ಪ್ರೀತಿ ಜಿಂಟಾ ಮತ್ತು ಅರ್ಷದೀಪ್ ಸಿಂಗ್
ಚಂಡೀಗಢ: ನಿನ್ನೆ (ಏ.19) ನಡೆದ ಲಖನೌ ಸೂಪರ್ ಜೈಂಟ್ಸ್ ವಿರುದ್ಧ ಐಪಿಎಲ್ 19ನೇ ಆವೃತ್ತಿಯ ಪಂದ್ಯದಲ್ಲಿ ಪಂಜಾಬ್ ಕಿಂಗ್ಸ್ ಭರ್ಜರಿ ಗೆಲುವು ದಾಖಲಿಸಿತು. ಈ ಮೂಲಕ ಲೀಗ್ನಲ್ಲಿ ತನ್ನ ಸತತ ಗೆಲುವಿನ ಓಟವನ್ನು ಮುಂದುವರಿಸಿದೆ. 54 ರನ್ಗಳಿಂದ ಎಲ್ಎಸ್ಜಿಗೆ ಸೋಲಿನ ದಾರಿ ತೋರಿದ ಶ್ರೇಯಸ್ ಅಯ್ಯರ್ ಪಡೆಗೆ ಮೈದಾನದಲ್ಲಿ ಸಂಭ್ರಮವೋ ಸಂಭ್ರಮ. ಇದೇ ವೇಳೆ, ಬಾಲಿವುಡ್ ನಟಿಯ ಅಪ್ಪಟ ಅಭಿಮಾನಿಯೊಬ್ಬನ ದೃಶ್ಯ ಸದ್ಯ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.
20 ಓವರ್ನಲ್ಲಿ 7 ವಿಕೆಟ್ ನಷ್ಟಕ್ಕೆ ಪಂಜಾಬ್ ಕಿಂಗ್ಸ್ ಸೆಟ್ ಮಾಡಿದ 254 ರನ್ಗಳ ಬೃಹತ್ ಗುರಿಯನ್ನು ಬೆನ್ನತ್ತಿದ ಎಲ್ಎಸ್ಜಿ ಪಡೆಗೆ ಗೆಲುವು ಅತ್ಯಂತ ಕಠಿಣ ಎಂಬುದು ಸ್ಪಷ್ಟವಾಯಿತು. 5 ವಿಕೆಟ್ ಕಳೆದುಕೊಂಡು 200 ರನ್ ಗಳಿಸಿದ ಲಖನೌ ಸೂಪರ್ ಜೈಂಟ್ಸ್, ಕಡೆಗೂ ಶ್ರೇಯಸ್ ಅಯ್ಯರ್ ಪಡೆ ಎದುರು ಮಂಡಿಯೂರಿತು. ಈ ಪಂದ್ಯ ಮುಗಿದ ಬಳಿಕ ತಮ್ಮ ತಂಡದ ಓನರ್ ಜೊತೆ ಕೆಲ ಸಮಯ ಸಂಭಾಷಣೆ ನಡೆಸಿದ ಅರ್ಷದೀಪ್ ಸಿಂಗ್, ಸ್ಟಾರ್ ನಟಿಯಿಂದ ಅಪ್ಪುಗೆ ಪಡೆಯುತ್ತಿದ್ದಂತೆ ಮೈದಾದನಲ್ಲೇ ಕುಣಿದಾಡಿದರು.
ಮೊಹಮ್ಮದ್ ಶಮಿ, ಅರ್ಷದೀಪ್ ಮತ್ತು ಪ್ರೀತಿ ಜಿಂಟಾ, ಪಂದ್ಯದ ಬಳಿಕ ಮಾತುಕತೆಯಲ್ಲಿ ತೊಡಗಿದ್ದರು. ಈ ವೇಳೆ, ಅರ್ಷದೀಪ್ರನ್ನು ತಬ್ಬಿಕೊಂಡ ನಟಿ, ಶಭಾಷ್ಗಿರಿ ಕೊಟ್ಟರು. ಒಬ್ಬ ಫ್ಯಾನ್ ಬಾಯ್ ಕ್ಷಣವನ್ನು ನೆನಪಿಸಿದ ಪಂಜಾಬ್ ವೇಗಿ, ಖುಷಿಯಿಂದ ಮೈದಾನದಲ್ಲಿ ಸಂಭ್ರಮಿಸಿದ್ದು ನೋಡಿಗರ ಗಮನ ಸೆಳೆಯಿತು. ಸದ್ಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದೆ.