ಜ್ವೆರೆವ್ ಯುಎಸ್ ಓಪನ್ ಚಾಂಪಿಯನ್: ಜರ್ಮನಿ ಆಟಗಾರನಿಗೆ 2ನೇ ಗ್ರಾಂಡ್ ಸ್ಲಾಂ ಕಿರೀಟ

ಭಾನುವಾರ ತಡರಾತ್ರಿ ಅರ್ಥರ್ ಆಶ್ ಸ್ಟೇಡಿಯಂನಲ್ಲಿ ನಡೆದ ಪ್ರಶಸ್ತಿ ಕಾದಾಟದಲ್ಲಿ 29 ವರ್ಷದ ಜ್ವೆರೆವ್ 6-3, 7-6 (2), 5-7, 6-2 ಅಂತರದಿಂದ ಎಂಟನೇ ಶ್ರೇಯಾಂಕಿತ ಬೆನ್ ಶೆಲ್ಟನ್‌ರನ್ನು ಮಣಿಸಿದರು. ಈ ಮೂಲಕ 2003ರ ನಂತರ ಅಮೆರಿಕದ ಪುರುಷ ಆಟಗಾರನೊಬ್ಬ ಗ್ರಾಂಡ್ ಸ್ಲಾಂ ಜಯಿಸುವುದನ್ನು ನೋಡಲು ನೆರೆದಿದ್ದ 24 ಸಾವಿರಕ್ಕೂ ಅಧಿಕ ಸ್ಥಳೀಯ ಅಭಿಮಾನಿಗಳಿಗೆ ನಿರಾಸೆ ಉಂಟಾಯಿತು. 2020ರಲ್ಲಿ ಕೈತಪ್ಪಿದ್ದ ಪ್ರಶಸ್ತಿಯನ್ನು ತನ್ನದಾಗಿಸಿಕೊಂಡ ಜ್ವೆರೆವ್ ಮುಕ್ತ ಟೆನಿಸ್ ಯುಗದಲ್ಲಿ ಈ ಸಾಧನೆ ಮಾಡಿದ ಜರ್ಮನಿಯ ಎರಡನೇ ಆಟಗಾರ ಎನಿಸಿದರು.

ಆರು ವರ್ಷಗಳ ಹಿಂದೆ ಎರಡು ಸೆಟ್ ಮುನ್ನಡೆಯ ನಡುವೆಯೂ ಪ್ರಶಸ್ತಿ ಜಯಿಸುವಲ್ಲಿ ವಿಲವಾಗಿದ್ದ ಮಧುಮೇಹ ಟೈಪ್-1 ಕಾಯಿಲೆ ಹೊಂದಿರುವ ಜ್ವೆರೆವ್ ಈ ಬಾರಿಯೂ ಎರಡು ಸೆಟ್ ನಂತರ ಮೂರನೇ ಸೆಟ್‌ನಲ್ಲಿ ಹಿನ್ನಡೆ ಕಂಡರು. ಟೈಬ್ರೇಕರ್‌ನಲ್ಲಿ 4ನೇ ಸೆಟ್ ಒಲಿಸಿಕೊಂಡ ಜ್ವೆರೆವ್, ತಾನು ಗೆದ್ದಿರುವುದು ತಕ್ಷಣಕ್ಕೆ ತಿಳಿಯದೆ ಬೇಸ್‌ಲೈನ್ ಬಳಿ ತೆರಳಿದರು. ಕೆಲ ಕ್ಷಣಗಳ ನಂತರ ತಾನು ಗೆದ್ದಿರುವುದನ್ನು ಅರಿತು ಕೈಯನ್ನು ಮೇಲೆತ್ತಿ ಮುಗುಳುನಗೆಯೊಂದಿಗೆ ಸಂಭ್ರಮಿಸಿದರು. ಇದರೊಂದಿಗೆ 23 ವರ್ಷದ ಬೆನ್ ಶೆಲ್ಟನ್ ಚೊಚ್ಚಲ ಗ್ರಾಂಡ್ ಸ್ಲಾಂ ಪ್ರಶಸ್ತಿ ಕನಸು ಭಗ್ನಗೊಂಡಿತು.