ಸರಣಿ ಸೋಲಿನಿಂದ ಛೀಮಾರಿ! ಟಿ20 ಟೂರ್ನಿಯಿಂದ ಹೊರಬಿದ್ದ ಬೆನ್ನಲ್ಲೇ ನಿವೃತ್ತಿ? ಪಾಕ್​ ನಾಯಕನ​ ಉತ್ತರ ವೈರಲ್​

ಕೊಲೊಂಬೊ: ನಿನ್ನೆ (ಫೆ.28) ಪಲ್ಲೆಕಲೆಯಲ್ಲಿ ನಡೆದ ಪಾಕಿಸ್ತಾನ ಮತ್ತು ಶ್ರೀಲಂಕಾ ನಡುವಿನ ಪಂದ್ಯದಲ್ಲಿ ಪಾಕ್​ ಹೀನಾಯ ಸೋಲು ಅನುಭವಿಸಿತು. ಟಿ20 ವಿಶ್ವಕಪ್​ ಟೂರ್ನಿಯ ನಿರ್ಣಾಯಕ ಸೂಪರ್-8 ಪಂದ್ಯದಲ್ಲಿ ಭಾರೀ ಮುಖಭಂಗ ಉಂಡ ಸಲ್ಮಾನ್ ಅಲಿ ಅಘಾ ಪಡೆಯ ಸೆಮಿಫೈನಲ್ ಕನಸು ಕಡೆಗೂ ಕಮರಿ ಹೋಯಿತು. ಈ ಸೋಲಿನಿಂದ ಕಂಗೆಟ್ಟ ಪಾಕ್ ತಂಡಕ್ಕೆ ತನ್ನ ದೇಶದ ಅಭಿಮಾನಿಗಳಿಂದ ಭಾರೀ ಟೀಕೆ, ಛೀಮಾರಿಗಳು ವ್ಯಕ್ತವಾಗಿವೆ. ಇದರ ಬೆನ್ನಲ್ಲೇ ನಾಯಕ ಸಲ್ಮಾನ್ ಅಲಿ ಅಘಾ ನಿವೃತ್ತಿ ಪ್ರಶ್ನೆಗಳು ಜೋರಾಗಿವೆ.

ಶ್ರೀಲಂಕಾ ವಿರುದ್ಧದ ಪಂದ್ಯದಲ್ಲಿ ಗೆದ್ದು ಖಂಡಿತ ಪಾಕಿಸ್ತಾನ ಸೆಮೀಸ್​​ಗೆ ಎಂಟ್ರಿಕೊಡಲಿದೆ ಎಂದೇ ಹಲವರು ಆಶಿಸಿದ್ದರು. ಆದರೆ, ಈ ಲೆಕ್ಕಾಚಾರಗಳನ್ನು ಲಂಕಾ ಪಡೆ ತಲೆಕೆಳಗಾಗಿಸಿತು. ಇದೀಗ ಟಿ20 ವಿಶ್ವಕಪ್​ ಟೂರ್ನಿಯಿಂದ ಹೊರಬಿದ್ದಿರುವ ಪಾಕ್​ ನಾಯಕ ಸಲ್ಮಾನ್ ಅಲಿ ಅಘಾ ನೋವಿನ ಮಾತಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ. ಹೀನಾಯ ಸೋಲಿನ ಬೆನ್ನಲ್ಲೇ ಬಾಬರ್​ ಅಜಮ್, ​ಸಲ್ಮಾನ್​ರನ್ನು ತಂಡದಿಂದ ಕಿತ್ತು ಬಿಸಾಡಬೇಕು ಎಂಬ ಕೂಗುಗಳು ಪಾಕಿಸ್ತಾನದಲ್ಲಿ ಜೋರಾಗಿವೆ. ಇದಕ್ಕೆ ಸಂಬಂಧಿಸಿದಂತೆ ಪತ್ರಕರ್ತರು ಕೇಳಿದ ಪ್ರಶ್ನೆಗಳಿಗೆ ಅಲಿ ಉತ್ತರಿಸಿದ್ದು ಹೀಗೆ.

ನಿಮ್ಮ ಕ್ಯಾಪ್ಟನ್ ಸ್ಥಾನದಿಂದ ಕೆಳಗಿಳಿಯುತ್ತೀರಾ ಅಥವಾ ಪಾಕಿಸ್ತಾನ ಕ್ರಿಕೆಟ್ ಮಂಡಳಿ ನಿಮ್ಮನ್ನು ತೆಗೆದುಹಾಕಲಿದೆಯೇ? ಎಂದು ಕೇಳಲಾಯಿತು. ಇದಕ್ಕೆ ನಗುತ್ತಲೇ ಕೂಲ್ ಆಗಿಯೇ ಉತ್ತರಿಸಿದ ಅಘಾ, ತವರಿಗೆ ಹೋದ ಮೇಲೆ ಇದೆಲ್ಲದರ ಬಗ್ಗೆ ಯೋಚಿಸಿ ಒಂದು ನಿರ್ಧಾರಕ್ಕೆ ಬರುತ್ತೇನೆ ಎಂದರು. ಈ ಮಧ್ಯೆ, ಹೆಡ್​ ಕೋಚ್ ಹೆಸನ್​ ಅವರ ನಿರ್ಧಾರವೇ ಅಂತಿಮನಾ? ನೀವಿಲ್ಲಿ ಡಮ್ಮಿ ಕ್ಯಾಪ್ಟನ್ ಆದ್ರಾ? ಎಂಬ ಪ್ರಶ್ನೆಗೆ ಅಲಿ ಖಾರವಾಗಿ ಉತ್ತರಿಸಿದ್ದಾರೆ.

ನೋಡಿ ಸರ್​, ಒಂದು ತಂಡ ಅಂದಮೇಲೆ ಇಲ್ಲಿ ಎಲ್ಲರ ಅಭಿಪ್ರಾಯಗಳು ಮುಖ್ಯ. ಯಾರೋ ಒಬ್ಬರ ಮಾತಿನಿಂದ ಇದು ನಡೆಯಲ್ಲ. ಒಂದಷ್ಟು ಚರ್ಚೆಗಳು ಮತ್ತು ಎಲ್ಲರ ಅಭಿಪ್ರಾಯಗಳನ್ನು ಆಧರಿಸಿಯೇ ಅಂತಿಮ ನಿರ್ಧಾರ ಕೈಗೊಳ್ಳಲಾಗುವುದು. ಇದೊಂದು ಟೀಮ್ ಆಟ ಎಂದರು. ಸಲ್ಮಾನ್​ರ ಹೇಳಿಕೆಗಳು ಸದ್ಯ ಸಾಕಷ್ಟು ಚರ್ಚೆಗೆ ಗ್ರಾಸವಾಗಿದ್ದು, ಪಿಸಿಬಿ ಅವರ ಮೇಲೆ ಒತ್ತಾಯವನ್ನು ಹೇರಿದೆ ಎಂಬುದು ಮೇಲ್ನೋಟಕ್ಕೆ ಕಂಡುಬಂದಿದೆ. ಬಾಬರ್​ ಅಜಮ್​ಗೆ ಗೇಟ್​ಪಾಸ್​ ಕೊಡುವುದು ಬಹುತೇಕ ಖಚಿತ ಎಂದೇ ಹೇಳಲಾಗಿದೆ. ಆದರೆ, ಸಲ್ಮಾನ್​ ಕಥೆ ಏನಾಗಲಿದೆ ಎಂಬುದನ್ನು ಮುಂದಿನ ದಿನಗಳಲ್ಲಿ ಕಾದು ನೋಡಬೇಕಿದೆ.

ಟಾಸ್​ ಗೆದ್ದು ಮೊದಲು ಬೌಲಿಂಗ್ ಆಯ್ಕೆ ಮಾಡಿಕೊಂಡ ಶ್ರೀಲಂಕಾ, ಪಾಕ್​ಗೆ ಬ್ಯಾಟ್​ ಮಾಡುವಂತೆ ಆಹ್ವಾನಿಸಿತು. ಅಂತೆಯೇ ಬ್ಯಾಟ್ ಮಾಡಿದ ಪಾಕಿಸ್ತಾನ, 20 ಓವರ್​ನಲ್ಲಿ 8 ವಿಕೆಟ್​ ನಷ್ಟಕ್ಕೆ 212 ರನ್​ ಕಲೆಹಾಕಿತು. ಈ ಬೃಹತ್ ಗುರಿಯನ್ನು ಬೆನ್ನತ್ತಿದ ಶ್ರೀಲಂಕಾ, ಆರಂಭಿಕ ಹಂತದಲ್ಲೇ ಬಹುಮುಖ್ಯ ವಿಕೆಟ್​ಗಳನ್ನು ಕಳೆದುಕೊಂಡಿತು. ಇದು ಪಾಕ್​ ಸೆಮೀಸ್​ ಕನಸನ್ನು ಜೀವಂತವಾಗಿರಿಸಿತು. ಆದರೆ, ಲೆಕ್ಕಾಚಾರದ ಪ್ರಕಾರ, 147 ರನ್​ ತಲುಪದಂತೆ ಶ್ರೀಲಂಕಾ ಪಡೆಯನ್ನು ಕಟ್ಟಿಹಾಕುವಲ್ಲಿ ಎಡವಿದ ಪಾಕ್ ಟಿ20 ವಿಶ್ವಕಪ್​ ಟೂರ್ನಿಯಿಂದ ಹೊರಬಿದ್ದಿತು.