ಈ ಮಿಸ್ಟೇಕ್ಸ್​ ರಿಪೀಟ್​​ ಮಾಡೋದಿಲ್ಲ... ಗುಜರಾತ್​ ಟೈಟನ್ಸ್ ವಿರುದ್ಧ ಗೆದ್ದರೂ ರಜತ್ ಪಾಟಿದಾರ್ ಬೇಸರದ ಮಾತು ​

RCB vs GT: ನಿನ್ನೆ (ಏ.24) ಬೆಂಗಳೂರಿನ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಕೊನೇ ಐಪಿಎಲ್​ 19ನೇ ಆವೃತ್ತಿಯ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ರೋಚಕ ಜಯ ಸಾಧಿಸಿತು.    

ಗುಜರಾತ್ ಟೈಟಾನ್ಸ್ ವಿರುದ್ಧದ ಪಂದ್ಯದಲ್ಲಿ 5 ವಿಕೆಟ್‌ಗಳಿಂದ ಆರ್​ಸಿಬಿ ಮತ್ತೊಮ್ಮೆ ತವರಿನಲ್ಲಿ ಗೆದ್ದು ಬೀಗಿತು. ಈ ಸೀಸನ್​ನಲ್ಲಿ ಆರ್‌ಸಿಬಿಗೆ ಇದು ಐದನೇ ಗೆಲುವು ಎಂಬುದು ಗಮನಾರ್ಹ. ತಂಡದ ಪರ ಅದ್ಭುತ ಬ್ಯಾಟಿಂಗ್ ಪ್ರದರ್ಶನ ತೋರಿದ ವಿರಾಟ್​ ಕೊಹ್ಲಿ ಹಾಗೂ ದೇವದತ್ತ ಪಡಿಕ್ಕಲ್​ ಮತ್ತು ಬೌಲರ್​ಗಳು ಮಾಡಿದ ಕಮಾಲ್​ನಿಂದ ಆರ್​ಸಿಬಿಗೆ ನಿರೀಕ್ಷಿಸಿದ ಗೆಲುವು ಸಿಕ್ಕಿತು. ಪಂದ್ಯದಲ್ಲಿ ಜಯ ಸಾಧಿಸಿದ ಬೆನ್ನಲ್ಲೇ ಮಾತನಾಡಿದ ಆರ್‌ಸಿಬಿ ನಾಯಕ ರಜತ್ ಪಟಿದಾರ್, ಕೆಲವು ಕುತೂಹಲಕಾರಿ ಕಾಮೆಂಟ್​ಗಳನ್ನು ಮಾಡಿದ್ದಾರೆ. 

ಈ ಪಂದ್ಯವನ್ನು ಗೆದ್ದಿದ್ದೇವೆ. ಆದರೆ, ಇದರಿಂದ ಕಲಿಯಲು ಹಲವು ವಿಷಯಗಳಿವೆ. ಆರ್‌ಸಿಬಿ ಬೌಲರ್‌ಗಳು ಇಂದಿನ ಪಂದ್ಯದಲ್ಲಿ ಅಪಾರ ಕೊಡುಗೆಯನ್ನು ನೀಡಿದರು. ಭುವನೇಶ್ವರ್​​ ಕುಮಾರ್​ ಮತ್ತು ಜೋಶ್​ ಹೇಜಲ್‌ವುಡ್ ಪವರ್ ಪ್ಲೇನಲ್ಲಿ ತಮ್ಮ ಎಲ್ಲಾ ಅನುಭವವನ್ನು ಬಳಸಿಕೊಂಡು, ಜಿಟಿ ಬ್ಯಾಟರ್​ಗಳನ್ನು ಕಟ್ಟಿಹಾಕುವಲ್ಲಿ ಯಶಸ್ವಿಯಾದರು ಎಂದರು. 

ಮಿಡಲ್​ ಓವರ್‌ಗಳಲ್ಲಿ ಸುಯಾಶ್ ಉತ್ತಮವಾಗಿ ಬೌಲಿಂಗ್ ಮಾಡಿದರು. ಡೆತ್ ಓವರ್‌ಗಳಲ್ಲಿ, ರಸಿಕ್, ಭುವಿ ಮತ್ತು ಹೇಜಲ್‌ವುಡ್ ಅದ್ಭುತ ಯಾರ್ಕರ್‌ಗಳನ್ನು ಎಸೆದರು. ಜಿಟಿಯನ್ನು 200 ಅಥವಾ 220 ರನ್​ಗೆ ಸೀಮಿತಗೊಳಿಸುವುದು ನಮ್ಮ ಗುರಿಯಾಗಿತ್ತು. ಇನ್ನು ಚೇಸಿಂಗ್​ನಲ್ಲಿ ಜಾಕೆಬ್​ ಬೆಥೆಲ್, ವಿರಾಟ್​ ಕೊಹ್ಲಿ ಮತ್ತು ಪಡಿಕ್ಕಲ್ ಅವರ ರನ್​ಗಳ ಪಾಲುದಾರಿಕೆ ಪಂದ್ಯವನ್ನು ನಮ್ಮ ಕಡೆಗೆ ತಿರುಗಿಸಿತು ಎಂದು ಹೇಳಿದರು.

ದೇವದತ್ ಪಡಿಕ್ಕಲ್ ಆಡಿದ ಇನ್ನಿಂಗ್ಸ್ ನೋಡಲು ತುಂಬಾ ಚೆನ್ನಾಗಿತ್ತು. ನಮ್ಮ ತಂಡವು ಗೆಲುವು ಸಾಧಿಸಿದರೂ, ಕೆಲವು ತಪ್ಪುಗಳನ್ನು ಮಾಡಿದ್ದೇವೆ. ಮಿಡಲ್​ ಓವರ್‌ಗಳಲ್ಲಿ ವಿಕೆಟ್‌ಗಳ ನಷ್ಟವು ಒಂದು ಹಂತದಲ್ಲಿ ತಂಡವನ್ನು ತೀವ್ರ ಸಂಕಷ್ಟಕ್ಕೆ ಸಿಲುಕಿಸಿತು. ಈ ಪಂದ್ಯದಿಂದ ನಾವು ಸಾಕಷ್ಟು ಪಾಠಗಳನ್ನು ಕಲಿತಿದ್ದೇವೆ ಮತ್ತು ಮುಂದಿನ ಪಂದ್ಯಗಳಲ್ಲಿ ಈ ತಪ್ಪುಗಳನ್ನು ರಿಪೀಟ್​ ಮಾಡದಿರಲು ಪ್ರಯತ್ನಿಸುತ್ತೇವೆ ಎಂದರು.

ಮೊದಲು ಬ್ಯಾಟಿಂಗ್ ಮಾಡಿದ ಗುಜರಾತ್ 20 ಓವರ್‌ಗಳಲ್ಲಿ 5 ವಿಕೆಟ್‌ಗಳ ನಷ್ಟಕ್ಕೆ 205 ರನ್ ಗಳಿಸಿತು. ಜಿಟಿ ಬ್ಯಾಟ್ಸ್‌ಮನ್‌ಗಳಲ್ಲಿ, ಸಾಯಿ ಸುದರ್ಶನ್ (100 ರನ್​, 58 ಎಸೆತಗಳಲ್ಲಿ 11 ಬೌಂಡರಿ, 5 ಸಿಕ್ಸರ್) ಶತಕ ಗಳಿಸಿದರು. ಶುಭಮನ್ ಗಿಲ್ (32) ಮತ್ತು ಜಾಸ್​ ಬಟ್ಲರ್ (25) ಅಮೋಘ ಪ್ರದರ್ಶನ ನೀಡಿದರು. ಆರ್‌ಸಿಬಿ ಬೌಲರ್‌ಗಳಲ್ಲಿ, ಭುವನೇಶ್ವರ್ ಕುಮಾರ್, ಜೋಶ್ ಹೇಜಲ್‌ವುಡ್ ಮತ್ತು ಸುಯಾಶ್ ಶರ್ಮಾ ತಲಾ ಒಂದು ವಿಕೆಟ್ ಪಡೆದರು.

206 ರನ್‌ಗಳ ಗುರಿಯನ್ನು ಬೆನ್ನತ್ತಿದ ಆರ್​ಸಿಬಿ, 18.5 ಓವರ್‌ಗಳಲ್ಲಿ 5 ವಿಕೆಟ್‌ಗಳ ನಷ್ಟಕ್ಕೆ ಪಂದ್ಯವನ್ನು ವಶಪಡಿಸಿಕೊಂಡಿತು. ಆರ್‌ಸಿಬಿ ಪರ ವಿರಾಟ್​ ಕೊಹ್ಲಿ (81 ರನ್​, 44 ಎಸೆತಗಳು, 8 ಬೌಂಡರಿ, 4 ಸಿಕ್ಸರ್‌) ಮತ್ತು ದೇವದತ್ತ ಪಡಿಕ್ಕಲ್ (55 ರನ್​, 27 ಎಸೆತಗಳು, 2 ಬೌಂಡರಿ, 6 ಸಿಕ್ಸರ್‌) ಅರ್ಧಶತಕಗಳನ್ನು ಗಳಿಸಿದರು. ಗುಜರಾತ್ ಪರ ರಶೀದ್ ಖಾನ್ ಎರಡು ವಿಕೆಟ್ ಪಡೆದರೆ, ಮೊಹಮ್ಮದ್​ ಸಿರಾಜ್, ಜೇಸನ್​ ಹೋಲ್ಡರ್ ಮತ್ತು ಮಾನವ್ ಸುತಾರ್ ತಲಾ ಒಂದು ವಿಕೆಟ್ ಪಡೆದರು,(ಏಜೆನ್ಸೀಸ್).