ಈ 3 ತಂಡ ಪ್ಲೇಆಫ್​ಗೆ ಫಿಕ್ಸ್​! ಯಾರ ಪಾಲಾಗಲಿದೆ ಐಪಿಎಲ್​ 19ನೇ ಆವೃತ್ತಿಯ ಟೈಟಲ್? ಫ್ಯಾನ್ಸ್​ಗೆ ಹೆಚ್ಚಿದ ಕೌತುಕ ​

IPL 2026: ಮಾ.28ರಿಂದ ಆರಂಭಗೊಂಡ ಐಪಿಎಲ್​ 19ನೇ ಆವೃತ್ತಿಯ ಬಹುತೇಕ ಪಂದ್ಯಗಳು ಕ್ರಿಕೆಟ್​ ಪ್ರಿಯರ ಕ್ರೇಜ್​ ಅನ್ನು ಡಬಲ್ ಮಾಡಿದೆ. ಕೊನೆಯ ಓವರ್​ವರೆಗೂ ತಲುಪಿ, ನೋಡುಗರನ್ನು ಸೀಟಿನಂಚಿನಲ್ಲಿ ಕೂರಿಸುತ್ತಿರುವ ಮ್ಯಾಚ್​ಗಳು ರೋಚಕ ಜಯಕ್ಕೆ ಕಾರಣವಾಗುತ್ತಿವೆ. ಈಗಾಗಲೇ ಮೂರರಿಂದ ನಾಲ್ಕು ಪಂದ್ಯಗಳನ್ನು ಆಡಿರುವ ತಂಡಗಳು, ಖಚಿತವಾಗಿ ತಮ್ಮ ಟೀಮ್​ ಪ್ಲೇಆಫ್​ಗೆ ಎಂಟ್ರಿಕೊಡಲಿದೆ, 2026ರ ಟ್ರೋಫಿ ಗೆಲ್ಲಲಿದೆ ಎಂಬ ಸುಳಿವನ್ನು ನೀಡಿದೆ.

ಹಾಲಿ ಚಾಂಪಿಯನ್ ರಾಯಲ್ ಚಾಲೆಂಜರ್ಸ್ ಬೆಂಗಳೂರು, ಕಳೆದ ವರ್ಷ ರನ್ನರ್​ಅಪ್ ಪಂಜಾಬ್ ಕಿಂಗ್ಸ್ ಮತ್ತು ಐಪಿಎಲ್​ ಮೊದಲ ಆವೃತ್ತಿಯ ವಿಜೇತ ರಾಜಸ್ಥಾನ ರಾಯಲ್ಸ್ ತಂಡಗಳು. ಈ ಮೂರು ಟೀಮ್​ಗಳಲ್ಲಿ, ಆರ್​ಆರ್​ ಮತ್ತು ಪಂಜಾಬ್​ ಕಿಂಗ್ಸ್​ ಇನ್ನೂ ಒಂದು ಪಂದ್ಯವನ್ನು ಸೋತಿಲ್ಲ. ಆದರೆ, ಆರ್​ಸಿಬಿ ಆಡಿರುವ ನಾಲ್ಕು ಪಂದ್ಯಗಳಲ್ಲಿ ರಾಜಸ್ಥಾನ ಎದುರು ಸೋತಿದ್ದು ಬಿಟ್ಟರೆ, ಉಳಿದ ಮೂರರಲ್ಲೂ ಗೆಲುವು ಸಾಧಿಸಿದೆ.

ಐಪಿಎಲ್​ ಅಂಕಪಟ್ಟಿಯಲ್ಲಿ ಅಗ್ರ 3 ಸ್ಥಾನದಲ್ಲಿ ಈ ತಂಡಗಳಿದ್ದು, ಉತ್ತಮ ಆಲ್​ರೌಂಡ್​ ಪ್ರದರ್ಶನ ನೀಡುತ್ತಿರುವುದು ಗಮನಾರ್ಹ. ರಾಜಸ್ಥಾನ ರಾಯಲ್ಸ್​ಗೆ ಬೌಲಿಂಗ್​ಗಿಂತ ಬ್ಯಾಟಿಂಗ್ ಯೂನಿಟ್​ ಗಟ್ಟಿಯಾಗಿದೆ. ಅದರಲ್ಲೂ ಟಾಪ್​ ಆರ್ಡರ್​ ಅಲುಗಾಡದಂತಿದೆ. ವೈಭವ್ ಸೂರ್ಯವಂಶಿ ಮತ್ತು ಯಶಸ್ವಿ ಜೈಸ್ವಾಲ್​ ಜೋಡಿಯಿಂದ ಉತ್ತಮ ಓಪನಿಂಗ್ ಪ್ರದರ್ಶನ ಬರುತ್ತಿದೆ. ಶ್ರೇಯಸ್​ ಅಯ್ಯರ್​ ನಾಯಕತ್ವದ ಪಂಜಾಬ್​ನ ಬ್ಯಾಟಿಂಗ್​ ಹಾಗೂ ಬೌಲಿಂಗ್​​ ಕೂಡ ಉತ್ತಮವಾಗಿದೆ. ಇನ್ನು ಆರ್​ಸಿಬಿ ಬಗ್ಗೆ ಹೆಚ್ಚೇನು ಹೇಳುವುದೇ ಬೇಡ.

8ನೇ ಕ್ರಮಾಂಕದವರೆಗೆ ಬಲಿಷ್ಠ ಬ್ಯಾಟಿಂಗ್ ಲೈನ್​ಅಪ್ ಹೊಂದಿರುವ ರಾಯಲ್​ ಚಾಲೆಂಜರ್ಸ್ ಬೆಂಗಳೂರು ತಂಡಕ್ಕೆ ಬೌಲಿಂಗ್​ ಯೂನಿಟ್​ ಸಹ ಅಷ್ಟೇ ಬಲಿಷ್ಠವಾಗಿದೆ. ಒಬ್ಬರಿಗಿಂತ ಒಬ್ಬರು ಅದ್ಭುತ ಪ್ರದರ್ಶನ ನೀಡುವವರೇ ಇದ್ದಾರೆ. ಜೊತೆಗೆ ಕ್ಯಾಪ್ಟನ್​ ಆಟವನ್ನು ಮತ್ತು ಜವಾಬ್ದಾರಿಯನ್ನು ಉತ್ತಮವಾಗಿ ನಿರ್ವಹಿಸುತ್ತಿರುವ ರಜತ್​, ತಮ್ಮ ತಂಡ ಈ ಬಾರಿಯೂ ಟ್ರೋಫಿ ಎತ್ತಿಹಿಡಿಯಲಿದೆ ಎಂಬ ಮುನ್ಸೂಚನೆಯನ್ನು ನೀಡಿರುವುದು ಗಮನಾರ್ಹ,(ಏಜೆನ್ಸೀಸ್).