ಟಿ20 ವಿಶ್ವಕಪ್ ಸೆಮಿಫೈನಲ್, ಫೈನಲ್ ತಾಣ ನಿರ್ಧಾರ ಹೇಗೆ? ಇಲ್ಲಿದೆ ಲೆಕ್ಕಾಚಾರ...
- ಶ್ರೀಲಂಕಾಕ್ಕೂ ತವರಿನಲ್ಲಿ ಉಪಾಂತ್ಯ ಆಡುವ ಅವಕಾಶ!
- ಭಾರತಕ್ಕೂ ತವರಿನಲ್ಲಿ ಸೆಮಿಫೈನಲ್ ಆಡುವ ಅವಕಾಶ ತಪ್ಪಬಹುದು!
- ಫೈನಲ್ ಪಂದ್ಯದ ಅಹಮದಾಬಾದ್ನಲ್ಲೋ? ಕೊಲಂಬೊದಲ್ಲೋ?
ನವದೆಹಲಿ: ಹೈಬ್ರಿಡ್ ಮಾದರಿಯಲ್ಲಿ ನಡೆಯುತ್ತಿರುವ ಟಿ20 ವಿಶ್ವಕಪ್ (T20 World Cup) ಟೂರ್ನಿಯಲ್ಲಿ ಪಾಕಿಸ್ತಾನ ತಂಡ ಸೆಮಿಫೈನಲ್ಗೇರಿದರೆ ಶ್ರೀಲಂಕಾದ ಕೊಲಂಬೊದಲ್ಲೇ ಆಡಲಿದೆ ಎಂಬುದು ಈಗಾಗಲೆ ನಿರ್ಧಾರವಾಗಿದೆ. ಇದರೊಂದಿಗೆ ಜಂಟಿ-ಆತಿಥೇಯ ಶ್ರೀಲಂಕಾಕ್ಕೂ ತವರಿನಲ್ಲಿ ಸೆಮಿಫೈನಲ್ ಪಂದ್ಯ ಆಡುವ ಅವಕಾಶ ಒಲಿಯುವ ಸಾಧ್ಯತೆ ಇದೆ. ಜತೆಗೆ ಭಾರತ ತಂಡಕ್ಕೆ ತವರಿನಲ್ಲಿ ಸೆಮಿಫೈನಲ್ ಆಡುವ ಅವಕಾಶ ಕೈತಪ್ಪುವ ಸಾಧ್ಯತೆಯೂ ಇದೆ ಎಂದು ಐಸಿಸಿಯ (ICC) ಟೂರ್ನಿ ನಿಯಮಾವಳಿಯಲ್ಲಿ ತಿಳಿಸಲಾಗಿದೆ.
ಐಸಿಸಿ ಲೆಕ್ಕಾಚಾರದ ಅನ್ವಯ, ಪಾಕಿಸ್ತಾನ, ಶ್ರೀಲಂಕಾ ತಂಡಗಳೆರಡೂ ಉಪಾಂತ್ಯಕ್ಕೆ ಏರದಿದ್ದರೆ, ಎರಡೂ ಸೆಮಿಫೈನಲ್ ಪಂದ್ಯಗಳು ಭಾರತದ ಮುಂಬೈ (ಮಾ.5) ಮತ್ತು ಕೋಲ್ಕತದಲ್ಲೇ (ಮಾ.4) ನಡೆಯಲಿವೆ. ಆದರೆ ಪಾಕಿಸ್ತಾನ ಸೆಮಿಫೈನಲ್ಗೇರಿದರೆ, ಮಾರ್ಚ್ 4ಕ್ಕೆ ಕೊಲಂಬೊದ ಪ್ರೇಮದಾಸ ಸ್ಟೇಡಿಯಂನಲ್ಲೇ ಆಡಲಿದೆ. ಇನ್ನು ಭಾರತ ತಂಡ ಸೆಮಿಫೈನಲ್ಗೇರಿ, ಪಾಕಿಸ್ತಾನ ಎದುರಾಳಿಯಾದರೆ ಆಗ ಶ್ರೀಲಂಕಾದಲ್ಲೇ ಸೆಮೀಸ್ ಆಡಬೇಕಾಗುತ್ತದೆ.
ಇನ್ನು ಶ್ರೀಲಂಕಾಕ್ಕೆ ತವರಿನಲ್ಲಿ ಸೆಮೀಸ್ ಆಡುವ ಅವಕಾಶ ಸಿಗಬೇಕಾದರೆ, ಭಾರತ ತಂಡ ಎದುರಾಳಿಯಾಗಬಾರದು ಮತ್ತು ಪಾಕಿಸ್ತಾನವೂ ಉಪಾಂತ್ಯಕ್ಕೇರಬಾರದು. ಭಾರತ ಎದುರಾಳಿಯಾದರೆ ಮತ್ತು ಪಾಕ್ ತಂಡವೂ ಉಪಾಂತ್ಯಕ್ಕೇರಿದರೆ ಲಂಕಾ ತಂಡ ಮುಂಬೈನಲ್ಲೇ ಸೆಮೀಸ್ ಆಡಬೇಕಾಗುತ್ತದೆ. ಯಾಕೆಂದರೆ ಮುಂಬೈನಲ್ಲಿ ಒಂದು ಸೆಮೀಸ್ ನಡೆಯುವುದು ನಿಶ್ಚಿತ.
ಇನ್ನು ಭಾರತ ತಂಡಕ್ಕೆ ಪಾಕಿಸ್ತಾನ ತಂಡ ಎದುರಾಳಿಯಾಗದಿದ್ದರೆ, ಮಾ.5ಕ್ಕೆ ಮುಂಬೈನಲ್ಲಿ ಸೆಮೀಸ್ ಆಡಲಿದೆ. ಪಾಕಿಸ್ತಾನ ಎದುರಾಳಿಯಾದರೆ ಭಾರತ ಮಾ.4ಕ್ಕೆ ಕೊಲಂಬೊದಲ್ಲೇ ಸೆಮೀಸ್ ಆಡಬೇಕಾಗುತ್ತದೆ. ಲಂಕಾ-ಪಾಕ್ ಸೂಪರ್-8ರಲ್ಲಿ ಒಂದೇ ಗುಂಪಿನಲ್ಲಿರುವುದರಿಂದ ಸೆಮೀಸ್ನಲ್ಲಿ ಮುಖಾಮುಖಿಯಾಗುವ ಸಾಧ್ಯತೆಯೇ ಇಲ್ಲ.
ಭಾರತ, ಪಾಕಿಸ್ತಾನ, ಶ್ರೀಲಂಕಾ ಈ ಮೂರೂ ತಂಡಗಳು ಉಪಾಂತ್ಯಕ್ಕೇರದಿದ್ದರೆ, ಎರಡೂ ಸೆಮೀಸ್ ಭಾರತದಲ್ಲೇ ನಡೆಯಲಿವೆ. ಆಗ ಸೂಪರ್-8 ಗ್ರೂಪ್-1ರ ಅಗ್ರಸ್ಥಾನಿ ಮತ್ತು ಗ್ರೂಪ್ 2ರ ದ್ವೀತಿಯ ಸ್ಥಾನಿ ಮಾ.4ಕ್ಕೆ ಕೋಲ್ಕತದಲ್ಲಿ ಹಾಗೂ ಗ್ರೂಪ್-2ರ ಅಗ್ರಸ್ಥಾನಿ ಮತ್ತು ಗ್ರೂಪ್-1ರ ದ್ವೀತಿಯ ಸ್ಥಾನಿ ಮಾ.5ಕ್ಕೆ ಮುಂಬೈನಲ್ಲಿ ಸೆಮಿಫೈನಲ್ನಲ್ಲಿ ಮುಖಾಮುಖಿ ಆಗಲಿವೆ.
ಇನ್ನು ಪಾಕಿಸ್ತಾನ ಫೈನಲ್ಗೇರಿದರೆ ಮಾರ್ಚ್ 8ಕ್ಕೆ ಕೊಲಂಬೊದಲ್ಲೇ ಪ್ರಶಸ್ತಿ ಹೋರಾಟ ನಡೆಯಲಿದೆ. ಪಾಕ್ ಅರ್ಹತೆ ಗಳಿಸದೆ, ಶ್ರೀಲಂಕಾ ಅಥವಾ ಬೇರಾವುದೇ ತಂಡ ಫೈನಲ್ಗೇರಿದರೂ, ಪ್ರಶಸ್ತಿ ಕಾದಾಟ ಅಹಮದಾಬಾದ್ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲೇ ನಡೆಯಲಿದೆ. ಅಂದರೆ ಪಾಕ್ ಎದುರಾಳಿಯಾದರೆ ಮಾತ್ರ ಲಂಕಾಗೆ ತವರಿನಲ್ಲಿ ಫೈನಲ್ ಆಡುವ ಅವಕಾಶ ಲಭಿಸಲಿದೆ. ಇನ್ನು ಪಾಕ್ ಎದುರಾಳಿಯಾದರೆ ಭಾರತಕ್ಕೂ ತವರಿನಲ್ಲಿ ಫೈನಲ್ ಆಡುವ ಅವಕಾಶ ಲಭಿಸುವುದಿಲ್ಲ.
ಐಸಿಸಿ ಮಂಗಳವಾರ ನಾಕೌಟ್ ಪಂದ್ಯಗಳ ಟಿಕೆಟ್ ಮಾರಾಟ ಪ್ರಕ್ರಿಯೆ ಆರಂಭಿಸಿದೆ. ಅಂದರೆ ಮುಂಬೈ, ಕೋಲ್ಕತದಲ್ಲಿ ನಿಗದಿಯಾಗಿರುವ ಸೆಮಿಫೈನಲ್ ಮತ್ತು ಕೊಲಂಬೊದಲ್ಲಿ ನಡೆಯಬಹುದಾದ ಮೊದಲ ಸೆಮಿಫೈನಲ್ ಮತ್ತು ಅಹಮದಾಬಾದ್ ಅಥವಾ ಕೊಲಂಬೊದಲ್ಲಿ ನಡೆಯಬಹುದಾದ ಫೈನಲ್ ಪಂದ್ಯಗಳ ಟಿಕೆಟ್ಗಳು ಇದರಲ್ಲಿ ಸೇರಿವೆ. ಆದರೆ ಕೋಲ್ಕತ ಅಥವಾ ಕೊಲಂಬೊದಲ್ಲಿ ಸೆಮಿಫೈನಲ್ ನಡೆಯದಿದ್ದರೆ ಮತ್ತು ಅಹಮದಾಬಾದ್ ಅಥವಾ ಕೊಲಂಬೊದಲ್ಲಿ ಫೈನಲ್ ಪಂದ್ಯ ನಡೆಯದಿದ್ದರೆ ಆಗ ಆ ಪಂದ್ಯದ ಟಿಕೆಟ್ಗಳ ಸಂಪೂರ್ಣ ಮೊತ್ತವನ್ನು ಟಿಕೆಟ್ ಖರೀದಿಸಿರುವವರಿಗೆ ಮರುಪಾವತಿ ಮಾಡಲಾಗುವುದು ಎಂದು ಐಸಿಸಿ ತಿಳಿಸಿದೆ.