ಇದಕ್ಕಿಂತ ಇನ್ನೇನು ಬೇಕು? ವೈಭವ್ ಸೂರ್ಯವಂಶಿ ಶತಕದಾಟ ಮೆಚ್ಚಿದ ಶಶಿ ತರೂರ್​! ಬಿಸಿಸಿಐಗೆ ಕಿವಿಮಾತು

ನವದೆಹಲಿ: ವಿಜಯ್ ಹಜಾರೆ ಟ್ರೋಫಿಯಲ್ಲಿ ಮತ್ತೊಂದು ಸ್ಫೋಟಕ ಶತಕ ಸಿಡಿಸಿದ ಬಿಹಾರ ತಂಡದ ಸ್ಟಾರ್ ಬ್ಯಾಟರ್​ ವೈಭವ್ ಸೂರ್ಯವಂಶಿ, ಕೇವಲ 36 ಎಸೆತಗಳಲ್ಲಿ ಸೆಂಚುರಿ ಗಳಿಸುವ ಮೂಲಕ ಲಿಸ್ಟ್ ಎ ಕ್ರಿಕೆಟ್‌ನಲ್ಲಿ ಎರಡನೇ ಬಾರಿ ವೇಗದ ಶತಕ ಗಳಿಸಿದ ಮೊದಲ ಕ್ರಿಕೆಟಿಗನೆಂಬ ದಾಖಲೆ ಬರೆದರು. ಅರುಣಾಚಲ ಪ್ರದೇಶ ಮತ್ತು ಬಿಹಾರ ನಡುವಿನ ಪಂದ್ಯದಲ್ಲಿ ವೈಭವ್ ಈ ವಿಶೇಷ ಸಾಧನೆಗೈದರು. ಇದು ಕಾಂಗ್ರೆಸ್​ ನಾಯಕ ಶಶಿ ತರೂರ್​ ಅವರ ಗಮನ ಸೆಳೆದಿರುವುದು ವಿಶೇಷ.   

ತಮ್ಮ ವಿಜಯ್ ಹಜಾರೆ ಟ್ರೋಫಿಯ ಚೊಚ್ಚಲ ಪಂದ್ಯದಲ್ಲಿ ಅರುಣಾಚಲ ಪ್ರದೇಶದ ವಿರುದ್ಧ 84 ಎಸೆತಗಳಲ್ಲಿ 190 ರನ್ ಗಳಿಸುವ ಮೂಲಕ ಕ್ರಿಕೆಟ್ ಜಗತ್ತನ್ನು ವೈಭವ್ ಅಚ್ಚರಿಗೊಳಿಸಿದ್ದಾರೆ. ಅಂಡರ್ -19 ಏಷ್ಯಾಕಪ್ ಫೈನಲ್‌ನಲ್ಲಿ ವೈಫಲ್ಯದ ಕೆಲವೇ ದಿನಗಳ ಬಳಿಕ ಆಡಿದ ಈ ಇನ್ನಿಂಗ್ಸ್, ಸೂರ್ಯವಂಶಿಯನ್ನು ಶೀಘ್ರದಲ್ಲೇ ಹಿರಿಯ ಭಾರತೀಯ ತಂಡಕ್ಕೆ ಸೇರಿಸಬೇಕೇ ಅಥವಾ ಬೇಡವೇ ಎಂಬ ಬಿರುಸಿನ ಚರ್ಚೆಗೆ ಕಾರಣವಾಗಿದೆ. 

ದೇಶೀಯ ಕ್ರಿಕೆಟ್‌ನಲ್ಲಿ ಅದರಲ್ಲೂ, ಇಷ್ಟು ಚಿಕ್ಕ ವಯಸ್ಸಿಗೆ ಇಂತಹ ಪ್ರಾಬಲ್ಯ ಸಾಧಿಸಿರುವುದು ಅಪರೂಪ. ಕೇವಲ ಶತಕ ಗಳಿಸಿದ್ದು ಮಾತ್ರವಲ್ಲದೇ, ಪುರುಷರ ಲಿಸ್ಟ್ ಎ ಕ್ರಿಕೆಟ್‌ನಲ್ಲಿ ವೇಗವಾಗಿ 150 ರನ್ ಸಿಡಿಸಿದ ದಾಖಲೆಯನ್ನೂ ವೈಭವ್ ಹೊಂದಿದ್ದಾರೆ. 84 ಎಸೆತಗಳಲ್ಲಿ 190 ರನ್‌ಗೆ ಔಟಾದ ಸೂರ್ಯವಂಶಿ, 16 ಬೌಂಡರಿ ಮತ್ತು 15 ಸಿಕ್ಸರ್‌ಗಳನ್ನು ಬಾರಿಸಿದರು.

'ಬೇಬಿ ಬಾಸ್'​ ಸ್ಪೋಟಕ ಇನ್ನಿಂಗ್ಸ್​ಗೆ ಫಿದಾ ಆದ ಕಾಂಗ್ರೆಸ್ ಸಂಸದ ಶಶಿ ತರೂರ್, ವೈಭವ್ ಅವರ ಐತಿಹಾಸಿಕ ದಾಖಲೆಗೆ ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ. ಈ ಕುರಿತಂತೆ ಸಾಮಾಜಿಕ ಜಾಲತಾಣದಲ್ಲಿ ಮಾತನಾಡಿರುವ ಅವರು, ವೈಭವ್ ಸೂರ್ಯವಂಶಿಯನ್ನು ಕ್ರಿಕೆಟ್​ ದಂತಕಥೆ ಸಚಿನ್ ತೆಂಡೂಲ್ಕರ್‌ಗೆ ಹೋಲಿಸಿದ್ದಾರೆ. ಈ ಹಿಂದೆ 14 ವರ್ಷದ ಬಾಲಕ ಇಂತಹ ಅಸಾಧಾರಣ ಪ್ರತಿಭೆಯನ್ನು ಪ್ರದರ್ಶಿಸಿದ್ದು ಸಚಿನ್ ತೆಂಡೂಲ್ಕರ್ ಮಾತ್ರ. ಇದೀಗ ಅವರಂತೆಯೇ ಆಡಿರುವುದು ವೈಭವ್​. ಬಿಸಿಸಿಐ ಆಯ್ಕೆಗಾರರು ಇನ್ನೂ ಯಾವುದಕ್ಕಾಗಿ ಕಾಯುತ್ತಿದ್ದಾರೆ ಅನ್ನೋದು ನನಗೆ ಗೊತ್ತಿಲ್ಲ ಎಂದು ಪ್ರಶ್ನಿಸಿದ್ದಾರೆ. 

ಇತ್ತೀಚೆಗೆ ಮುಕ್ತಾಯವಾದ ಅಂಡರ್-19 ಏಷ್ಯಾ ಕಪ್ ಟೂರ್ನಮೆಂಟ್​ನ ಫೈನಲ್​ ಪಂದ್ಯದಲ್ಲಿ ಪಾಕಿಸ್ತಾನ ವಿರುದ್ಧ ಭಾರತ ಸೋಲುಂಡಿತು. ಬಹುನಿರೀಕ್ಷಿತ ಪಂದ್ಯದಲ್ಲೇ ವೈಭವ್ ಸೂರ್ಯವಂಶಿ ಕೈಕೊಟ್ಟರು. ಸಣ್ಣ ತಂಡಗಳ ವಿರುದ್ಧ ಶತಕ ಗಳಿಸುವ ವೈಭವ್, ನಿರ್ಣಾಯಕ ಪಾಕಿಸ್ತಾನ ಪಂದ್ಯದಲ್ಲಿ ದಯನೀಯವಾಗಿ ವಿಫಲವಾದರು. ಹೀಗಾಗಿ ಅನೇಕ ನೆಟ್ಟಿಗರು ವೈಭವ್​ ವಿರುದ್ಧ ಅಸಮಾಧಾನಗೊಂಡಿದ್ದಾರೆ. ಈ ವಿಜಯ್ ಹಜಾರೆ ಟೂರ್ನಮೆಂಟ್​ನಲ್ಲಿ ಶತಕ ಬಾರಿಸಿದರೆ ಏನು ಪ್ರಯೋಜನಾ? ಪಾಕ್​ ವಿರುದ್ಧ ಆಡಿದ್ದರೆ ನಿಮ್ಮನ್ನು ಮೆಚ್ಚಿಕೊಳ್ಳುತ್ತಿದ್ದೆವು ಎಂದು ಕಮೆಂಟ್​ ಮಾಡುತ್ತಿದ್ದಾರೆ,(ಏಜೆನ್ಸೀಸ್​).