ಅಂಡರ್​-19 ವಿಶ್ವಕಪ್​: ಬಾಂಗ್ಲಾ ವಿರುದ್ಧ ಭಾರತಕ್ಕೆ 18ರನ್​ಗಳ ರೋಚಕ ಜಯ; ತಂಡದ ಪರ ಮಿಂಚಿದ ಈ ವಿಹಾನ್​ ಯಾರು? ​ ​

ಜಿಂಬಾಬ್ವೆ: ಪ್ರಸಕ್ತ ನಡೆಯುತ್ತಿರುವ ಅಂಡರ್-19 ವಿಶ್ವಕಪ್‌ ಟೂರ್ನಿಯಲ್ಲಿ ಭಾರತ ಸತತ ಎರಡನೇ ಗೆಲುವು ದಾಖಲಿಸಿದೆ. ಶನಿವಾರ (ಜ.17) ನಡೆದ ಬಾಂಗ್ಲಾದೇಶ ವಿರುದ್ಧದ ಪಂದ್ಯದಲ್ಲಿ ಟೀಮ್ ಇಂಡಿಯಾ 18 ರನ್​ಗಳ ರೋಚಕ ಜಯ ಸಾಧಿಸಿತು. ಅಂತಿಮವಾಗಿ ಡಿಎಲ್ಎಸ್ ವಿಧಾನದಲ್ಲಿ ಯುವ ಆಟಗಾರರ ತಂಡ ಗೆದ್ದಿದ್ದು ಗಮನಾರ್ಹ.

ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಭಾರತಕ್ಕೆ ಮಳೆಯ ಅಡಚಣೆ ಎದುರಾಯಿತು. ಹೀಗಾಗಿ, ಪಂದ್ಯವನ್ನು 49 ಓವರ್‌ಗಳಿಗೆ ಇಳಿಸಲಾಯಿತು. ಇದರ ಪರಿಣಾಮವಾಗಿ, ಭಾರತ 48.4 ಓವರ್‌ಗಳಲ್ಲಿ 238 ರನ್‌ಗೆ ಆಲೌಟ್ ಆಯಿತು. ಮೊದಲ ಇನ್ನಿಂಗ್ಸ್​ನಲ್ಲಿ ತಂಡದ ಪರ ಅಭಿಗ್ಯಾನ್ ಕುಂದು (112 ಎಸೆತ, 80 ರನ್​) ಮತ್ತು ವೈಭವ್ ಸೂರ್ಯವಂಶಿ (67 ಎಸೆತ, 72 ರನ್‌) ಅದ್ಭುತ ಬ್ಯಾಟಿಂಗ್ ಪ್ರದರ್ಶನ ನೀಡಿದರು.

ಟೀಮ್ ಇಂಡಿಯಾ ನೀಡಿದ ಗುರಿಯನ್ನು ಬೆನ್ನತ್ತಿದ ಬಾಂಗ್ಲಾ ಪಡೆ, 17.2 ಓವರ್‌ಗಳಲ್ಲಿ 88/2 ರನ್ ಗಳಿಸಿದಾಗ ಮಳೆ ಅಡ್ಡಿಪಡಿಸಿತು. ಈ ಹಿನ್ನೆಲೆ ಪಂದ್ಯವನ್ನು ಡಿಎಲ್​ಎಸ್​ ಮಾದರಿ ಅನುಸರಿಸುವ ಮೂಲಕ 29 ಓವರ್‌ಗಳಲ್ಲಿ 165 ರನ್‌ಗಳ ಗುರಿಯನ್ನು ನೀಡಲಾಯಿತು. ವಿರಾಮದ ಬಳಿಕ ಆಡಿದ ಬಾಂಗ್ಲಾದೇಶಕ್ಕೆ ಗೆಲ್ಲಲು 70 ಎಸೆತಗಳಲ್ಲಿ 75 ರನ್‌ಗಳ ಅಗತ್ಯವಿತ್ತು. ಈ ವೇಳೆ ಬಾಂಗ್ಲಾ ಗೆಲುವಿಗೆ ಹತ್ತಿರವಾಗುತ್ತಿದೆ ಎಂಬುದನ್ನು ಅರಿತ ವಿಹಾನ್ ಮಲ್ಹೋತ್ರಾ, ಮಾಡಿದ ನಾಲ್ಕು ಓವರ್‌ಗಳಲ್ಲಿ ಕೇವಲ 14 ರನ್‌ ಕೊಟ್ಟು 4 ವಿಕೆಟ್‌ ಕಬಳಿಸಿದರು. ಈ ಮೂಲಕ ಬಾಂಗ್ಲಾ ಬ್ಯಾಟರ್​ಗಳಿಗೆ ರನ್​ ಗಳಿಸದಂತೆ ಕಟ್ಟಿಹಾಕಿದರು.

26ನೇ ಓವರ್‌ನ ಎರಡನೇ ಎಸೆತದಲ್ಲಿ, ಸಮಿಯುನ್ ಬಶೀರ್ ಬಿರುಸಿನ ಹೊಡೆತಕ್ಕೆ ಮುಂದಾದರು. ತಕ್ಷಣವೇ ಕ್ಯಾಚ್​ ಪಡೆಯಲು ಬೌಂಡರಿ ಲೈನ್​ನತ್ತ ಓಡಿದ ವೈಭವ್ ಸೂರ್ಯವಂಶಿ, ಅದ್ಭುತ ಕ್ಯಾಚ್ ಹಿಡಿದದ್ದು ಹಲವರ ಗಮನ ಸೆಳೆಯಿತು. ಇದು ಬೇಬಿ ಬಾಸ್​ ಮೇಲಿನ ನಿರೀಕ್ಷೆ ಹಾಗೂ ಭರವಸೆಗಳನ್ನು ದುಪ್ಪಟ್ಟಾಗಿಸಿದೆ.

ಬ್ಯಾಟಿಂಗ್​ನಲ್ಲಿ ತಂಡದ ಪರ ಉತ್ತಮ ಪ್ರದರ್ಶನ ನೀಡ ವಿಹಾನ್​ ಮಲ್ಹೋತ್ರಾ, ಕೇವಲ 7 (24 ಎಸೆತ) ರನ್ ಗಳಿಸಿದರು. ಆದರೆ, ಅದೇ ಬಾಂಗ್ಲಾ ಬ್ಯಾಟಿಂಗ್​ಗಿಳಿದಾಗ ತಮ್ಮ ಬೌಲಿಂಗ್​ನಲ್ಲಿ ಕಮಾಲ್​ ಮಾಡಿದರು. 14 ರನ್​ ಕೊಟ್ಟ 4 ವಿಕೆಟ್​ ಕಬಳಿಸುವ ಮೂಲಕ ಎಲ್ಲರ ಗಮನವನ್ನು ತಮ್ಮತ್ತ ಸೆಳೆದರು. ಈ ಮೂಲಕ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು.

ಮೂಲತಃ ಪಟಿಯಾಲದ ಮಲ್ಹೋತ್ರಾ, 19 ವರ್ಷದ ಎಡಗೈ ಬ್ಯಾಟ್ಸ್‌ಮನ್. ಭಾರತದ ಅಂಡರ್​-19 ತಂಡಕ್ಕೆ ಈತ ಉಪನಾಯಕ. ಅವರು ಇಂಗ್ಲೆಂಡ್ ಮತ್ತು ಆಸ್ಟ್ರೇಲಿಯಾದ ಗ್ರೂಪ್​ ಮ್ಯಾಚ್​ಗಳಲ್ಲಿ ತಂಡದ ಪರ ಆಡಿದ್ದಾರೆ, ಯುಎಇಯಲ್ಲಿ ನಡೆದ U-19 ಏಷ್ಯಾಕಪ್ ಮತ್ತು ಕಳೆದ ವರ್ಷ ಭಾರತದಲ್ಲಿ ನಡೆದ 50 ಓವರ್‌ಗಳ ತ್ರಿಕೋನ ಸರಣಿಯಲ್ಲಿ ತಂಡದ ಭಾಗವಾಗಿದ್ದರು.

ವಿಹಾನ್​ ಟಾಪ್​ ಮತ್ತು ಮಧ್ಯಮ ಕ್ರಮಾಂಕದಲ್ಲಿ ಆಡುವ ವಿಶಿಷ್ಟ ಬ್ಯಾಟರ್. ಈ ಎರಡು ಆರ್ಡರ್​​ಗಳಲ್ಲಿಯೂ ಅವರು ಉತ್ತಮವಾಗಿ ಆಡಿದ್ದಾರೆ. ಈ ಬಾರಿ ಕೆಳ ಕ್ರಮಾಂಕದಲ್ಲಿ ಆಡುತ್ತಿರುವ ವಿಹಾನ್, ವೈಭವ್ ಸೂರ್ಯವಂಶಿ ಮತ್ತು ಆಯುಷ್ ಮಾತ್ರೆಗೆ ಓಪನಿಂಗ್ ಬ್ಯಾಟ್ಸ್​ಮನ್​ ಸ್ಥಾನವನ್ನು ಬಿಟ್ಟುಕೊಟ್ಟಿದ್ದಾರೆ. ಬ್ಯಾಟಿಂಗ್ ಮತ್ತು ಬೌಲಿಂಗ್​ನಲ್ಲಿ ಕಮಾಲ್ ಮಾಡುವ ಸಾಮರ್ಥ್ಯವನ್ನು ಹೊಂದಿರುವುದು ವಿಶೇಷ(ಏಜೆನ್ಸೀಸ್).