ರಣಜಿ ಟ್ರೋಫಿ: ಕೆಎಲ್​ ರಾಹುಲ್​ ಶತಕ, ಸೆಮಿಫೈನಲ್​​ಗೇರಿದ ಕರ್ನಾಟಕ

ಬಿಕೆಸಿ ಗ್ರೌಂಡ್​ನಲ್ಲಿ ಸೋಮವಾರ ಮುಕ್ತಾಯಗೊಂಡ ಪಂದ್ಯದಲ್ಲಿ ದೇವದತ್​ ಪಡಿಕ್ಕಲ್​ ಬಳಗ ಆತಿಥೇಯರ 325 ರನ್​ ಸವಾಲಿಗೆ ಪ್ರತಿಯಾಗಿ 2 ವಿಕೆಟ್​ಗೆ 113 ರನ್​ಗಳಿಂದ 4ನೇ ದಿನದಾಟ ಆರಂಭಿಸಿತು. ಬಿರುಸಿನ ಆಟದ ಮೂಲಕ ಮುಂಬೈ ಬೌಲರ್​ಗಳನ್ನು ಸತಾಯಿಸಿದ 8 ಬಾರಿಯ ಚಾಂಪಿಯನ್​ ಕರ್ನಾಟಕ ತಂಡ ಭೋಜನ ವಿರಾಮದ ಬಳಿಕ 73.4 ಓವರ್​ಗಳಲ್ಲಿ 6 ವಿಕೆಟ್​ಗೆ 325 ರನ್​ ಗಳಿಸಿ ಜಯಭೇರಿ ಬಾರಿಸಿತು. 4ನೇ ದಿನ ಆಡಿದ 44.4 ಓವರ್​ಗಳಲ್ಲಿ 212 ರನ್​ ಅಂದರೆ 4.77ರ ಸರಾಸರಿಯಲ್ಲಿ ರಾಜ್ಯ ತಂಡ ಅಮೋ ಚೇಸಿಂಗ್​ ಮಾಡಿ ಗೆಲುವು ಒಲಿಸಿಕೊಂಡಿತು. ಮೊದಲ ಇನಿಂಗ್ಸ್​ನಲ್ಲಿ ಭಾರಿ ಮುನ್ನಡೆ ಪಡೆಯುವ ಅವಕಾಶ ಕೈಚೆಲ್ಲಿದ್ದ ಪಡಿಕ್ಕಲ್​ ಬಳಗ ಈ ಬಾರಿ ಅದರಿಂದ ಪಾಠ ಕಲಿತಂತೆ ಕಂಡಿತು.

ಕರ್ನಾಟಕ 2022-23ರಲ್ಲಿ ಕೊನೆಯದಾಗಿ ಸೆಮಿಫೈನಲ್​ಗೇರಿತ್ತು. 2014-15ರಲ್ಲಿ ರಾಜ್ಯ ತಂಡ ಕೊನೆಯದಾಗಿ ಫೈನಲ್​ಗೇರಿತ್ತು ಮತ್ತು ಪ್ರಶಸ್ತಿ ಒಲಿಸಿಕೊಂಡಿತ್ತು.

ಬೆಳಗ್ಗೆ 60 ರನ್​ಗಳಿಂದ ದಿನದಾಟ ಆರಂಭಿಸಿದ ಕೆಎಲ್​ ರಾಹುಲ್​ (KL Rahul), ಜವಾಬ್ದಾರಿಯುತ ಬ್ಯಾಟಿಂಗ್​ ಮುಂದುವರಿಸಿ 147 ಎಸೆತಗಳಲ್ಲಿ ಶತಕ ಪೂರೈಸಿದರು. ಕರುಣ್​ ನಾಯರ್​ (13) ದಿನದ 2ನೇ ಓವರ್​ನಲ್ಲೇ ಔಟಾದರು. ಆಗ ರಾಹುಲ್​ ಜತೆಗೂಡಿದ ಆರ್​. ಸ್ಮರಣ್​ 4ನೇ ವಿಕೆಟ್​ಗೆ 169 ಎಸೆತಗಳಲ್ಲಿ 147 ರನ್​ ಸೇರಿಸಿ ರಾಜ್ಯದ ಗೆಲುವಿನ ಹಾದಿ ಸುಗಮಗೊಳಿಸಿದರು. ಭೋಜನ ವಿರಾಮದವರೆಗೂ ಈ ಜೋಡಿ ಮುಂಬೈ ಬೌಲರ್​ಗಳಿಗೆ ಸವಾಲಾಗಿ ನಿಂತಿತು. ಆದರೆ ವಿರಾಮದ ನಂತರ 3ನೇ ಎಸೆತದಲ್ಲೇ ರಾಹುಲ್​, ತುಷಾರ್​ ದೇಶಪಾಂಡೆ ಎಸೆತದಲ್ಲಿ ಔಟಾದರು. ಆಗ ಕರ್ನಾಟಕ ಗೆಲುವಿನಿಂದ 59 ರನ್​ ದೂರವಿತ್ತು.

ರಾಹುಲ್​ ಔಟಾದ ಬಳಿಕ ಮುಂಬೈ ತಿರುಗೇಟು ನೀಡಲು ಯತ್ನಿಸಿತು. ಶ್ರೇಯಸ್​ ಗೋಪಾಲ್​ (1) ಮತ್ತು ವಿಕೆಟ್​ ಕೀಪರ್​-ಬ್ಯಾಟರ್​ ಕೃತಿಕ್​ ಕೃಷ್ಣ (2) ಬೇಗನೆ ಔಟಾದರು. 19 ರನ್​ ಅಂತರದಲ್ಲಿ ಮುಂಬೈ 3 ವಿಕೆಟ್​ ಕಬಳಿಸಿತು. ಆದರೆ ಆಗ 22 ವರ್ಷದ ಸ್ಮರಣ್​ ಒಂದೆಡೆ ಭದ್ರವಾಗಿ ನೆಲೆಯೂರಿದರೆ, ವಿದ್ಯಾಧರ್​ ಪಾಟೀಲ್​ (31*ರನ್​, 30 ಎಸೆತ, 3 ಬೌಂಡರಿ, 1 ಸಿಕ್ಸರ್​) ಬಿರುಸಿನಾಟದೊಂದಿಗೆ ಸಮರ್ಥ ಸಾಥ್​ ನೀಡಿದರು. ಇವರಿಬ್ಬರು ಮುರಿಯದ 7ನೇ ವಿಕೆಟ್​ಗೆ 48 ಎಸೆತಗಳಲ್ಲಿ 40 ರನ್​ ಸೇರಿಸಿ ರಾಜ್ಯವನ್ನು ಗೆಲುವಿನ ದಡ ಸೇರಿಸಿದರು.

ಮುಂಬೈ: 120 ಮತ್ತು 377, ಕರ್ನಾಟಕ: 173 ಮತ್ತು 73.4 ಓವರ್​ಗಳಲ್ಲಿ 6 ವಿಕೆಟ್​ಗೆ 325 (ಕೆಎಲ್​ ರಾಹುಲ್​ 130, ಕರುಣ್​ 13, ಸ್ಮರಣ್​ 83*, ಶ್ರೇಯಸ್​ 1, ಕೃತಿಕ್​ ಕೃಷ್ಣ 2, ವಿದ್ಯಾಧರ್​ 31*, ಶಾರ್ದೂಲ್​ 55ಕ್ಕೆ 2, ತುಷಾರ್​ 67ಕ್ಕೆ 2, ತನುಷ್​ ಕೋಟ್ಯಾನ್​ 77ಕ್ಕೆ 2). ಪಂದ್ಯಶ್ರೇಷ್ಠ: ಕೆಎಲ್​ ರಾಹುಲ್​.

*24: ಕೆಎಲ್​ ರಾಹುಲ್​ ಪ್ರಥಮ ದರ್ಜೆ ಕ್ರಿಕೆಟ್​ನಲ್ಲಿ 24ನೇ ಶತಕ ಸಿಡಿಸಿದರು.

ಕರ್ನಾಟಕ-ಮುಂಬೈ ನಡುವಿನ ಪಂದ್ಯದಲ್ಲಿ ಜಿದ್ದಾಜಿದ್ದಿನ ಕಾದಾಟ ಸಾಮಾನ್ಯ. ಮುಂಬೈ ದೇಶೀಯ ಕ್ರಿಕೆಟ್​ನ ಪ್ರಬಲ ತಂಡವೆನಿಸಿದ್ದರೂ, ರಾಜ್ಯ ತಂಡ ಇತ್ತೀಚೆಗೆ ವರ್ಷಗಳಲ್ಲಿ ಅದರ ವಿರುದ್ಧದ ಪ್ರಾಬಲ್ಯ ಮುಂದುವರಿಸಿದೆ. ರಾಜ್ಯ ತಂಡ ಗೆಲುವಿನ ಸನಿಹ ತಲುಪಿದಾಗ ಹತಾಸೆಗೊಂಡ ಮುಂಬೈ ವೇಗಿ ತುಷಾರ್​ ದೇಶಪಾಂಡೆ, ಆಕ್ರಮಣಕಾರಿ ಆಟದ ಮೂಲಕ ರಾಜ್ಯವನ್ನು ಬೇಗನೆ ಗೆಲುವಿನ ದಡ ಸೇರಿಸುವತ್ತ ಮುನ್ನಡೆದ ವಿದ್ಯಾಧರ್​ ಪಾಟೀಲ್​ ಜತೆ ಮಾತಿನ ಚಕಮಕಿ ನಡೆಸಿದರು. ಆಗ ಮುಂಬೈ ನಾಯಕ ಶಾರ್ದೂಲ್​ ಠಾಕೂರ್​ ಮತ್ತು ಅಂಪೈರ್​ಗಳು ಇಬ್ಬರನ್ನೂ ಸಮಾಧಾನ ಪಡಿಸಿದರು. ಅಂತಿಮವಾಗಿ ವಿದ್ಯಾಧರ್​, ತನುಷ್​ ಎಸೆತದಲ್ಲಿ ಡೀಪ್​ ಸ್ಕ್ವೇರ್​ಲೆಗ್​ನತ್ತ ಬೌಂಡರಿ ಬಾರಿಸಿ ರಾಜ್ಯವನ್ನು ಗೆಲ್ಲಿಸಿದರು.

*ನಮಗೆ ಯಶಸ್ವಿ ಚೇಸಿಂಗ್​ನ ವಿಶ್ವಾಸವಿತ್ತು. ಪಿಚ್​ನಿಂದ ಬ್ಯಾಟಿಂಗ್​ಗೆ ಸ್ವಲ್ಪಮಟ್ಟಿನ ನೆರವು ಸಿಗುವ ನಿರೀಕ್ಷೆಯೂ ಇತ್ತು. ಮುಂಬೈ ಮೇಲೆ ಒತ್ತಡ ಹೇರುವುದು ಅಗತ್ಯವಾಗಿತ್ತು. ಅದನ್ನೇ ನಾನು ಮತ್ತು ಮಯಾಂಕ್​ ಪ್ರಯತ್ನಿಸಿದೆವು.

*5: 2010ರ ರಣಜಿ ಫೈನಲ್​ನಲ್ಲಿ ಮುಂಬೈ ಎದುರು ಸೋತ ಬಳಿಕ ಕರ್ನಾಟಕ 8 ಮುಖಾಮುಖಿಗಳಲ್ಲಿ 5ರಲ್ಲಿ ಗೆದ್ದಿದ್ದು, 2ರಲ್ಲಿ ಇನಿಂಗ್ಸ್​ ಮುನ್ನಡೆ ಸಹಿತ ಡ್ರಾ ಕಂಡಿದೆ. 1ರಲ್ಲಿ ಮಾತ್ರ ಇನಿಂಗ್ಸ್​ ಹಿನ್ನಡೆ ಅನುಭವಿಸಿದೆ.

ಕರ್ನಾಟಕ ತಂಡ ಫೆಬ್ರವರಿ 15ರಿಂದ 19ರವರೆಗೆ ಡೆಹ್ರಾಡೂನ್​ನಲ್ಲಿ ನಡೆಯಲಿರುವ ಮೊದಲ ಸೆಮಿಫೈನಲ್​ ಪಂದ್ಯದಲ್ಲಿ ಆತಿಥೇಯ ಉತ್ತರಾಖಂಡ ತಂಡವನ್ನು ಎದುರಿಸಲಿದೆ. ಉತ್ತರಾಖಂಡ ತಂಡ ಎಂಟರ ಟ್ಟದಲ್ಲಿ ಜಾರ್ಖಂಡ್​ ವಿರುದ್ಧ ಇನಿಂಗ್ಸ್​ ಗೆಲುವು ಸಾಧಿಸಿ ಇದೇ ಮೊದಲ ಬಾರಿ ಉಪಾಂತ್ಯಕ್ಕೇರಿದೆ.

ವೇಗಿ ಔಕಿಬ್​ ನಬಿ (ಪಂದ್ಯದಲ್ಲಿ 110ಕ್ಕೆ 12 ವಿಕೆಟ್​) ಅಮೋಘ ಬೌಲಿಂಗ್​ ದಾಳಿಯ ನೆರವಿನಿಂದ ಜಮ್ಮು&ಕಾಶ್ಮೀರ ತಂಡ ಇಂದೋರ್​ನಲ್ಲಿ ನಡೆದ ಆತಿಥೇಯ ಮಧ್ಯಪ್ರದೇಶ ವಿರುದ್ಧದ ಕ್ವಾರ್ಟರ್​ಫೈನಲ್​ ಪಂದ್ಯದಲ್ಲಿ 56 ರನ್​ಗಳಿಂದ ಗೆಲುವು ದಾಖಲಿಸಿದೆ. ಈ ಮೂಲಕ ಜಮ್ಮು-ಕಾಶ್ಮೀರ ತಂಡ ರಣಜಿಗೆ ಪದಾರ್ಪಣೆ ಮಾಡಿ 67 ವರ್ಷಗಳ ಬಳಿಕ ಮೊದಲ ಬಾರಿ ಸೆಮಿಫೈನಲ್​ಗೇರಿದ ಸಾಧನೆ ಮಾಡಿದೆ. ಜಮ್ಮು&ಕಾಶ್ಮೀರ ಮೊದಲ ಇನಿಂಗ್ಸ್​ನಲ್ಲಿ 194 ರನ್​ ಗಳಿಸಿದ್ದರೆ, ಮಧ್ಯಪ್ರದೇಶ 152 ರನ್​ಗಳಿಗೆ ಕುಸಿದು 42 ರನ್​ ಮುನ್ನಡೆ ಬಿಟ್ಟುಕೊಟ್ಟಿತ್ತು. ಜಮ್ಮು&ಕಾಶ್ಮೀರ 2ನೇ ಸರದಿಯಲ್ಲಿ 248 ರನ್​ ಗಳಿಸಿ, 291 ರನ್​ ಗುರಿ ನೀಡಿತ್ತು. ಪ್ರತಿಯಾಗಿ ಮಧ್ಯಪ್ರದೇಶ ತಂಡ 234 ರನ್​ಗಳಿಗೆ ಕುಸಿಯಿತು. ಔಕಿಬ್​ ನಬಿ ಮೊದಲ ಇನಿಂಗ್ಸ್​ನಲ್ಲಿ 7 ಮತ್ತು 2ನೇ ಇನಿಂಗ್ಸ್​ನಲ್ಲಿ 5 ವಿಕೆಟ್​ ಕಬಳಿಸಿದರು. ಅವರು ಕಳೆದ ಐಪಿಎಲ್​ ಹರಾಜಿನಲ್ಲಿ ಗಮನಾರ್ಹ 8.40 ಕೋಟಿ ರೂ.ಗೆ ಡೆಲ್ಲಿ ಕ್ಯಾಪಿಟಲ್ಸ್​ ಪಾಲಾಗಿದ್ದರು.

ಬಂಗಾಳ ಬ್ಯಾಟರ್​ ಸುದೀಪ್​ ಕುಮಾರ್​ ರಾಮಿ (299 ರನ್​, 596 ಎಸೆತ, 31 ಬೌಂಡರಿ, 6 ಸಿಕ್ಸರ್​) ಪ್ರವಾಸಿ ಆಂಧ್ರ ವಿರುದ್ಧ ಕಲ್ಯಾಣಿಯಲ್ಲಿ ನಡೆಯುತ್ತಿರುವ ಕ್ವಾರ್ಟರ್​ಫೈನಲ್​ ಪಂದ್ಯದಲ್ಲಿ ಕೇವಲ 1 ರನ್​ನಿಂದ ತ್ರಿಶತಕವಂಚಿತರಾದರು. ಆಂಧ್ರ ಮೊದಲ ಇನಿಂಗ್ಸ್​ನಲ್ಲಿ 295 ರನ್​ ಗಳಿಸಿದ್ದರೆ, ಸುದೀಪ್​ ಸಾಹಸದಿಂದ ಬಂಗಾಳ 629 ರನ್​ ಗಳಿಸಿ 334 ರನ್​ಗಳ ಭಾರಿ ಮುನ್ನಡೆ ಸಾಧಿಸಿತು. ಆಂಧ್ರ 2ನೇ ಸರದಿಯಲ್ಲಿ 3 ವಿಕೆಟ್​ಗೆ 64 ರನ್​ ಗಳಿಸಿ ಇನಿಂಗ್ಸ್​ ಸೋಲಿನ ಭೀತಿಯಲ್ಲಿದೆ. ಸುದೀಪ್​ ಪ್ರಥಮ ದರ್ಜೆ ಕ್ರಿಕೆಟ್​ನಲ್ಲಿ 299ಕ್ಕೆ ಔಟಾದ 3ನೇ ಬ್ಯಾಟರ್​ ಎನಿಸಿದರು. ನ್ಯೂಜಿಲೆಂಡ್​ನ ಮಾರ್ಟಿನ್​ ಕ್ರೋವ್​ (1991) ಮತ್ತು ಗ್ಲಾಮರ್​ಗನ್​ನ ಮೈಕ್​ ಪೊವೆಲ್​ (2009) ಮೊದಲಿಬ್ಬರು.