ಭಾರತ-ಪಾಕ್ ಪಂದ್ಯ ನಡೆಯದಿದ್ರೆ ಒಟ್ಟಾರೆ 2,288 ಕೋಟಿ ರೂ. ನಷ್ಟ!
ನವದೆಹಲಿ: ಮುಂಬರುವ ಟಿ20 ವಿಶ್ವಕಪ್ (T20 World Cup) ಟೂರ್ನಿಯಲ್ಲಿ ಭಾರತ-ಪಾಕಿಸ್ತಾನ (India vs pakistan) ನಡುವಿನ ಪಂದ್ಯ ನಡೆಯದಿದ್ದರೆ ಒಟ್ಟಾರೆ 2,288 ಕೋಟಿ ರೂ. (250 ದಶಲಕ್ಷ ಡಾಲರ್) ನಷ್ಟವಾಗಲಿದೆ ಎಂದು ಅಂದಾಜಿಸಲಾಗಿದೆ. ಇದರಲ್ಲಿ ಐಸಿಸಿ, ಪ್ರಸಾರ ವಾಹಿನಿ ಸಹಿತ ಎಲ್ಲರಿಗೂ ಆಗುವ ನಷ್ಟ ಒಳಗೊಂಡಿದೆ.
ಸಾಂಪ್ರದಾಯಿಕ ಎದುರಾಳಿಗಳಾದ ಭಾರತ-ಪಾಕ್ ನಡುವಿನ ಪಂದ್ಯ ಭಾರಿ ಆದಾಯ ತರುವಂಥದ್ದಾಗಿದೆ. ಇದರಿಂದಾಗಿಯೇ ಐಸಿಸಿ ಇತ್ತೀಚೆಗಿನ ವರ್ಷಗಳಲ್ಲಿ ತನ್ನ ಪ್ರತಿ ಟೂರ್ನಿಯಲ್ಲೂ ಭಾರತ&ಪಾಕ್ ತಂಡಗಳನ್ನು ಒಂದೇ ಗುಂಪಿನಲ್ಲಿಡುತ್ತದೆ. ಇದರಿಂದ ಪ್ರತಿ ಟೂರ್ನಿಯಲ್ಲೂ ಭಾರತ-ಪಾಕ್ ನಡುವೆ ಕನಿಷ್ಠ ಒಂದು ಪಂದ್ಯ ಖಚಿತವೆನಿಸುತ್ತದೆ. ಈ ಕಾರಣದಿಂದಲೇ ಐಸಿಸಿ ಟೂರ್ನಿಗಳ ಪ್ರಸಾರ ಹಕ್ಕು ಕೂಡ ದೊಡ್ಡ ಮೊತ್ತಕ್ಕೆ ಮಾರಾಟವಾಗುತ್ತದೆ.
ಈ ಬಾರಿ ಭಾರತ-ಪಾಕ್ ಪಂದ್ಯ ನಡೆಯಲಿದ್ದರೆ, ಪ್ರಸಾರ ಹಕ್ಕು ಪಡೆದಿರುವ ಜಿಯೋಸ್ಟಾರ್ಗೆ (Jiostar) ಜಾಹೀರಾತು ಆದಾಯದಿಂದ 200ರಿಂದ 250 ಕೋಟಿ ರೂ. ನಷ್ಟವಾಗಲಿದೆ. ಯಾಕೆಂದರೆ ಭಾರತ-ಪಾಕ್ ಪಂದ್ಯದ ವೇಳೆ ಟಿವಿ ಜಾಹೀರಾತು ಪ್ರತಿ 10 ಸೆಕೆಂಡ್ಗೆ 40 ಲಕ್ಷ ರೂ.ವರೆಗೂ ಮೌಲ್ಯ ಹೊಂದಿರುತ್ತದೆ. ಭಾರತ-ಪಾಕ್ ನಡುವಿನ ಪಂದ್ಯದ ಟಿಕೆಟ್ ಕೂಡ ಹೆಚ್ಚಿನ ಮುಖಬೆಲೆ ಹೊಂದಿರುತ್ತದೆ. ಈ ಪಂದ್ಯದ ವೇಳೆ ಬೆಟ್ಟಿಂಗ್ ದಂಧೆಯೂ ದೊಡ್ಡ ಪ್ರಮಾಣದಲ್ಲಿ ನಡೆಯುತ್ತದೆ.