ಆರ್ಸಿಬಿಗೆ ಇಂದು ಎಲ್ಎಸ್ಜಿ ಸವಾಲು
ಲಖನೌ: ಹಾಲಿ ಚಾಂಪಿಯನ್ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ (RCB) ಐಪಿಎಲ್ (IPL) 19ನೇ ಆವೃತ್ತಿಯಲ್ಲಿ ಒಂದು ವಾರದ ವಿರಾಮದ ಬಳಿಕ ಮರಳಿ ಕಣಕ್ಕಿಳಿಯಲು ಸಜ್ಜಾಗಿದ್ದು, ಗೆಲುವಿನ ಲಯಕ್ಕೂ ಮರಳುವ ಹಂಬಲದಲ್ಲಿದೆ. ಆರ್ಸಿಬಿ ತಂಡ ಏಕನಾ ಸ್ಟೇಡಿಯಂನಲ್ಲಿ ಗುರುವಾರ ನಡೆಯಲಿರುವ ಹಾಲಿ ಆವೃತ್ತಿಯ 50ನೇ ಪಂದ್ಯದಲ್ಲಿ ಲಖನೌ ಸೂಪರ್ಜೈಂಟ್ಸ್ (LSG) ತಂಡವನ್ನು ಎದುರಿಸಲಿದೆ. ಕಳೆದ ತಿಂಗಳು ಬೆಂಗಳೂರಿನಲ್ಲಿ ನಡೆದಿದ್ದ ಮೊದಲ ಮುಖಾಮುಖಿಯಲ್ಲಿ ಸುಲಭವಾಗಿ ಗೆದ್ದಿದ್ದ ರಜತ್ ಪಾಟೀದಾರ್ ಪಡೆ ಈ ಬಾರಿಯೂ ಅದೇ ಫಲಿತಾಂಶ ಪುನರಾವರ್ತಿಸುವ ವಿಶ್ವಾಸದಲ್ಲಿದೆ.
ಕಳೆದ ವಾರ (ಏ.30) ಅಹಮದಾಬಾದ್ನಲ್ಲಿ ಗುಜರಾತ್ ಟೈಟಾನ್ಸ್ ಎದುರು ಆಡಿದ ಕೊನೇ ಪಂದ್ಯದಲ್ಲಿ ಸೋತಿದ್ದ ಆರ್ಸಿಬಿ, ಲಖನೌದಲ್ಲಿ ಗೆಲುವಿನ ಹಾದಿಗೆ ಮರಳಬೇಕಿದೆ. ಗುಜರಾತ್ ಎದುರು ಬ್ಯಾಟಿಂಗ್ ವೈಫಲ್ಯದಿಂದ 155 ರನ್ಗಳ ಸಾಧಾರಣ ಮೊತ್ತಕ್ಕೆ ಕುಸಿದರೂ, 6 ವಿಕೆಟ್ ಕಬಳಿಸಿ ಬೌಲಿಂಗ್ನಲ್ಲಿ ಉತ್ತಮ ಪ್ರತಿರೋಧವನ್ನೇ ತೋರಿತ್ತು. ಇದೀಗ ಆರ್ಸಿಬಿ ಇನ್ನೊಂದು ಗೆಲುವು ಸಾಧಿಸಿದರೆ ಪ್ಲೇಆಫ್ ಗೆ ಒಂದು ಕಾಲು ಇಡಬಹುದಾಗಿದೆ.
ಲಖನೌ ತಂಡ ಕಳೆದ 6 ಪಂದ್ಯಗಳಲ್ಲೂ ಸೋತಿದ್ದು, ಕೊನೇ ಗೆಲುವು ಕಂಡು 28 ದಿನಗಳೇ ಕಳೆದಿವೆ. ಕಡೇ ಪಂದ್ಯದಲ್ಲಿ ಮುಂಬೈ ಎದುರು 228 ರನ್ ಪೇರಿಸಿಯೂ ಅದನ್ನು ರಕ್ಷಿಸಿಕೊಳ್ಳಲು ಲಖನೌ ವಿಫಲವಾಗಿತ್ತು. ಇನ್ನು ತವರಿನ ಏಕನಾದಲ್ಲಿ ಆಡಿರುವ ಕಳೆದ 4 ಪಂದ್ಯಗಳಲ್ಲೂ ಸೋಲು ಅನುಭವಿಸಿದೆ. ಪ್ರಮುಖ ಬ್ಯಾಟರ್ಗಳಾದ ಮಿಚೆಲ್ ಮಾರ್ಷ್, ಏಡನ್ ಮಾರ್ಕ್ರಮ್, ನಿಕೋಲಸ್ ಪೂರನ್, ರಿಷಭ್ ಪಂತ್ ಸ್ಥಿರ ನಿರ್ವಹಣೆ ತೋರಲು ವಿಲರಾಗಿದ್ದಾರೆ. ಭುವನೇಶ್ವರ್-ಹ್ಯಾಸಲ್ವುಡ್ರಂಥ ಅನುಭವಿ ವೇಗಿಗಳನ್ನು ಹೊಂದಿರುವ ಆರ್ಸಿಬಿ ಬೌಲಿಂಗ್ ವಿಭಾಗ ಲಖನೌಗೆ ಇನ್ನಷ್ಟು ಕಠಿಣ ಸವಾಲೊಡ್ಡಲಿದೆ.
ಲಖನೌ ಪರ ಯುವ ವೇಗಿಗಳಾದ ಪ್ರಿನ್ಸ್ ಯಾದವ್ (13) ಮತ್ತು ಮೊಹ್ಸಿನ್ ಖಾನ್ (10) ಗಮನಸೆಳೆದಿದ್ದರೂ, ಅನುಭವಿ ವೇಗಿ ಮೊಹಮದ್ ಶಮಿ ಉತ್ತಮ ಆರಂಭದ ಬಳಿಕ ದುಬಾರಿ ಆಗುತ್ತಿದ್ದಾರೆ.
ಗುಜರಾತ್ ಎದುರು ಒಂದು ಹಂತದಲ್ಲಿ 2 ವಿಕೆಟ್ಗೆ 79 ರನ್ ಗಳಿಸಿ ಸುಸ್ಥಿತಿಯಲ್ಲೇ ಇದ್ದ ಆರ್ಸಿಬಿ ನಂತರ ತಂಡದ ಮೊತ್ತ 96 ರನ್ ಆಗುವಷ್ಟರಲ್ಲಿ ಮತ್ತೆ 3 ವಿಕೆಟ್ ಕಳೆದುಕೊಂಡು ದಿಢೀರ್ ಕುಸಿದಿತ್ತು. ಮಧ್ಯಮ ಕ್ರಮಾಂಕದ ವೈಫಲ್ಯ ಒಂದೆಡೆ ಆದರೆ, ಫಿಲ್ ಸಾಲ್ಟ್ ಕೈಬೆರಳಿನ ಗಾಯದಿಂದಾಗಿ ಟೂರ್ನಿಯಿಂದ ಬಹುತೇಕ ಹೊರಬಿದ್ದಿರುವುದು ಕೂಡ ಹಿನ್ನಡೆ ತಂದಿದೆ. ಅವರ ಸ್ಥಾನದಲ್ಲಿ ಕಳೆದ 3 ಪಂದ್ಯ ಆಡಿರುವ ಜೇಕಬ್ ಬೆಥೆಲ್ 20ರ ಗಡಿ ದಾಟಿಲ್ಲ. ಇದರಿಂದ ಆರ್ಸಿಬಿ ಆರಂಭಿಕನ ಸ್ಥಾನಕ್ಕೆ ಇನ್ನೋರ್ವ ಆಯ್ಕೆಯಾಗಿರುವ ಇಂಗ್ಲೆಂಡ್ನವರೇ ಆದ ಜೋರ್ಡನ್ ಕಾಕ್ಸ್ ಕಣಕ್ಕಿಳಿಸಿದರೂ ಅಚ್ಚರಿ ಇಲ್ಲ. ವಿರಾಟ್ ಕೊಹ್ಲಿ (379), ದೇವದತ್ ಪಡಿಕ್ಕಲ್ (282) ಮತ್ತು ನಾಯಕ ರಜತ್ ಪಾಟೀದಾರ್ (257) ಈಗಾಗಲೆ ರನ್ಗಳಿಕೆಯಲ್ಲಿ ಮುಂದಿದ್ದರೂ, ಮಧ್ಯಮ ಕ್ರಮಾಂಕದಲ್ಲಿ ಪ್ರಮುಖವಾಗಿ ವಿಕೆಟ್ ಕೀಪರ್ ಜಿತೇಶ್ ಶರ್ಮ (63) ವೈಫಲ್ಯ ಹಿನ್ನಡೆ ತಂದಿದೆ.
ಆರ್ಸಿಬಿ ತಂಡ ಇದುವರೆಗೆ ಆಡಿರುವ 9 ಪಂದ್ಯಗಳಲ್ಲಿ 6 ಜಯ, 3 ಸೋಲಿನೊಂದಿಗೆ ಪ್ಲೇಆಫ್ ಲೆಕ್ಕಾಚಾರದಲ್ಲಿ ಮುಂಚೂಣಿಯಲ್ಲೇ ಇದೆ. ಬಲಿಷ್ಠ ರನ್ರೇಟ್ ಕೂಡ ಆರ್ಸಿಬಿಗೆ ಬಲ ತುಂಬಿದೆ. ಉಳಿದ 5ರಲ್ಲಿ 2ರಲ್ಲಿ ಗೆದ್ದರೂ ಆರ್ಸಿಬಿ ಪ್ಲೇಆಫ್ಗೇರಲಿದೆ. ಉಳಿದ 3&4 ಪಂದ್ಯ ಗೆದ್ದರೆ ಅಗ್ರ 2ರೊಳಗೆ ಸ್ಥಾನ ಪಡೆಯುವ ಅವಕಾಶವೂ ಇದೆ. ಮತ್ತೊಂದೆಡೆ ಲಖನೌ ತಂಡ ಇದುವರೆಗೆ ಆಡಿದ 9 ಪಂದ್ಯಗಳಲ್ಲಿ 7 ಸೋಲು, 2 ಜಯ ಕಂಡು ಪ್ಲೇಆ್ ರೇಸ್ನಿಂದ ಬಹುತೇಕ ಹೊರಬಿದ್ದಿದೆ. ಈ ಪಂದ್ಯದಲ್ಲೂ ಸೋತರೆ ರಿಷಭ್ ಪಂತ್ ಅಧಿಕೃತವಾಗಿ ಗೇಟ್ಪಾಸ್ ಪಡೆಯಲಿದೆ. ಜತೆಗೆ ಅಂಕಪಟ್ಟಿಯ ಕೊನೇ ಸ್ಥಾನವನ್ನು ತಪ್ಪಿಸಿಕೊಳ್ಳುವುದು ಕೂಡ ಲಖನೌಗೆ ಕಠಿಣ ಸವಾಲೆನಿಸಿದೆ.
ನೇರಪ್ರಸಾರ: ಸ್ಟಾರ್ ಸ್ಪೋರ್ಟ್ಸ್, ಜಿಯೋ ಹಾಟ್ಸ್ಟಾರ್
78: ವಿರಾಟ್ ಕೊಹ್ಲಿ ಇನ್ನು 78 ರನ್ ಗಳಿಸಿದರೆ ಟಿ20 ಕ್ರಿಕೆಟ್ನಲ್ಲಿ 14 ಸಾವಿರ ರನ್ ಪೂರೈಸಿದ ಮೊದಲ ಭಾರತೀಯ ಮತ್ತು ವಿಶ್ವದ 6ನೇ ಬ್ಯಾಟರ್ ಎನಿಸಲಿದ್ದಾರೆ. ಕ್ರಿಸ್ ಗೇಲ್ (15,562), ಕೈರಾನ್ ಪೊಲ್ಲಾರ್ಡ್ (14,482), ಅಲೆಕ್ಸ್ ಹ್ಯಾಲ್ಸ್ (14,449), ಡೇವಿಡ್ ವಾರ್ನರ್ (14,284) ಮತ್ತು ಜೋಸ್ ಬಟ್ಲರ್ (14,180) ಹಿಂದಿನ ಸಾಧಕರು.
*200: ಭುವನೇಶ್ವರ್ ಕುಮಾರ್ ಐಪಿಎಲ್ನಲ್ಲಿ 200 ಪಂದ್ಯ ಆಡಿದ 12ನೇ ಆಟಗಾರ ಎನಿಸಲಿದ್ದಾರೆ. ಅವರು ಆರ್ಸಿಬಿ, ಪುಣೆ ವಾರಿಯರ್ಸ್ ಮತ್ತು ಸನ್ರೈಸರ್ಸ್ ಪರ ಈ ಪಂದ್ಯಗಳನ್ನು ಆಡಿದ್ದಾರೆ.