Virat Kohli: ತಮ್ಮ ಇಡೀ ವೃತ್ತಿಜೀವನದಲ್ಲಿ ಕ್ರಿಕೆಟ್ ದೇವರು ಸಚಿನ್ ತೆಂಡೂಲ್ಕರ್ ಅವರ ಹಲವಾರು ಮಹತ್ವದ ದಾಖಲೆಗಳನ್ನು ಮುರಿಯುತ್ತಾ ಬಂದಿರುವ ವಿರಾಟ್ ಕೊಹ್ಲಿ, ಶುಕ್ರವಾರ (ನವೆಂಬರ್ 13) ಬೇಡವಾಗಿದ್ದ ದಾಖಲೆಯೊಂದರಲ್ಲಿ ತೆಂಡೂಲ್ಕರ್ ಅವರನ್ನು ಸರಿಗಟ್ಟಿದ್ದಾರೆ. ನ್ಯೂಜಿಲೆಂಡ್‌ನ ಮೌಂಟ್ ಮೌಂಗನುಯಿಯ ಬೇ ಓವಲ್ ಮೈದಾನದಲ್ಲಿ ನಡೆದ ಏಕದಿನ ಪಂದ್ಯದಲ್ಲಿ ಟೀಮ್ ಇಂಡಿಯಾ ಆತಿಥೇಯ ನ್ಯೂಜಿಲೆಂಡ್ ವಿರುದ್ಧ 244 ರನ್‌ಗಳ ಬೃಹತ್ ಅಂತರದ ಹೀನಾಯ ಸೋಲು ಅನುಭವಿಸಿದೆ.
ಈ ಪಂದ್ಯವು ಭಾರತ ತಂಡಕ್ಕೆ ಮತ್ತು ವಿಶೇಷವಾಗಿ ವಿರಾಟ್ ಕೊಹ್ಲಿ ಅವರಿಗೆ ಮರೆಯಲಾಗದ ಕಹಿ ನೆನಪಾಗಿ ಉಳಿಯಲಿದ್ದು, ಕಿವೀಸ್ ವೇಗಿ ಮ್ಯಾಟ್ ಹೆನ್ರಿ ಮಾರಕ ಬೌಲಿಂಗ್ ದಾಳಿಗೆ ತತ್ತರಿಸಿದ ಟೀಮ್ ಇಂಡಿಯಾದ ಬ್ಯಾಟ್ಸ್ಮನ್ಗಳು ಪೆವಿಲಿಯನ್ ಪರೇಡ್ ನಡೆಸಿದರು. ಈ ವೇಳೆ ವಿರಾಟ್ ಕೊಹ್ಲಿ ಕೇವಲ 4 ಎಸೆತಗಳನ್ನು ಎದುರಿಸಿ ಶೂನ್ಯಕ್ಕೆ ಔಟಾಗುವ ಮೂಲಕ ಮತ್ತೊಮ್ಮೆ ನಿರಾಸೆ ಮೂಡಿಸಿದರು.
ಬೇ ಓವಲ್‌ನಲ್ಲಿ ಖಾತೆ ತೆರೆಯದೆ ಔಟಾಗುವ ಮೂಲಕ ಕೊಹ್ಲಿ ಏಕದಿನ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಒಟ್ಟು 20 ಬಾರಿ ಶೂನ್ಯಕ್ಕೆ ಔಟಾದಂತಾಯಿತು. ಈ ಮೂಲಕ ಏಕದಿನ ಕ್ರಿಕೆಟ್ ಇತಿಹಾಸದಲ್ಲಿ ಭಾರತದ ಪರ ಅತಿ ಹೆಚ್ಚು ಬಾರಿ ಶೂನ್ಯಕ್ಕೆ ಔಟಾದ ಬ್ಯಾಟರ್ ಎಂಬ ಸಚಿನ್ ತೆಂಡೂಲ್ಕರ್ (463 ಪಂದ್ಯ) ಅವರ ಬೇಡದ ದಾಖಲೆಯನ್ನು ಕೊಹ್ಲಿ (321 ಪಂದ್ಯ) ಸರಿಗಟ್ಟಿದ್ದಾರೆ.
ಈ ಪಟ್ಟಿಯಲ್ಲಿ ರಾಜ್ಯದವರೇ ಆದ ಮಾಜಿ ವೇಗಿ ಜಾವಗಲ್ ಶ್ರೀನಾಥ್ (229 ಪಂದ್ಯಗಳಲ್ಲಿ 19 ಡಕ್) ಮೂರನೇ ಸ್ಥಾನದಲ್ಲಿದ್ದಾರೆ. ನಂತರದ ಸ್ಥಾನಗಳಲ್ಲಿ ಮತ್ತೊಬ್ಬ ಕನ್ನಡಿಗ ಅನಿಲ್ ಕುಂಬ್ಳೆ (269 ಪಂದ್ಯಗಳಲ್ಲಿ 18 ಡಕ್) ಮತ್ತು ರೋಹಿತ್ ಶರ್ಮಾ (295 ಪಂದ್ಯಗಳಲ್ಲಿ 18 ಡಕ್) ಇದ್ದಾರೆ. ಕಾಕತಾಳೀಯವೆಂದರೆ, ಶುಕ್ರವಾರದ ಪಂದ್ಯದಲ್ಲಿ ನಾಯಕ ರೋಹಿತ್ ಶರ್ಮಾ ಕೂಡ ಮೊದಲ ಎಸೆತದಲ್ಲೇ ಔಟಾಗಿ ನಿರಾಸೆ ಮೂಡಿಸಿದರು.
ವಿರಾಟ್ ಕೊಹ್ಲಿ 20 (321 ಪಂದ್ಯ)
ಸಚಿನ್ ತೆಂಡೂಲ್ಕರ್ 20 (463 ಪಂದ್ಯ)
ಜಾವಗಲ್ ಶ್ರೀನಾಥ್ 19 (229 ಪಂದ್ಯ)
ಅನಿಲ್ ಕುಂಬ್ಳೆ 18 (269 ಪಂದ್ಯ)
ರೋಹಿತ್ ಶರ್ಮಾ 18 (295 ಪಂದ್ಯ)
ರೋಹಿತ್ ಶರ್ಮಾ ಔಟಾದ ಬೆನ್ನಲ್ಲೇ ಕ್ರೀಸ್‌ಗೆ ಆಗಮಿಸಿದ ವಿರಾಟ್ ಕೊಹ್ಲಿಯನ್ನು ಕಟ್ಟಿಹಾಕಲು ಕಿವೀಸ್ ವೇಗಿ ಮ್ಯಾಟ್ ಹೆನ್ರಿ ಸ್ಪಷ್ಟ ಯೋಜನೆಯೊಂದಿಗೆ ಬೌಲಿಂಗ್ ಮಾಡಿದರು. ಮೊದಲ ಎಸೆತವನ್ನು ಆಫ್-ಸ್ಟಂಪ್‌ನಿಂದ ಹೊರಗೆ ಸ್ವಿಂಗ್ (ಔಟ್‌ಸ್ವಿಂಗರ್) ಮಾಡುವ ಮೂಲಕ ಕೊಹ್ಲಿ ಬ್ಯಾಟ್‌ಗೆ ವಂಚಿಸಿದರು. ಎರಡನೇ ಎಸೆತದಲ್ಲಿ ದಿಕ್ಕನ್ನು ಬದಲಿಸಿ ಮಿಡಲ್ ಸ್ಟಂಪ್‌ನತ್ತ ಚೆಂಡನ್ನು ಒಳನುಗ್ಗಿಸಿದರು. ಮೂರನೇ ಎಸೆತವನ್ನು ಮತ್ತೆ ಆಫ್-ಸ್ಟಂಪ್‌ನ ಹೊರಗೆ ಎಸೆದಾಗ, ಕೊಹ್ಲಿ ಅದನ್ನು ಬ್ಯಾಕ್‌ವರ್ಡ್ ಪಾಯಿಂಟ್ ಕಡೆಗೆ ತಳ್ಳಿದರು.
ನಾಲ್ಕನೇ ಎಸೆತವೂ ಸಹ ಹೊರಗೆ ಸ್ವಿಂಗ್ ಆಗಬಹುದು ಎಂದು ಕೊಹ್ಲಿ ನಿರೀಕ್ಷಿಸಿದ್ದರು. ಆದರೆ, ಮ್ಯಾಟ್ ಹೆನ್ರಿ ತಮ್ಮ ಬತ್ತಳಿಕೆಯಲ್ಲಿದ್ದ ಮತ್ತೊಂದು ಅಸ್ತ್ರವನ್ನು ಪ್ರಯೋಗಿಸಿದರು. ಗುಡ್-ಲೆಂತ್‌ನಲ್ಲಿ ಬಿದ್ದ ಚೆಂಡು ಅನಿರೀಕ್ಷಿತ ವೇಗದಲ್ಲಿ ಒಳಗಡೆ ಬಂತು. ಚೆಂಡಿನ ಈ ದಿಢೀರ್ ಚಲನೆಯನ್ನು ಅಂದಾಜಿಸುವಲ್ಲಿ ವಿಫಲರಾದ ರನ್ ಮಷಿನ್ ಬೌಲ್ಡ್ ಆದರು.
ಭಾನುವಾರ ನಡೆಯಲಿರುವ ಸರಣಿಯ ಅಂತಿಮ ಏಕದಿನ ಪಂದ್ಯದಲ್ಲಿ ಗೆಲುವು ಸಾಧಿಸಿ 3-1 ಅಂತರದಲ್ಲಿ ಸರಣಿ ವಶಪಡಿಸಿಕೊಳ್ಳುವ ಗುರಿಯನ್ನು ಭಾರತ ಹೊಂದಿದೆ. ಈ ನಿರ್ಣಾಯಕ ಪಂದ್ಯಕ್ಕೂ ಮುನ್ನ ಟೀಮ್ ಇಂಡಿಯಾ ಆಟಗಾರರು ಯಾವು ಎಲ್ಲಿ ಎಡವಿದ್ದೇವೆ ಎನ್ನುವುದನ್ನು ಅರಿತುಕೊಂಡು ಲಯಕ್ಕೆ ಮರಳಬೇಕಾದ ಅನಿವಾರ್ಯತೆಯಿದ್ದು, ತಂಡದ ಗೆಲುವಿನಲ್ಲಿ ಹಿರಿಯ ಬ್ಯಾಟ್ಸ್ಮನ್ಗಳ ಫಾರ್ಮ್ ಅತ್ಯಂತ ನಿರ್ಣಾಯಕವಾಗಲಿದೆ(ಏಜೆನ್ಸೀಸ್).