- ಈ ವರ್ಷದ ಮಾರ್ಚ್ನಲ್ಲಿ ಧನಶ್ರೀಗೆ ವಿಚ್ಛೇದನ
- ಡಿವೋರ್ಸ್ ಬಳಿಕ ಗೆಳತಿ ಆರ್ಜೆ ಮಹ್ವಾಶ್ ಜತೆ ಸುತ್ತಾಟ
- ಮದುವೆ ಕುರಿತು ಮಾಡಿದ ಕಮೆಂಟ್ ವೈರಲ್
ಮುಂಬೈ: ಈ ವರ್ಷದ ಮಧ್ಯದಲ್ಲಿ ಧನಶ್ರೀ ವರ್ಮ ಅವರಿಗೆ ವಿಚ್ಛೇದನ ನೀಡಿದ ಟೀಮ್ ಇಂಡಿಯಾ ಬೌಲರ್ ಯಜುವೇಂದ್ರ ಚಹಲ್, ಡಿವೋರ್ಸ್ ಕೊಟ್ಟ ಕೆಲವೇ ದಿನಗಳ ಬಳಿಕ ದುಬೈ ಅಂತಾರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ನಡೆದ ಭಾರತ ಮತ್ತು ನ್ಯೂಜಿಲೆಂಡ್ ನಡುವಿನ ಚಾಂಪಿಯನ್ಸ್ ಟ್ರೋಫಿಯ ಫೈನಲ್ ಹಣಾಹಣಿಯಲ್ಲಿ ಗೆಳತಿ ಆರ್ಜೆ ಮಹ್ವಾಶ್ ಜತೆ ಸ್ಟೇಡಿಯಂನಲ್ಲಿ ಪ್ರತ್ಯಕ್ಷವಾದರು. ಅಂದಿನಿಂದ ಇವರಿಬ್ಬರ ಮದುವೆ ವಿಷಯ ಸೋಷಿಯಲ್ ಮೀಡಿಯಾದಲ್ಲಿ ಬಲು ಜೋರಾಗಿ ಹರಿದಾಡುತ್ತಿವೆ. ಈ ಮಧ್ಯೆ, ಇದೀಗ ಚಹಲ್ ಮಾಡಿರುವ ಕಮೆಂಟ್ ಸದ್ಯ ನೆಟ್ಟಿಗರಲ್ಲಿ ಗೊಂದಲ ಸೃಷ್ಟಿಸಿದೆ.
ಟೀಮ್ ಇಂಡಿಯಾ ಪರ ಅಷ್ಟಾಗಿ ಯಾವುದೇ ಪಂದ್ಯಗಳಲ್ಲಿ ಕಾಣಿಸಿಕೊಳ್ಳದ ಸ್ಪಿನ್ ಮಾಂತ್ರಿಕ ಚಹಲ್, ಸಾಮಾಜಿಕ ಜಾಲತಾಣಗಳಲ್ಲಿ ಹೆಚ್ಚಾಗಿ ಸಕ್ರಿಯರಾಗಿದ್ದಾರೆ. ತಮ್ಮ ಬಗ್ಗೆ ಹರಿದಾಡುತ್ತಿರುವ ಮದುವೆ ವದಂತಿಗಳು, ಮೀಮ್ಗಳನ್ನು ನೋಡಿ ಖುಷಿ ಪಡುವ ಅವರು, ಈಗ ತಮ್ಮ ಕಮೆಂಟ್ನಿಂದ ಹಲವರ ಹುಬ್ಬೇರಿಸಿದ್ದಾರೆ. ಕ್ರಿಕೆಟಿಗನ ಈ ಕಮೆಂಟ್ಗೆ ಮಿಶ್ರ ಪ್ರತಿಕ್ರಿಯೆಗಳು ವ್ಯಕ್ತವಾಗುತ್ತಿದ್ದು, ಕ್ಷಣಮಾತ್ರದಲ್ಲಿ ವೈರಲ್ ಆಗಿದೆ.
ಹಿಂದಿಯಲ್ಲಿ ಕಮೆಂಟ್ ಹಾಕಿರುವ ಚಹಲ್, ನಾನು ಮದುವೆಯಾಗಲು ರೆಡಿಯಿದ್ದೇನೆ. ಆದರೆ, ಹುಡುಗಿ ಬೇಕಷ್ಟೇ ಎಂದಿದ್ದಾರೆ. ಚಹಲ್ ಹಾಕಿರುವ ಈ ಕಮೆಂಟ್ಗೆ ಅನೇಕರು ಪ್ರತಿಕ್ರಿಯಿಸಿದ್ದು, ಒಂದಷ್ಟು ಮಂದಿ ಮತ್ತೊಂದು ಮದುವೆಗೆ ನೀವು ಮಾಡಿರುವ ನಿರ್ಧಾರ ಸರಿಯಿದೆ ಎಂದರೆ, ಇನ್ನೂ ಕೆಲವರು ಅಚ್ಚರಿ ವ್ಯಕ್ತಪಡಿಸಿದ್ದಾರೆ.
ಚಹಲ್-ಧನಶ್ರೀ ಡಿವೋರ್ಸ್
ಚಹಲ್ ಮತ್ತು ಧನಶ್ರೀ ಅವರ ವಿಚ್ಛೇದನ ಈ ವರ್ಷದ ಮಾರ್ಚ್ 2025ರಲ್ಲಿ ಮುಂಬೈ ಕೌಟುಂಬಿಕ ನ್ಯಾಯಾಲಯದಲ್ಲಿ ನಡೆಯಿತು. ಈ ನಿರ್ಧಾರದಿಂದ ಅವರ ನಾಲ್ಕು ವರ್ಷಗಳ ದಾಂಪತ್ಯಕ್ಕೆ ತೆರೆ ಬಿದ್ದಿತು. ಚಹಲ್-ಧನಶ್ರೀ ಮಧ್ಯೆ ಬಿರುಕು ಮೂಡಿದೆ ಎಂಬ ವದಂತಿಗಳು 2022ರ ಮಧ್ಯದಿಂದಲೂ ವ್ಯಾಪಕವಾಗಿ ಹರಿದಾಡಿತ್ತು. ದಂಪತಿಗಳು ಪ್ರತ್ಯೇಕವಾಗಿ ವಾಸಿಸುತ್ತಿದ್ದಾರೆ ಎಂಬ ವರದಿಗಳು ಅಂದು ದೊಡ್ಡ ಸುದ್ದಿಗೆ ಕಾರಣವಾಗಿತ್ತು,(ಏಜೆನ್ಸೀಸ್).