IND vs WI T20: ಪ್ರಸಕ್ತ ತವರಿನಲ್ಲಿ ನಡೆಯುತ್ತಿರುವ ಭಾರತ ಮತ್ತು ವೆಸ್ಟ್ ಇಂಡೀಸ್ ನಡುವಿನ ಐದು ಪಂದ್ಯಗಳ ಟಿ20 ಸರಣಿಯನ್ನು 2-2 ಅಂತರದಲ್ಲಿ ಸಮಬಲವಾಗಿಸಿರುವ ಎರಡೂ ತಂಡಗಳು, ಇಂದು ಬೆಂಗಳೂರಿನ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆಯಲಿರುವ ಐದನೇ ಹಾಗೂ ಕೊನೆಯ ನಿರ್ಣಾಯಕ ಪಂದ್ಯದಲ್ಲಿ ಗೆಲುವಿಗಾಗಿ ಸೆಣಸಲಿದೆ. ಈ ಮ್ಯಾಚ್ನಲ್ಲಿ, ಯಾರಿಗೆ ಸರಣಿ ಒಲಿಯಲಿದೆ ಎಂಬ ಕಾತರ ಸದ್ಯ ಕ್ರಿಕೆಟ್ ಅಭಿಮಾನಿಗಳನ್ನು ಕಾಡುತ್ತಿರುವಾಗಲೇ, ವರುಣನ ಅಡಚಣೆ ಶುರುವಾಗಿದೆ.
ವಿಂಡೀಸ್ ಎದುರು ನಾಲ್ಕನೇ ಪಂದ್ಯದಲ್ಲಿ ಹೀನಾಯವಾಗಿ ಸೋಲುಂಡ ಶ್ರೇಯಸ್ ಅಯ್ಯರ್ ಪಡೆ, ಬ್ಯಾಟ್ಸ್ಮನ್ ಮತ್ತು ಬೌಲರ್ಗಳ ಹಾವಳಿಗೆ ನಡುಗಿ ಪಂದ್ಯವನ್ನು ಸುಲಭವಾಗಿ ಬಿಟ್ಟುಕೊಟ್ಟಿತು. ಈಗ ಐದನೇ ಪಂದ್ಯದಲ್ಲಿ ಕೆರಿಬಿಯನ್ ಪಡೆಯನ್ನು ಹೆಚ್ಚುವರಿ ರನ್ಗಳಿಂದ ಮಣಿಸಿ, ತವರಿನಲ್ಲಿ ಸರಣಿ ಗೆದ್ದು ಭಾರಿ ಮುಖಭಂಗದಿಂದ ತಪ್ಪಿಸಿಕೊಳ್ಳಲು ಟೀಮ್ ಇಂಡಿಯಾ ಸಜ್ಜಾಗಿರುವಾಗಲೇ ಬೆಂಗಳೂರಿನಲ್ಲಿ ಮಳೆಯ ಅಡಚಣೆ ಆರಂಭಗೊಂಡಿದೆ.
ಮತ್ತೊಂದೆಡೆ, ಈ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ಗೆ ಅಪರೂಪದ ಅವಕಾಶ ಲಭಿಸಿದೆ. 2002ರಿಂದ ಭಾರತದ ನೆಲದಲ್ಲಿ ಯಾವುದೇ ಮಾದರಿಯಲ್ಲೂ ವಿಂಡೀಸ್ ಸರಣಿಯನ್ನು ಗೆದ್ದಿಲ್ಲ. ಹೀಗಿರುವಾಗ, ಕೆರಿಬಿಯನ್ ತಂಡವು ಈ ಪಂದ್ಯವನ್ನು ಗೆದ್ದರೆ, ಹೊಸ ದಾಖಲೆ ಜತೆಗೆ ಬಹಳ ವರ್ಷಗಳ ಕಾಯುವಿಕೆಯನ್ನು ರೋಚಕ ಗೆಲುವಿನ ಮೂಲಕ ಅಂತ್ಯಗೊಳಿಸಲಿದೆ. ಸದ್ಯ ಈ ನಿರ್ಣಾಯಕ ಪಂದ್ಯಕ್ಕೆ ಮಳೆ ಉಂಟಾಗಿದ್ದು, ಹವಾಮಾನ ಮುನ್ಸೂಚನೆ ಪ್ರಕಾರ, ಬೆಂಗಳೂರಿನಲ್ಲಿ ಸಂಜೆಯಿಂದ ಮಳೆಯಾಗುವ ಸಾಧ್ಯತೆ ಹೆಚ್ಚಿದೆ. ಇದು ಪಂದ್ಯವನ್ನು ರದ್ದು ಮಾಡುವ ಸಾಧ್ಯತೆಯೂ ಇದೆ ಎಂಬ ಅನುಮಾನಗಳು ಮೂಡಿವೆ. ವರದಿಗಳ ಪ್ರಕಾರ, ಬೆಂಗಳೂರಿನಲ್ಲಿ ಮಧ್ಯಾಹ್ನ 3 ಗಂಟೆಯವರೆಗೆ ಹವಾಮಾನ ಅನುಕೂಲಕರವಾಗಿರುತ್ತದೆ. ಆದರೆ, ಸಂಜೆ 4 ಗಂಟೆಯಿಂದ ಮಳೆಯ ಸಾಧ್ಯತೆ ಗಣನೀಯವಾಗಿ ಹೆಚ್ಚಾಗಲಿದೆ. ಗುಡುಗು, ಸಿಡಿಲು ಸಹಿತ ಜೋರಾದ ಗಾಳಿ ಬೀಸುವ ಸಾಧ್ಯತೆ ಇದೆ ಎಂದು ಅಂದಾಜಿಸಲಾಗಿದೆ.
ಸಂಜೆ 4 ಗಂಟೆಗೆ ಶೇ.68ರಷ್ಟು, ಸಂಜೆ 5 ಗಂಟೆಗೆ ಶೇ.71ರಷ್ಟು ಮತ್ತು ಸಂಜೆ 6 ಗಂಟೆಗೆ ಶೇ.49 ಮಳೆಯಾಗುವ ಸಾಧ್ಯತೆಯಿದೆ. ಪಂದ್ಯದ ಆರಂಭದ ಸಮಯವಾದ ಸಂಜೆ 7 ಗಂಟೆಗೆ ಶೇ.64 ರಷ್ಟು ಮಳೆಯಾಗುವ ಸಾಧ್ಯತೆ ಇದೆ. ರಾತ್ರಿ 8 ಮತ್ತು 9 ಗಂಟೆಗೆ 49ರಷ್ಟು, ರಾತ್ರಿ 10 ಗಂಟೆಗೆ 56ರಷ್ಟು ಮತ್ತು ರಾತ್ರಿ 11 ಗಂಟೆಗೆ ಶೇ.49% ಮಳೆ ಸುರಿಯಬಹುದು ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ. ಇನ್ನು, ಟಿ20 ಪಂದ್ಯದಲ್ಲಿ ಫಲಿತಾಂಶ ಲಭಿಸಬೇಕಾದರೆ, ಉಭಯ ತಂಡಗಳು ತಲಾ ಐದು ಓವರ್‌ಗಳನ್ನು ಆಡಬೇಕಿದೆ. ಮಳೆಯಿಂದಾಗಿ ಮ್ಯಾಚ್ ವಿಳಂಬವಾದರೆ ಕಡಿಮೆ ಓವರ್ಗಳಲ್ಲಿ ಪಂದ್ಯ ನಡೆಯಲಿದೆ. ಆದರೆ, ಮೊದಲ ಎಸೆತವನ್ನು ರಾತ್ರಿ 10:16ರೊಳಗೆ ಎಸೆಯದಿದ್ದರೆ, ಪಂದ್ಯವನ್ನು ರದ್ದುಗೊಳಿಸಲಾಗುತ್ತದೆ. ಇದೇ ವೇಳೆ, ಐದು ಪಂದ್ಯಗಳ ಟಿ20 ಸರಣಿ 2-2 ಅಂತರದಲ್ಲಿ ಸಮಬಲವಾಗಲಿದೆ.
ಇದು ಸಂಭವಿಸಿದರೆ, ಎರಡೂ ತಂಡಗಳು ಕಪ್ ಅನ್ನು ಹಂಚಿಕೊಳ್ಳಲಿದೆ. ಕಾರಣ, ಪಂದ್ಯಕ್ಕೆ ಯಾವುದೇ ಮೀಸಲು ದಿನವಿಲ್ಲ. ಮಳೆ ಕೊಂಚ ಬಿಡುವು ನೀಡಿದರೆ, ಬೇಗನೇ ಫೀಲ್ಡ್ ಸಿದ್ಧಪಡಿಸಿಕೊಂಡರೆ, ಕಡಿಮೆ ಓವರ್ಗಳಲ್ಲಿ ಸರಣಿ ವಿಜೇತರನ್ನು ನಿರ್ಧರಿಸುವ ಸಾಧ್ಯತೆ ಹೆಚ್ಚಿದೆ. ಟೀಮ್ ಇಂಡಿಯಾ ಈಗಾಗಲೇ ವೆಸ್ಟ್ ಇಂಡೀಸ್ ವಿರುದ್ಧದ ಏಕದಿನ ಸರಣಿಯನ್ನು 2-1 ಅಂತರದಲ್ಲಿ ವಶಪಡಿಸಿಕೊಂಡಿದೆ. ಆದರೀಗ, ಟಿ20 ಸರಣಿ ಗೆಲ್ಲುವವರ ನಿರ್ಧಾರಕ್ಕೆ ವರುಣ ಸಹಕಾರ ನೀಡಬೇಕು ಅಷ್ಟೇ,(ಏಜೆನ್ಸೀಸ್).