ಯಾರೀ ಮ್ಯಾಥ್ಯೂವ್ ಹೊಲ್ಲಾರ್ಡ್​?​ ಪಾದಾರ್ಪಣೆ ಪಂದ್ಯದಲ್ಲೇ ಟೀಮ್ ಇಂಡಿಯಾಗೆ ಶಾಕ್​ ನೀಡಿದ ಐರ್ಲೆಂಡ್​ ವೇಗಿ

IND vs IRE: ನಿನ್ನೆ (ಜೂ.26) ಬೆಲ್​ಫಾಸ್ಟ್​ನಲ್ಲಿ ನಡೆದ ಐರ್ಲೆಂಡ್​ ಮತ್ತು ಭಾರತ ನಡುವಿನ ಮೊದಲ ಟಿ20 ಪಂದ್ಯದಲ್ಲಿ ಟೀಮ್ ಇಂಡಿಯಾ ಹೀನಾಯ ಸೋಲು ಅನುಭವಿಸಿತು. 34 ರನ್​ಗಳಿಂದ ಭಾರಿ ಮುಖಭಂಗಕ್ಕೆ ಒಳಗಾದ ಶ್ರೇಯಸ್​ ಅಯ್ಯರ್​ ಪಡೆಗೆ ಸೋಲುಣಿಸಿದ್ದೇ ಐರ್ಲೆಂಡ್​ನ ಈ ಸ್ಟಾರ್​ ಬೌಲರ್​.

ಟೀಮ್ ಇಂಡಿಯಾ ವಿರುದ್ಧದ ಪಾದಾರ್ಪಣೆ ಟಿ20 ಪಂದ್ಯದಲ್ಲಿ ಮೂರು ಮುಖ್ಯ ವಿಕೆಟ್​ ಕಬಳಿಸುವ ಮೂಲಕ ಮ್ಯಾಥ್ಯೂ ಹೊಲ್ಲಾರ್ಡ್ ತಂಡದ ಪರ ಮಿಂಚಿದರು. ತಮ್ಮ ಚೊಚ್ಚಲ ಮ್ಯಾಚ್​ನಲ್ಲೇ ಕ್ರಿಕೆಟ್​ ಪ್ರೇಮಿಗಳ ಗಮನ ಸೆಳೆದ ಈತ, ಐರ್ಲೆಂಡ್​​ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು. ಮೊದಲ ಪಂದ್ಯದಲ್ಲೇ ಪಂದ್ಯಶ್ರೇಷ್ಠ ಪ್ರಶಸ್ತಿಯನ್ನು ಗೆದ್ದ ಮ್ಯಾಥ್ಯೂ, ತಮ್ಮ ವೃತ್ತಿಜೀವನಕ್ಕೆ ಅದ್ಭುತ ಅಡಿಪಾಯವನ್ನು ಹಾಕಿಕೊಂಡಿದ್ದಾರೆ.

ಇಶಾನ್ ಕಿಶನ್, ಶ್ರೇಯಸ್ ಅಯ್ಯರ್ ಅವರಂತಹ ಸ್ಟಾರ್​ ಬ್ಯಾಟ್ಸ್​ಮನ್​ಗಳ ವಿಕೆಟ್​ಗಳನ್ನು ಮ್ಯಾಥ್ಯೂ ಕಿತ್ತು ಸಂಭ್ರಮಿಸಿದರು. ಇದೇ ಪಂದ್ಯದಲ್ಲಿ ಭಾರತೀಯ ಮೂಲದ ಬೌಲರ್ ಜೇ ಮುಂಧ್ರಾ ಕೂಡ ತಮ್ಮ ಮೊದಲ ಅಂತಾರಾಷ್ಟ್ರೀಯ ಪಂದ್ಯದ ಮೊದಲ ಎಸೆತದಲ್ಲೇ ಸಂಜು ಸ್ಯಾಮ್ಸನ್ ಅವರ ವಿಕೆಟ್ ಪಡೆದರು. ಈ ಇಬ್ಬರು ಯುವ ಬೌಲರ್‌ಗಳು ಭಾರತದ ಅಗ್ರ ಕ್ರಮಾಂಕವನ್ನು ಸುಲಭವಾಗಿ ಕೆಡವಿದರು. 183 ರನ್‌ಗಳ ಗುರಿಯನ್ನು ಬೆನ್ನತ್ತಿದ ಶ್ರೇಯಸ್​ ಪಡೆ ಕೇವಲ 148 ರನ್‌ಗೆ ಆಲೌಟ್ ಆಯಿತು.

ಏಪ್ರಿಲ್ 14, 1999ರಂದು ಜನಿಸಿದ ಮ್ಯಾಥ್ಯೂ ಹೊಲ್ಲಾರ್ಡ್, ದೇಶೀಯ ಕ್ರಿಕೆಟ್‌ನಲ್ಲಿಯೂ ಉತ್ತಮ ದಾಖಲೆಯನ್ನು ಹೊಂದಿದ್ದಾರೆ. ಇಲ್ಲಿಯವರೆಗೆ, ಅವರು 15 ಟಿ20 ಪಂದ್ಯಗಳಲ್ಲಿ 20 ವಿಕೆಟ್‌, ಐದು ಪ್ರಥಮ ದರ್ಜೆ ಪಂದ್ಯಗಳಲ್ಲಿ 9 ವಿಕೆಟ್‌ ಮತ್ತು ನಾಲ್ಕು ಲಿಸ್ಟ್-ಎ ಪಂದ್ಯಗಳಲ್ಲಿ 12 ವಿಕೆಟ್‌ಗಳನ್ನು ಕಬಳಿಸಿದ್ದಾರೆ. ಲೀನ್‌ಸ್ಟರ್ ಲೈಟ್ನಿಂಗ್ ಮತ್ತು ಸ್ಟ್ರೈಕರ್ಸ್‌ನಂತಹ ತಂಡಗಳನ್ನು ಪ್ರತಿನಿಧಿಸಿರುವ ಹೊಲ್ಲಾರ್ಡ್, ಭಾರತದ ವಿರುದ್ಧ ಅದ್ಭುತ ಪ್ರದರ್ಶನ ನೀಡುವ ಮೂಲಕ ಐರ್ಲೆಂಡ್‌ನ ಭವಿಷ್ಯದ ಸ್ಟಾರ್ ಬೌಲರ್ ಎಂದು ಗುರುತಿಸಿಕೊಂಡಿದ್ದಾರೆ.

ಭಾರತೀಯ ಬ್ಯಾಟರ್​ಗಳನ್ನು ಬ್ಯಾಕ್​ ಟು ಬ್ಯಾಕ್​ ಔಟ್​ ಮಾಡಿ, ತನ್ನ ಆತ್ಮವಿಶ್ವಾಸವನ್ನೂ ಪ್ರದರ್ಶಿಸಿದ ಮ್ಯಾಥ್ಯೂ, ಇಡೀ ಪಂದ್ಯದ ದಿಕ್ಕನ್ನೇ ಸಂಪೂರ್ಣವಾಗಿ ಬದಲಾಯಿಸಿದರು ಎಂದರೆ ತಪ್ಪಾಗಲಾರದು. ಮೂರು ವಿಕೆಟ್​ಗಳನ್ನು ಪಡೆದು ತಂಡದ ಗೆಲುವಿಗೆ ಕಾರಣರಾದ ಹೊಲ್ಲಾರ್ಡ್​, ಭಾನುವಾರ ನಡೆಯಲಿರುವ ಎರಡನೇ ಪಂದ್ಯದಲ್ಲಿ ಭಾರತ ವಿರುದ್ಧ ಇದೇ ರೀತಿಯ ಅದ್ಭುತ ಪ್ರದರ್ಶನ ನೀಡಲಿದ್ದಾರಾ? ಎಂಬುದನ್ನು ಸದ್ಯ ಕಾದು ನೋಡಬೇಕಿದೆ,(ಏಜೆನ್ಸೀಸ್).