು ಯತ್ನಿಸಿ ಪೊಲೀಸರ ಜತೆಗೂ ವಿನೇಶ್ ಸಂಘರ್ಷ ನಡೆಸಿದ್ದರು. ನಂತರ ಖೇಲ್ರತ್ನ, ಅರ್ಜುನ ಪ್ರಶಸ್ತಿಗಳನ್ನು ಸರ್ಕಾರಕ್ಕೆ ಮರಳಿಸಲು ಯತ್ನಿಸಿ, ರಾಷ್ಟ್ರಪತಿ ಭವನದ ಎದುರು ಅವನ್ನು ಇಟ್ಟುಹೋಗಿದ್ದರು. ಈ ವಿವಾದ ತಣ್ಣಗಾದ ಬಳಿಕ ಕುಸ್ತಿ ಅಖಾಡಕ್ಕೆ ಮರಳಿದ ವಿನೇಶ್ ಇಲ್ಲೂ ಪಟ್ಟುಬಿಟ್ಟುಕೊಡದೆ, ಪದಕ ಬೇಟೆಯಾಡಿರುವುದು ವಿಶೇಷವೆನಿಸಿದೆ. ಇದರ ನಡುವೆ ವಿನೇಶ್ ಅವರ ಹಳೆಯ ಪೋಸ್ಟ್ ಒಂದು ಇದೀಗ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿದೆ.
ಪ್ರೀತಿಯ ವೈರಿಗಳೇ, ನಿಮ್ಮನ್ನು ಹುಚ್ಚರಾಗಿಸಲು ನನ್ನ ಬಳಿ ಇನ್ನೂ ತುಂಬಾ ಇದೆ. ತಾಳ್ಮೆಯಿಂದ ಕಾಯಿರಿ ಎಂದು ಇದೇ ವರ್ಷ ಮಾರ್ಚ್ 12ರಂದು ತಮ್ಮ ಎಕ್ಸ್ ಖಾತೆಯಲ್ಲಿ ವಿನೇಶ್ ಪೋಗಟ್ ಬರೆದುಕೊಂಡಿದ್ದರು. ಇದೀಗ ವಿನೇಶ್ ಕುಸ್ತಿಯಲ್ಲಿ ಫೈನಲ್ ತಲುಪಿದ ಬಳಿಕ ಈ ಪೋಸ್ಟ್ ಮತ್ತೆ ವೈರಲ್ ಆಗುತ್ತಿದೆ.
ಅಂದಹಾಗೆ ಹರಿಯಾಣದ 29 ವರ್ಷದ ವಿನೇಶ್ ಪೋಗಟ್ ಮಂಗಳವಾರ (ಆ.6) ರಾತ್ರಿ ಸೆಮಿಫೈನಲ್ ಪಂದ್ಯದಲ್ಲಿ ಕ್ಯೂಬಾದ ಯುಸ್ನಿಲಿಸ್ ಗುಜ್ಮನ್ ಲೋಪೆಜ್ ವಿರುದ್ಧ 5-0 ಅಂಕಗಳಿಂದ ಸುಲಭ ಗೆಲುವು ದಾಖಲಿಸಿ ಫೈನಲ್ಗೆ ಮುನ್ನಡೆದರು. ಸ್ವರ್ಣ ಪದಕದ ಹೋರಾಟ ಬುಧವಾರ ರಾತ್ರಿ ನಡೆಯಲಿದೆ. ವಿನೇಶ್ಗೆ ಸ್ಪರ್ಧಿಸಿದ 3ನೇ ಒಲಿಂಪಿಕ್ಸ್ನಲ್ಲಿ ಚೊಚ್ಚಲ ಪದಕ ಒಲಿದಿದೆ. ಈ ಮುನ್ನ 2016ರ ರಿಯೋ ಒಲಿಂಪಿಕ್ಸ್ನಲ್ಲಿ 48 ಕೆಜಿ ಫ್ರೀಸ್ಟೈಲ್ ವಿಭಾಗದಲ್ಲಿ ಕಣಕ್ಕಿಳಿದ ವಿನೇಶ್, ಕ್ವಾರ್ಟರ್ಫೈನಲ್ನಲ್ಲಿ ಗಾಯಕ್ಕೆ ತುತ್ತಾಗಿ ಪಂದ್ಯವನ್ನು ಅರ್ಧಕ್ಕೆ ತ್ಯಜಿಸಿದ್ದರು. 2021ರ ಟೋಕಿಯೊ ಗೇಮ್ಸ್ನಲ್ಲಿ 53 ಕೆಜಿ ವಿಭಾಗದಲ್ಲಿ ಆಡಿದಾಗಲೂ ಎಂಟರ ಘಟ್ಟದಲ್ಲಿ ವಿನೇಶ್ ಪದಕದ ಕಸನು ಭಗ್ನಗೊಂಡಿತು. ಪ್ಯಾರಿಸ್ನಲ್ಲಿ ಬೆಳ್ಳಿ ಅಥವಾ ಚಿನ್ನ ಗೆಲ್ಲುವ ಅವಕಾಶ ಹೊಂದಿರುವ ವಿನೇಶ್ ಪದಕ ಗೆದ್ದ ಎರಡನೇ ಭಾರತೀಯ ಮಹಿಳೆ ಎನಿಸಲಿದ್ದಾರೆ. 2016ರ ರಿಯೋ ಒಲಿಂಪಿಕ್ಸ್ನಲ್ಲಿ ಸಾಕ್ಷಿ ಮಲಿಕ್ ಕಂಚು ಜಯಿಸಿರುವುದು ಇದುವರೆಗಿನ ಅತ್ಯುತ್ತಮ ಸಾಧನೆ ಎನಿಸಿದೆ.
ವಿನೇಶ್ ಅವರು ಕ್ವಾರ್ಟರ್ಫೈನಲ್ನಲ್ಲಿ 7-5 ಅಂತರದಿಂದ ಯೂಕ್ರೇನ್ನ ಒಕ್ಸಾನ ಲಿವಾಚ್ ಎದುರು ಹೋರಾಟಯುತ ಗೆಲುವು ಒಲಿಸಿಕೊಂಡರು. ವಿನೇಶ್ ತನ್ನ ಪರಿಣಾಮಕಾರಿ ಆಟದೊಂದಿಗೆ ಕ್ವಾರ್ಟರ್ಫೈನಲ್ನಲ್ಲಿ ಪ್ರಾಬಲ್ಯ ಸಾಧಿಸಿದರು. ಆದರೆ ಪಂದ್ಯದ ಅಂತಿಮ 45 ಸೆಕೆಂಡ್ಗಳಲ್ಲಿ ಆಕ್ರಮಣಕಾರಿ ಆಟಕ್ಕಿಳಿದ ಒಕ್ಸಾನ ಎದುರು ಉತ್ತಮ ಪ್ರದರ್ಶನ ನೀಡಿದ ವಿನೇಶ್, ಅಂತಿಮ 20 ಸೆಕೆಂಡುಗಳಲ್ಲಿ ನಾಲ್ಕು ಪಾಯಿಂಟ್ ಗಳಿಸಿ ಗೆಲುವಿನ ಅಂತರ ಹಿಗ್ಗಿಸಿಕೊಂಡರು.
ಎಂಟರ ಘಟ್ಟಕ್ಕೆ ಮುನ್ನ ನಡೆದ ಪ್ರಿ ಕ್ವಾರ್ಟರ್ಫೈನಲ್ನಲ್ಲಿ ವಿನೇಶ್ 3-2ರಿಂದ ನಾಲ್ಕು ಬಾರಿಯ ವಿಶ್ವ ಚಾಂಪಿಯನ್, ಹಾಲಿ ಒಲಿಂಪಿಕ್ಸ್ ಚಾಂಪಿಯನ್ ಜಪಾನ್ನ ಯುಯಿ ಸುಸಾಕಿಗೆ ಶಾಕ್ ನೀಡಿದರು. ಇದರೊಂದಿಗೆ ಜಪಾನ್ ಕುಸ್ತಿಪಟುಗಳನ್ನು ಹೊರತುಪಡಿಸಿ ಸುಸಾಕಿಯನ್ನು ಮಣಿಸಿದ ಮೊದಲ ಅಂತಾರಾಷ್ಟ್ರೀಯ ಕುಸ್ತಿಪಟು ಎನಿಸಿದರು. ಟೋಕಿಯೊ ಒಲಿಂಪಿಕ್ಸ್ನಲ್ಲಿ ಎದುರಾಳಿಗೆ ಕನಿಷ್ಠ ಒಂದು ಅಂಕವೂ ನೀಡದೆ ಚಿನ್ನದ ಪದಕಕ್ಕೆ ಕೊರಳೊಡ್ಡಿದ್ದ ಸುಸಾಕಿ ಮೊದಲ ಸುತ್ತಿನಲ್ಲಿಯೇ ಆಘಾತ ಕಂಡರು. 25 ವರ್ಷದ ಸುಸಾಕಿ ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ಇದುವರೆಗೆ 82-0 ಗೆಲುವು-ಸೋಲಿನ ದಾಖಲೆ ಹೊಂದಿದ್ದರು. ಪಂದ್ಯದ ಅಂತಿಮ 17 ಸೆಕೆಂಡ್ಗಳಲ್ಲಿ ಕಾರ್ಯತಂತ್ರ ಬದಲಾಯಿಸಿದ ವಿನೇಶ್, ಐದು ಸೆಕೆಂಡ್ಗಳ ಅಂತರದಲ್ಲಿ 3 ಪಾಯಿಂಟ್ ಗಳಿಸಿ ಹಾಲಿ ಚಾಂಪಿಯನ್ ಅನ್ನು ಕೂಟದಿಂದ ಹೊರದಬ್ಬಿದರು. (ಏಜೆನ್ಸೀಸ್)