ನಮ್ಮ ಗುರಿ ಅದೊಂದೇ! ಭಾರತಕ್ಕೆ ಇಂದಿನ ಪಂದ್ಯದಲ್ಲೂ... ಇಂಗ್ಲೆಂಡ್​ ಕ್ಯಾಪ್ಟನ್​ ಸವಾಲಿನ ಮಾತು ​

Harry Brook: ಐದು ಪಂದ್ಯಗಳ ಟಿ20 ಸರಣಿಯಲ್ಲಿ ಹಾಲಿ ವಿಶ್ವ ಚಾಂಪಿಯನ್ ಟೀಮ್ ಇಂಡಿಯಾವನ್ನು 3-0 ಅಂತರದಲ್ಲಿ ಮಣಿಸಿರುವ ಇಂಗ್ಲೆಂಡ್, ಇಂದಿನ ಪಂದ್ಯದಲ್ಲಿಯೂ ಗೆದ್ದು ಕ್ಲೀನ್​ ಸ್ವೀಪ್​ ಮಾಡಲು ಪಣತೊಟ್ಟಿದೆ. ಮತ್ತೊಂದೆಡೆ, 5ನೇ ಹಾಗೂ ಕೊನೆಯ ಟಿ20 ಪಂದ್ಯಕ್ಕೂ ಮುನ್ನ ಆಂಗ್ಲರ ತಂಡದ ನಾಯಕ ಹ್ಯಾರಿ ಬ್ರೂಕ್ ಕೆಲವು ಅಚ್ಚರಿ ಹೇಳಿಕೆಗಳನ್ನು ನೀಡಿದ್ದಾರೆ.

ಬ್ರಿಸ್ಟಲ್‌ನಲ್ಲಿ ನಡೆದ ನಾಲ್ಕನೇ ಟಿ20 ಪಂದ್ಯವನ್ನು 9 ವಿಕೆಟ್‌ಗಳಿಂದ ಗೆದ್ದು ಐದು ಪಂದ್ಯಗಳ ಸರಣಿಯನ್ನು ಒಂದು ಪಂದ್ಯ ಬಾಕಿ ಇರುವಾಗಲೇ 3-0 ಅಂತರದಿಂದ ಗೆದ್ದಿರುವ ಇಂಗ್ಲೆಂಡ್​, ಇಂದು ಸಂಜೆ 7 ಗಂಟೆಗೆ ಸೌತಾಂಪ್ಟನ್‌ನಲ್ಲಿ ನಡೆಯಲಿರುವ ಅಂತಿಮ ಪಂದ್ಯದಲ್ಲಿ ಭಾರತಕ್ಕೆ ಬಹುದಿನಗಳ ಬಳಿಕ ಕ್ಲೀನ್​ ಸ್ವೀಪ್​ ರುಚಿ ತೋರಿಸಲು ಸಜ್ಜಾಗಿದೆ. ಈ ಮೂಲಕ ಭಾರತವನ್ನು ಕೆಳಕ್ಕೆ ತಳ್ಳಿ ಅಂತಾರಾಷ್ಟ್ರೀಯ ಟಿ20 ಶ್ರೇಯಾಂಕದಲ್ಲಿ ನಂಬರ್ ಒನ್ ಸ್ಥಾನವನ್ನು ವಶಪಡಿಸಿಕೊಳ್ಳುವುದು ಇಂಗ್ಲೆಂಡ್​ನ ಗುರಿ ಎಂದು ಕ್ಯಾಪ್ಟನ್​ ಹೇಳಿದ್ದಾರೆ.

"ಮುಂದಿನ ಪಂದ್ಯ ಗೆದ್ದರೆ ನಾವು ವಿಶ್ವದ ನಂಬರ್ ಒನ್ ತಂಡ ಆಗುತ್ತೇವೆ ಎಂಬ ಸಂಗತಿ ನಮಗೆ ಗೊತ್ತಿದೆ. ಆ ಸ್ಥಾನವನ್ನು ಸಾಧಿಸಲು ನಮ್ಮ ಪಡೆ ಸನ್ನದ್ಧವಾಗಿದೆ. ಭಾರತ ಅತ್ಯಂತ ಬಲಿಷ್ಠ ತಂಡ. ಕಳೆದ ಎರಡು ವರ್ಷಗಳಿಗೆ ಹೋಲಿಸಿದರೆ ಅವರು ಪ್ರಸ್ತುತ ಉತ್ತಮ ಫಾರ್ಮ್‌ನಲ್ಲಿಲ್ಲದಿದ್ದರೂ, ಅವರ ವಿರುದ್ಧ ನಮ್ಮ ಪ್ಲ್ಯಾನ್​ಗಳನ್ನು ಸರಿಯಾಗಿ ಬಳಸಿದ್ದೇವೆ ಎಂಬ ಸಂತೋಷವಿದೆ. ಟೀಮ್ ಇಂಡಿಯಾ ಎದುರು ಸರಣಿಯನ್ನು 4-0 ಅಂತರದಿಂದ ಗೆಲ್ಲುವುದು ವಿಶೇಷವೇ ಎಂದಿದ್ದಾರೆ.