ಆರ್​ಸಿಬಿ ಸೇಲ್: 16,706 ಕೋಟಿಗೆ ಮಾರಾಟವಾದರೂ ವಿಜಯ್ ಮಲ್ಯಗೆ ಒಂದೇ ಒಂದು ರೂಪಾಯಿ ಸಿಗಲ್ಲ ಏಕೆ? RCB  
ಕ್ರಿಕೆಟ್

ಆರ್​ಸಿಬಿ ಸೇಲ್: 16 ಸಾವಿರ ಕೋಟಿಗೆ ಮಾರಾಟವಾದ್ರೂ ವಿಜಯ್ ಮಲ್ಯಗೆ ಒಂದೇ ಒಂದು ರೂಪಾಯಿ ಸಿಗಲ್ಲ ಏಕೆ? RCB

ಪ್ರಮುಖ ಮುಖ್ಯಾಂಶಗಳು

  • ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ( RCB ) ತಂಡದ ಮಾರಾಟ ಪ್ರಕ್ರಿಯೆ ಮುಗಿದಿದೆ
  • ಆರ್​ಸಿಬಿ ತಂಡವನ್ನು ಆದಿತ್ಯ ಬಿರ್ಲಾ ಗ್ರೂಪ್ ಸ್ವಾಧೀನಪಡಿಸಿಕೊಂಡಿದೆ
  • ಬಿರ್ಲಾ ಗ್ರೂಪ್ ಜೊತೆಗೆ ಇತರೆ ಮೂರು ಕಂಪನಿಗಳು 16,706 ಕೋಟಿ ರೂ.ಗಳಿಗೆ ಖರೀದಿ ಮಾಡಿದೆ
  • ಆರ್​ಸಿಬಿ ತಂಡವನ್ನು ಆರಂಭದಲ್ಲಿ ಖರೀದಿ ಮಾಡಿದ ವಿಜಯ್​ ಮಲ್ಯಗೆ ಸಿಗಲ್ಲ ಒಂದೇ ಒಂದು ರೂಪಾಯಿ
RCB : ಕ್ರೀಡಾಭಿಮಾನಿಗಳು ಎದುರು ನೋಡುತ್ತಿರುವ 19ನೇ ಆವೃತ್ತಿಯ ಐಪಿಎಲ್​ ಟೂರ್ನಿಗೂ ಮುನ್ನವೇ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ( RCB ) ತಂಡದ ಮಾರಾಟ ಪ್ರಕ್ರಿಯೆ ಮುಗಿದಿದೆ. ಆರ್​ಸಿಬಿ ತಂಡವನ್ನು ಆದಿತ್ಯ ಬಿರ್ಲಾ ಗ್ರೂಪ್  ಸ್ವಾಧೀನಪಡಿಸಿಕೊಂಡಿದ್ದು, ಬರೋಬ್ಬರಿ 16,706 ಕೋಟಿ ರೂ.ಗಳಿಗೆ ಖರೀದಿ ಮಾಡಿದೆ. ಬಿರ್ಲಾ ಗ್ರೂಪ್ ಜೊತೆಗೆ, ಇತರೆ ಮೂರು ಕಂಪನಿಗಳು ಕೂಡ ಆರ್​ಸಿಬಿ ತಂಡದ ಷೇರುಗಳನ್ನು ಖರೀದಿ ಮಾಡಿವೆ. ಇನ್ನು ಮುಂದೆ ಆರ್​ಸಿಬಿಗೆ ಹೊಸ ಮಾಲೀಕತ್ವದಲ್ಲಿ ತನ್ನ ಐಪಿಎಲ್​ ಪ್ರಯಾಣವನ್ನು ಆರಂಭಿಸಲಾಗಿದೆ. 
ಆರ್​ಸಿಬಿ ಏನೋ ಸೇಲಾಯ್ತು ಇದೀಗ ಓರ್ವ ವ್ಯಕ್ತಿಯ ಹೆಸರು ಹೆಚ್ಚಾಗಿ ಕೇಳಿಬರುತ್ತಿದೆ. ಅವರು ಬೇರೆ ಯಾರೂ ಅಲ್ಲ ಸಾವಿರಾರು ಕೋಟಿ ಹಣಕಾಸು ವಂಚನೆ ಆರೋಪದಲ್ಲಿ ದೇಶ ಬಿಟ್ಟು ಪರಾರಿಯಾಗಿ, ಲಂಡನ್​ನಲ್ಲಿ ನೆಲೆಸಿರುವ ವಿಜಯ್​ ಮಲ್ಯ. ಆರ್​ಸಿಬಿ ತಂಡವನ್ನು ಆರಂಭದಲ್ಲಿ ಖರೀದಿ ಮಾಡಿದ್ದು ಕೂಡ ಇದೇ ವಿಜಯ್​ ಮಲ್ಯ.
ಐಪಿಎಲ್​ ಶುರುವಾಗಿದ್ದು 2008ರಿಂದ ಅನ್ನೋದು ನಿಮಗೆಲ್ಲರಿಗೂ ಗೊತ್ತೇ ಇದೆ. ಈ ಸಂದರ್ಭದಲ್ಲಿ 111.6 ಮಿಲಿಯನ್​ ಡಾಲರ್​ (ಅಂದಾಜು 446 ಕೋಟಿ ರೂಪಾಯಿ) ಗೆ ಆರ್​ಸಿಬಿ ತಂಡವನ್ನು ವಿಜಯ್​ ಮಲ್ಯ ಖರೀದಿ ಮಾಡಿದರು. ಅಂದು 446 ಕೋಟಿ ರೂ. ಇದ್ದ ಆರ್​ಸಿಬಿ ಮೌಲ್ಯ ಇಂದು 16,706 ಕೋಟಿ ರೂ.ಗೆ ಏರಿಕೆಯಾಗಿದೆ. ಆರ್​ಸಿಬಿ ಷೇರು ಮೌಲ್ಯ ರಾಕೆಟ್​ ವೇಗದಲ್ಲಿ ಏರಿದ್ದು, ವಿಶ್ವದ ಶ್ರೀಮಂತ ಫ್ರಾಂಚೈಸಿಗಳಲ್ಲಿ ಒಂದಾಗಿದೆ. 
ಇಷ್ಟೊಂದು ಹಣಕ್ಕೆ ಆರ್​ಸಿಬಿ ಏನೋ ಮಾರಾಟವಾಗಿದೆ. ಇದರಿಂದ ವಿಜಯ್​ ಮಲ್ಯಗೆ ಎಷ್ಟು ಹಣ ಸಿಗುತ್ತೆ ಎಂಬ ಪ್ರಶ್ನೆ ಇದೀಗ ಮೂಡಿದೆ. ವಿಜಯ್​ ಮಲ್ಯ ಅವರು ತಮ್ಮ ಸಾಲವನ್ನು ತೀರಿಸಿ, ಮರಳಿ ಸ್ವದೇಶಕ್ಕೆ ಬರಬಹುದಲ್ವಾ ಎಂಬ ಚರ್ಚೆ ಸಾಮಾಜಿಕ ಜಾಲತಾಣದಲ್ಲಿ ನಡೆಯುತ್ತಿದೆ. ಹಾಗಾದರೆ, ವಿಜಯ್​ ಮಲ್ಯಗೆ ನಿಜಕ್ಕೂ ಹಣ ಸಿಗುತ್ತಾ? ಸಿಕ್ಕರೆ ಎಷ್ಟು ಹಣ ಸಿಗಬಹುದು ಅನ್ನೋ ಪ್ರಶ್ನೆಗೆ ಉತ್ತರ ಇಲ್ಲಿದೆ. 

ಒಂದು ರೂಪಾಯಿ ಕೂಡ ಸಿಗಲ್ಲ

ಅಚ್ಚರಿಯ ಸಂಗತಿ ಏನೆಂದರೆ, ವಿಜಯ್​ ಮಲ್ಯಗೆ ಒಂದೇ ಒಂದು ರೂಪಾಯಿ ಸಿಗುವುದಿಲ್ಲ. ಏಕೆಂದರೆ, ಮಾಜಿ ಮಾಲೀಕ ಅನ್ನೋದು ಬಿಟ್ಟರೆ ವಿಜಯ್​ ಮಲ್ಯಗೂ ಆರ್​ಸಿಬಿಗೂ ಪ್ರಸ್ತುತ ಯಾವುದೇ ಸಂಬಂಧವಿಲ್ಲ. 2016 ರಲ್ಲಿ ಹಣಕಾಸಿನ ಹಗರಣದಲ್ಲಿ ಸಿಲುಕಿದ ವಿಜಯ್​ ಮಲ್ಯ ದೇಶವನ್ನು ತೊರೆದರು. ಅಲ್ಲದೆ, ಆರ್​ಸಿಬಿ ಮಾಲೀಕತ್ವವನ್ನು ಯುನೈಟೆಡ್​ ಕಿಂಗ್​ಡಮ್​ ಮೂಲದ ಡಿಯಾಜಿಯೊ ಕಂಪನಿಯ ಅಂಗಸಂಸ್ಥೆ ಯುನೈಟೆಡ್​ ಸ್ಪಿರಿಟ್ಸ್​ ಲಿಮಿಟೆಡ್​ಗೆ ವರ್ಗಾವಣೆ ಮಾಡಿದರು. ಅಲ್ಲಿಂದಾಚೆಗೆ ಅವರು ತಂಡದ ಮೇಲಿನ ನಿಯಂತ್ರಣವನ್ನೇ ಕಳೆದುಕೊಂಡರು.
ಇದನ್ನೂ ಓದಿ: ರಾಜಸ್ಥಾನ ರಾಯಲ್ಸ್​ ಪರ ಆಡಿದ್ದ ಆಟಗಾರ ಇದೀಗ RCBಯ ನೂತನ ಚೇರ್ಮನ್: ಯಾರು ಈ ಆರ್ಯಮಾನ್​ ಬಿರ್ಲಾ​?

ಪೂರ್ಣ ಷೇರು ಮಾರಿದ ಡಿಯಾಜಿಯೊ

ಯುನೈಟೆಡ್ ಸ್ಪಿರಿಟ್ಸ್ ಲಿಮಿಟೆಡ್, ಆರ್‌ಸಿಬಿ ಫ್ರಾಂಚೈಸಿಯ 100 ರಷ್ಟು ಷೇರನ್ನು ಆದಿತ್ಯ ಬಿರ್ಲಾ ಗ್ರೂಪ್, ಟೈಮ್ಸ್ ಆಫ್ ಇಂಡಿಯಾ ಗ್ರೂಪ್, ಬೋಲ್ಟ್ ವೆಂಚರ್ಸ್ ಮತ್ತು ಬ್ಲಾಕ್‌ಸ್ಟೋನ್ ನೇತೃತ್ವದ ಒಕ್ಕೂಟಕ್ಕೆ $1.78 ಬಿಲಿಯನ್ (ಸುಮಾರು 16,660 ಕೋಟಿ) ಗೆ ಮಾರಾಟ ಮಾಡಿದೆ. 2008 ರಲ್ಲಿ ಮಲ್ಯ ಅವರು 446 ಕೋಟಿ ರೂ.ಗೆ ಆರ್​ಸಿಬಿ ತಂಡವನ್ನು ಖರೀದಿ ಮಾಡಿದ್ದರು. ಅದರ ಮೌಲ್ಯ ಇಂದು 1,500 ರಷ್ಟು ಹೆಚ್ಚಳವಾಗಿದ್ದು, 16 ಸಾವಿರ ಕೋಟಿಗೆ ಮಾರಾಟವಾಗಿದೆ. ಆದರೆ, ಆರ್ಥಿಕ ಲಾಭವು ಸಂಪೂರ್ಣ ಯುನೈಟೆಡ್ ಸ್ಪಿರಿಟ್ಸ್/ಡಿಯಾಜಿಯೊಗೆ ಹೋಗಿದೆ. ಮಾ.28 ರಿಂದ ಆರಂಭವಾಗಲಿರುವ 19ನೇ ಐಪಿಎಲ್​ ಆವೃತ್ತಿಗೆ ಡಿಯಾಜಿಯೋ ಕಂಪನಿಯೇ ಆರ್​ಸಿಬಿ ಮಾಲೀಕತ್ವ ಇರಲಿದೆ. ಮುಂದಿನ ಸೀಸನ್​ನಿಂದ ಆದಿತ್ಯ ಬಿರ್ಲಾ ಗ್ರೂಪ್​ಗೆ ಮಾಲೀಕತ್ವ ಹಸ್ತಾಂತರಗೊಳ್ಳಲಿದೆ. 
ಅಂದಹಾಗೆ, 19ನೇ ಆವೃತ್ತಿಯು ಐಪಿಎಲ್​, ಮಾರ್ಚ್ 28ರಂದು ಆರಂಭವಾಗಲಿದೆ. ಉದ್ಘಾಟನಾ ಪಂದ್ಯದಲ್ಲಿ ಹಾಲಿ ಚಾಂಪಿಯನ್ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ತನ್ನ ತವರು ಕ್ರೀಡಾಂಗಣದಲ್ಲಿ ಸನ್‌ರೈಸರ್ಸ್ ಹೈದರಾಬಾದ್ ತಂಡವನ್ನು ಎದುರಿಸಲಿದೆ. ಈ ಪಂದ್ಯ ಸಂಜೆ 7.30ಕ್ಕೆ ಬೆಂಗಳೂರಿನ ಎಂ. ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ನಡೆಯಲಿದೆ, (ಏಜೆನ್ಸೀಸ್​).