ನಮಗೂ ಅದೇ ಗತಿ... ಟೀಮ್​ ಇಂಡಿಯಾ ಆಟಗಾರರಲ್ಲಿ ಈ ಭಯ ಶುರುವಾಗಿದೆ! ಆರ್​. ಅಶ್ವಿನ್​ ಓಪನ್​ ಟಾಕ್​

Team India Players: ಪ್ರಸಕ್ತ ಆಂಗ್ಲರ ನಾಡಿನಲ್ಲಿ ನಡೆಯುತ್ತಿರುವ ಐದು ಪಂದ್ಯಗಳ ಟಿ20 ಸರಣಿಯಲ್ಲಿ ಎರಡು ಪಂದ್ಯಗಳು ಈಗಾಗಲೇ ಮುಕ್ತಾಯಗೊಂಡಿದ್ದು, 1-0 ಅಂತರದಲ್ಲಿ ಇಂಗ್ಲೆಂಡ್​ ಮುನ್ನಡೆ ಕಾಯ್ದುಕೊಂಡಿದೆ. ಶ್ರೇಯಸ್​ ಅಯ್ಯರ್​ ನಾಯಕತ್ವದಲ್ಲಿ ಸೋಲಿನ ಬದಲು ಹೀನಾಯ ಸೋಲು ಮತ್ತು ಅತ್ಯಂತ ಕಳಪೆ ಪ್ರದರ್ಶನ ತೋರುತ್ತಿರುವ ಟೀಮ್ ಇಂಡಿಯಾ ಆಟಗಾರರ ಕುರಿತು ಮಾಜಿ ಕ್ರಿಕೆಟಿಗ ಆರ್​. ಅಶ್ವಿನ್​ ಅಚ್ಚರಿ ಹೇಳಿಕೆ ನೀಡಿದ್ದಾರೆ.  

ಕ್ರೀಡಾ ಪತ್ರಕರ್ತ ವಿಮಲ್ ಕುಮಾರ್ ಜತೆಗೆ ತಮ್ಮ ಯೂಟ್ಯೂಬ್ ಚಾನೆಲ್‌ನಲ್ಲಿ ಮಾತನಾಡಿದ ರವಿಚಂದ್ರನ್​ ಅಶ್ವಿನ್, ಟೀಮ್​ ಮ್ಯಾನೇಜ್​ಮೆಂಟ್​ನ ಮನೋಭಾವನೆ ನನಗೆ ಸ್ವಲ್ಪವು ಇಷ್ಟವಾಗುತ್ತಿಲ್ಲ. ಟಿ20 ವಿಶ್ವಕಪ್​ ಗೆದ್ದ ಕೂಡಲೇ ಸಂಜು ಸ್ಯಾಮ್ಸನ್ ಮತ್ತು ಸೂರ್ಯ ಕುಮಾರ್ ಯಾದವ್ ಅವರನ್ನು ತಂಡದಿಂದ ಕೈಬಿಟ್ಟಿದ್ದಾರೆ. ಈ ನಿರ್ಧಾರವು ತಂಡದ ಉಳಿದವರಲ್ಲಿ, ನಾಳೆ ನಮಗೂ ಇದೇ ಪರಿಸ್ಥಿತಿ ಎಂಬ ಭಯವನ್ನು ಹುಟ್ಟುಹಾಕಿದೆ ಎಂದರು.  

ಆಟಗಾರರನ್ನು ಮ್ಯೂಸಿಕಲ್​ ಚೇರ್ಸ್​ ಆಟದಂತೆ ಇಷ್ಟಬಂದಾಗ ಹಾಕುವುದು, ಬಿಡುವುದು ಡ್ರೆಸ್ಸಿಂಗ್ ರೂಮ್​ನ ವಾತಾವರಣವನ್ನು ಡ್ಯಾಮೇಜ್​ ಮಾಡುತ್ತದೆ. ವಿಶ್ವಕಪ್ ಗೆಲ್ಲಿಸಿಕೊಟ್ಟ ಸಂಜು ಮತ್ತು ಸೂರ್ಯಕುಮಾರ್​ ಅವರನ್ನು ಇದ್ದಕ್ಕಿದ್ದಂತೆ ಬದಿಗಿಟ್ಟರೆ ಹೇಗೆ? ಪ್ರಸ್ತುತ ತಂಡದಲ್ಲಿ ಅಭಿಷೇಕ್ ಶರ್ಮಾ, ವೈಭವ್ ಸೂರ್ಯವಂಶಿ ಮತ್ತು ಇಶಾನ್ ಕಿಶನ್ ರೂಪದಲ್ಲಿ ಮೂವರು ಎಡಗೈ ಆಟಗಾರರಿದ್ದಾರೆ. ಹೀಗಾಗಿ, ಸ್ಯಾಮ್ಸನ್​ಗೆ ಆ 3ನೇ ಸ್ಥಾನವೂ ಸಿಕ್ಕಿಲ್ಲ. ಇದು ಸಂಜುಗೆ ಮಾತ್ರವಲ್ಲ, ಟೀಮ್ ಇಂಡಿಯಾ ಭವಿಷ್ಯಕ್ಕೂ ಒಳ್ಳೆಯದಲ್ಲ ಎಂದು ಎಚ್ಚರಿಸಿದರು.

ತಂಡಕ್ಕೆ ಹೊಸ ಆಟಗಾರ ವೈಭವ್ ಸೂರ್ಯವಂಶಿ ಬಂದರೆ, ಹಿರಿಯ ಆಟಗಾರರಿಗೆ ಸ್ಪಷ್ಟ ಭರವಸೆ ಕೊಡಿ. ನಾನು ಮ್ಯನೇಜ್​ಮೆಂಟ್​ ಸ್ಥಾನದಲ್ಲಿ ಇದ್ದಿದ್ದರೆ, ಸಂಜು ಅಥವಾ ಅಭಿಷೇಕ್ ಬಳಿ ಹೋಗಿ ಹೀಗೆ ಹೇಳುತ್ತಿದ್ದೆ. ಹೊಸ ವ್ಯಕ್ತಿಯೊಬ್ಬ ಬೆಂಚ್​ನಲ್ಲಿ ಕುಳಿತು ಒತ್ತಡ ಹೇರುತ್ತಿದ್ದಾನೆ. ನೀವು ನಮಗೆ ವಿಶ್ವಕಪ್ ಗೆದ್ದು ಕೊಟ್ಟಿದ್ದೀರಿ. ಹೀಗಾಗಿ, ಕನಿಷ್ಠ 2ರಿಂದ 3 ಸರಣಿಗಳಿಗೆ ನಿಮಗೆ ಪೂರ್ಣ ಅವಕಾಶ ಕೊಡುತ್ತೇವೆ' ಎನ್ನುವುದಾಗಿ ಅಶ್ವಿನ್ ಹೇಳಿದ್ದಾರೆ,(ಏಜೆನ್ಸೀಸ್).