- ಪಂಜಾಬ್ ಕಿಂಗ್ಸ್ ತಂಡವು ಗುಜರಾತ್ ಟೈಟಾನ್ಸ್ ತಂಡವನ್ನು 3 ವಿಕೆಟ್ಗಳಿಂದ ಸೋಲಿಸಿತು
- ಗುಜರಾತ್ ತಂಡದ ನಾಯಕ ಶುಭಮನ್ ಗಿಲ್ ಸೋಲಿನ ಹಿಂದಿನ ಕಾರಣದ ಬಗ್ಗೆ ಮಾತನಾಡಿದ್ದಾರೆ
- ಎರಡನೇ ಇನ್ನಿಂಗ್ಸ್ನಲ್ಲಿ ಸುರಿದ ನಿರಂತರ ಮಳೆಯು ಬೌಲರ್ಗಳಿಗೆ ಅಡ್ಡಿಯಾಯಿತು
- ನೋಟಕ್ಕೆ ಇದು 210 ರಿಂದ 220 ರನ್ ಗಳಿಸಬಹುದಾದ ಬ್ಯಾಟಿಂಗ್ ಸ್ನೇಹಿ ವಿಕೆಟ್ನಂತೆ ಕಾಣುತ್ತಿತ್ತು
Shubman Gill: ಹತ್ತೊಂಬತ್ತನೇ ಆವೃತ್ತಿಯ ಐಪಿಎಲ್ಗೆ ಈಗಾಗಲೇ ಅದ್ಧೂರಿ ಚಾಲನೆ ಸಿಕ್ಕಿದ್ದು, ನಿನ್ನೆ ನಡೆದ ರೋಚಕ ಪಂದ್ಯದಲ್ಲಿ ಪಂಜಾಬ್ ಕಿಂಗ್ಸ್ ತಂಡವು ಗುಜರಾತ್ ಟೈಟಾನ್ಸ್ ವಿರುದ್ಧ 3 ವಿಕೆಟ್ಗಳ ಭರ್ಜರಿ ಜಯ ಸಾಧಿಸಿದೆ. ಮೊದಲು ಬ್ಯಾಟಿಂಗ್ ಮಾಡಿದ್ದ ಗುಜರಾತ್ ನೀಡಿದ 163 ರನ್ಗಳ ಗುರಿಯನ್ನು ಬೆನ್ನಟ್ಟಿದ ಪಂಜಾಬ್, ಇನ್ನು ಐದು ಎಸೆತಗಳು ಬಾಕಿ ಇರುವಂತೆಯೇ ಗೆಲುವಿನ ನಗೆ ಬೀರಿದೆ.
ಪಂಜಾಬ್ ಪರ ಯುವ ಆಟಗಾರ ಕೂಪರ್ ಕೊನೊಲಿ ಕೇವಲ 44 ಎಸೆತಗಳಲ್ಲಿ ಅಜೇಯ 72 ರನ್ ಸಿಡಿಸುವ ಮೂಲಕ ಟೈಟಾನ್ಸ್ ಬೌಲಿಂಗ್ ದಾಳಿಯನ್ನು ಅಕ್ಷರಶಃ ಪುಡಿಗಟ್ಟಿದರು. ಗುಜರಾತ್ ಪರ ಪ್ರಸಿದ್ಧ್ ಕೃಷ್ಣ ಮಾರಕ ಬೌಲಿಂಗ್ ದಾಳಿ ನಡೆಸಿ ಮೂರು ವಿಕೆಟ್ ಪಡೆದು ಪಂದ್ಯಕ್ಕೆ ತಿರುವು ನೀಡಲು ಯತ್ನಿಸಿದರಾದರೂ, ಕೊನೊಲಿ ಅಬ್ಬರದ ಮುಂದೆ ಅದು ಸಾಧ್ಯವಾಗಲಿಲ್ಲ.
ಪಂದ್ಯದ ನಂತರ, ಗುಜರಾತ್ ತಂಡದ ನಾಯಕ ಶುಭಮನ್ ಗಿಲ್ ಸೋಲಿನ ಹಿಂದಿನ ಕಾರಣದ ಬಗ್ಗೆ ಮಾತನಾಡಿದ್ದು, ನಮ್ಮ ತಂಡವು ಕೆಲವು ರನ್ಗಳ ಕೊರತೆಯನ್ನು ಎದುರಿಸಿತು. ಜೊತೆಗೆ, ಎರಡನೇ ಇನ್ನಿಂಗ್ಸ್ನಲ್ಲಿ ಸುರಿದ ನಿರಂತರ ಮಳೆಯು ಬೌಲರ್ಗಳಿಗೆ ಅಡ್ಡಿಯಾಯಿತು ಎಂದು ಹೇಳಿದರು.
ಅವರ ಪ್ರಕಾರ, ಈ ಮೈದಾನದ ವಿಕೆಟ್ ಅತ್ಯುತ್ತಮವಾಗಿತ್ತು. ನೋಟಕ್ಕೆ ಇದು 210 ರಿಂದ 220 ರನ್ ಗಳಿಸಬಹುದಾದ ಬ್ಯಾಟಿಂಗ್ ಸ್ನೇಹಿ ವಿಕೆಟ್ನಂತೆ ಕಾಣುತ್ತಿತ್ತು. ಕನಿಷ್ಠ ಪಕ್ಷ 175 ರನ್ ಗಳಿಸಿದರೆ ಪಂದ್ಯದಲ್ಲಿ ಉತ್ತಮ ಪೈಪೋಟಿ ನೀಡಬಹುದು ಎಂದು ನಾವು ಭಾವಿಸಿದ್ದೆವು. ಆದರೆ, ಕೊನೆಯ 5 ಓವರ್ಗಳಲ್ಲಿ ನಾವು ವಿಕೆಟ್ಗಳನ್ನು ಕಳೆದುಕೊಳ್ಳಲು ಪ್ರಾರಂಭಿಸಿದೆವು. ಹಾಗಾಗಿ ಸ್ಕೋರ್ ಮಾಡಲು ಸಾಧ್ಯವಾಗಲಿಲ್ಲ.
ಆದಾಗ್ಯೂ, ಚೆಂಡು ಹಳೆಯದಾದ ನಂತರ, ನೆಲಕ್ಕೆ ಬಡಿಯುವುದು ಕಷ್ಟಕರವಾಗಿತ್ತು. ಎರಡನೇ ಇನ್ನಿಂಗ್ಸ್ನಲ್ಲಿ, ಮಳೆ ಮುಂದುವರೆದ ಕಾರಣ ಚೆಂಡು ಒದ್ದೆಯಾಯಿತು. ಇದರಿಂದಾಗಿ ಬ್ಯಾಟರ್ಗಳಿಗೆ ರನ್ ಗಳಿಸುವುದು ಸುಲಭವಾಯಿತು ಎಂದು ಗಿಲ್ ವಿವರಿಸಿದರು.
ಕೂಪರ್ ಅವರನ್ನು ಶ್ಲಾಘಿಸಿದ ಶ್ರೇಯಸ್ ಅಯ್ಯರ್
ಪಂಜಾಬ್ ತಂಡದ ನಾಯಕ ಶ್ರೇಯಸ್ ಅಯ್ಯರ್ ಕೂಡ ಕೂಪರ್ ಅವರ ಬ್ಯಾಟಿಂಗ್ ವೈಖರಿಯನ್ನು ಮುಕ್ತಕಂಠದಿಂದ ಶ್ಲಾಘಿಸಿದ್ದು, ಇಂದು ರಾತ್ರಿ ಅವರು ಐಪಿಎಲ್ಗೆ ಪಾದಾರ್ಪಣೆ ಮಾಡಿದರು. ಕೂಪರ್ ಪವರ್ಪ್ಲೇನಲ್ಲಿ ಉತ್ತಮವಾಗಿ ಆಡಿದರು. ಜೊತೆಗೆ ತಂಡ ಒತ್ತಡದಲ್ಲಿದ್ದಾಗ ಆಸ್ಟ್ರೇಲಿಯಾದ ಚಾಣಾಕ್ಷ್ಯ ಆಟಗಾರ ಸ್ಟ್ರೈಕ್ ಅನ್ನು ತಿರುಗಿಸುವಷ್ಟು ಜಾಣ್ಮೆ ತೋರಿದರು ಎಂದು ಅಭಿಪ್ರಾಯ ಸೂಚಿಸಿದರು.
ಕೂಪರ್ ಆಡಿದ ಕೆಲವು ಹೊಡೆತಗಳು ನಿಜಕ್ಕೂ ಅವಾಸ್ತವಿಕ ಆಗಿದ್ದವು. ನಾನು ಕ್ರಿಸ್ನಲ್ಲಿದ್ದಾಗ ನನ್ನ ಆಟದ ಮೇಲೆ ಗಮನ ಕೇಂದ್ರೀಕರಿಸುತ್ತಿದ್ದೆ. ಆದರೆ ಇದ್ದಕ್ಕಿದ್ದಂತೆ ನಾವು ಸತತವಾಗಿ ವಿಕೆಟ್ಗಳನ್ನು ಕಳೆದುಕೊಂಡೆವು. ಆ ಕ್ಷಣದಲ್ಲಿ ಪಂದ್ಯ ಕೈಜಾರುತ್ತಿದೆ ಎಂಬ ಆತಂಕವಿತ್ತು ಎಂದು ಅಯ್ಯರ್ ನೆನಪಿಸಿಕೊಂಡರು.
ಆದಾಗ್ಯೂ, ಕೂಪರ್ ಅತ್ಯಂತ ಉತ್ತಮ ಮನಸ್ಥಿತಿಯನ್ನು ಹೊಂದಿದ್ದಾರೆ. ಅವರು ತಮ್ಮ ಈ ಅದ್ಭುತ ಫಾರ್ಮ್ ಅನ್ನು ಮುಂಬರುವ ಪಂದ್ಯಗಳಲ್ಲೂ ಮುಂದುವರಿಸುತ್ತಾರೆ ಎಂದು ನಾನು ಆಶಿಸುತ್ತೇನೆ ಎಂದರು (ಏಜೆನ್ಸೀಸ್).