ಇಶಾನ್ ಬೆಸ್ಟ್ ಇನಿಂಗ್ಸ್: ಸನ್ರೈಸರ್ಸ್ ಸಹಾಯಕ ಕೋಚ್ ಫ್ರಾಂಕ್ಲಿನ್ ಪ್ರಶಂಸೆ
ಚೆನ್ನೈ: ಸಿಎಸ್ಕೆ ವಿರುದ್ಧ 181 ರನ್ಗಳ ಸ್ಪರ್ಧಾತ್ಮಕ ಮೊತ್ತದ ಚೇಸಿಂಗ್ ವೇಳೆ 70 ರನ್ (47 ಎಸೆತ, 7 ಬೌಂಡರಿ, 3 ಸಿಕ್ಸರ್) ಸಿಡಿಸಿ ಗೆಲುವಿನ ರೂವಾರಿಯಾಗಿ ಹೊರಹೊಮ್ಮಿದ ವಿಕೆಟ್ ಕೀಪರ್-ಬ್ಯಾಟರ್ ಇಶಾನ್ ಕಿಶನ್ (Ishan Kishan) ಅವರನ್ನು ಸನ್ರೈಸರ್ಸ್ ತಂಡದ ಸಹಾಯಕ ಕೋಚ್ ಜೇಮ್ಸ್ ಫ್ರಾಂಕ್ಲಿನ್ ಶ್ಲಾಘಿಸಿದ್ದಾರೆ. "ಇದು ಹಾಲಿ ಆವೃತ್ತಿಯಲ್ಲಿ ಇಶಾನ್ ಕಿಶನ್ ಆಡಿದ ಬೆಸ್ಟ್ ಇನಿಂಗ್ಸ್' ಎಂದವರು ಬಣ್ಣಿಸಿದ್ದಾರೆ.
"ಇಶಾನ್ ಕಿಶನ್ ಇತ್ತೀಚೆಗೆ ಭಾರತ ಪರ ಅತ್ಯುತ್ತಮ ಆಟವಾಡಿದ್ದಾರೆ. ಅದೇ ಲಯವನ್ನು ಅವರು ಐಪಿಎಲ್ಗೂ ತಂದಿದ್ದಾರೆ. ಅವರ ಈ ಇನಿಂಗ್ಸ್ ಅತ್ಯಂತ ಪಕ್ವತೆಯಿಂದ ಕೂಡಿತ್ತು. ಅವರು ಪರಿಸ್ಥಿತಿಯನ್ನು ಚೆನ್ನಾಗಿ ಅರ್ಥಮಾಡಿಕೊಂಡು ಅದರಂತೆ ಆಡಿದರು' ಎಂದು ಫ್ರಾಂಕ್ಲಿನ್ ಸನ್ರೈಸರ್ಸ್ ತಂಡದ 5 ವಿಕೆಟ್ ಗೆಲುವಿನ ಬಳಿಕ ಹೇಳಿದರು.
ಇಂಪ್ಯಾಕ್ಟ್ ಪ್ಲೇಯರ್ ಟ್ರಾವಿಸ್ ಹೆಡ್ (6) ಬೇಗನೆ ಔಟಾದರೆ, ಅಭಿಷೇಕ್ ಶರ್ಮ (26) ಕೂಡ ಹೆಚ್ಚು ಸಮಯ ನಿಲ್ಲಲಿಲ್ಲ. ಆಗ ಇಶಾನ್ ಕಿಶನ್ 3ನೇ ವಿಕೆಟ್ಗೆ ಹೆನ್ರಿಕ್ ಕ್ಲಾಸೆನ್ (47) ಜತೆ 41 ಎಸೆತಗಳಲ್ಲಿ 75 ರನ್ ಸೇರಿಸಿ ಚೇಸಿಂಗ್ಗೆ ಬಲ ತುಂಬಿದರು. ಗೆಲುವಿಗೆ ಕೇವಲ 6 ರನ್ ಬೇಕಿದ್ದಾಗ ಕಿಶನ್ ಔಟಾದರು. ಕೊನೆಗೆ 4 ರನ್ ಬೇಕಿದ್ದಾಗ ಕನ್ನಡಿಗ ಆರ್. ಸ್ಮರಣ್ (5) ಬೌಂಡರಿ ಬಾರಿಸಿ, ಇನ್ನೂ ಒಂದು ಓವರ್ ಬಾಕಿ ಇರುವಂತೆಯೇ ಸನ್ರೈಸರ್ಸ್ ಗೆಲ್ಲಿಸಿದರು. ಇದರೊಂದಿಗೆ ಸನ್ರೈಸರ್ಸ್ ಮಾತ್ರವಲ್ಲದೆ, ಗುಜರಾತ್ ಟೈಟಾನ್ಸ್ಗೂ ಪ್ಲೇಆಫ್ ಟಿಕೆಟ್ ಖಚಿತವಾಯಿತು.