ನನ್ನವಳು ಎನ್ನುತ್ತಲೇ ತನ್ನ ಮನದರಸಿಯನ್ನು ಪರಿಚಯಿಸಿ ವದಂತಿಗಳಿಗೆ ಅರ್ಷದೀಪ್ ಬ್ರೇಕ್​! ಯಾರು ಈ ಸಮ್ರೀನ್ ಕೌರ್​? Arshdeep Singh

ನವದೆಹಲಿ: ಟೀಮ್ ಇಂಡಿಯಾದ ವೇಗದ ಬೌಲರ್ ಅರ್ಷದೀಪ್ ಸಿಂಗ್ ( Arshdeep Singh ) ಕೊನೆಗೂ ತಮ್ಮ ಲವ್​ ಮ್ಯಾಟರ್​ ಅನ್ನು ಬಹಿರಂಗಪಡಿಸಿದ್ದಾರೆ. ಮಾಡೆಲ್ ಹಾಗೂ ನಟಿ ಸಮ್ರೀನ್ ಕೌರ್​ ಅವರನ್ನು ಪ್ರೀತಿಸುತ್ತಿರುವ ಅರ್ಷದೀಪ್​, ಇಷ್ಟು ದಿನ ಹರಿದಾಡುತ್ತಿದ್ದ ಎಲ್ಲ ವದಂತಿಗಳಿಗೆ ತೆರೆ ಎಳೆದಿದ್ದಾರೆ. ಕ್ರಿಕೆಟ್ ಹಾಗೂ ಗ್ಲಾಮರ್ ಲೋಕದ ಈ ಜೋಡಿ ತಮ್ಮಿಬ್ಬರ ನಡುವಿನ ಪ್ರೇಮ ಸಂಬಂಧವನ್ನು ಅಧಿಕೃತವಾಗಿ ಜಗತ್ತಿಗೆ ಸಾರುವ ಮೂಲಕ ಅಭಿಮಾನಿಗಳ ಕುತೂಹಲವನ್ನು ತಣಿಸಿದೆ.

ಸ್ಟಾರ್ ಕ್ರಿಕೆಟರ್ ಅರ್ಷದೀಪ್ ಸಿಂಗ್ ಭಾನುವಾರದಂದು ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಸಮ್ರೀನ್ ಕೌರ್ ಅವರನ್ನು ಪ್ರೀತಿಯಿಂದ ಅಪ್ಪಿಕೊಂಡಿರುವ ಎರಡು ಸುಂದರ ಫೋಟೋಗಳನ್ನು ಹಂಚಿಕೊಳ್ಳುವ ಮೂಲಕ ತಮ್ಮ ಪ್ರೇಮ ವಿಚಾರವನ್ನು ಜಗತ್ತಿಗೆ ಸಾರಿದ್ದಾರೆ. "ನನ್ನವಳು" (My Person) ಎಂಬ ಅತ್ಯಂತ ಭಾವನಾತ್ಮಕ ಶೀರ್ಷಿಕೆಯೊಂದಿಗೆ ಅಭಿಮಾನಿಗಳಿಗೆ ಸಮ್ರೀನ್ ಅವರನ್ನು ಪರಿಚಯಿಸಿರುವ ಅರ್ಷದೀಪ್, ಈ ಮೂಲಕ ಪ್ರಥಮ ಬಾರಿಗೆ ತಮ್ಮ ಪ್ರೇಮ ಸಂಬಂಧವನ್ನು ಬಹಿರಂಗವಾಗಿ ಅಧಿಕೃತಗೊಳಿಸಿದ್ದಾರೆ.

ಸೆಪ್ಟೆಂಬರ್ 7, 1999 ರಂದು ಜಮ್ಮು ಮತ್ತು ಕಾಶ್ಮೀರದಲ್ಲಿ ಜನಿಸಿದ ಸಮ್ರೀನ್ ಕೌರ್ ನಟಿ, ಮಾಡೆಲ್ ಹಾಗೂ ಸೋಷಿಯಲ್ ಮೀಡಿಯಾ ಇನ್‌ಫ್ಲುಯೆನ್ಸರ್ ಆಗಿ ಗುರುತಿಸಿಕೊಂಡಿದ್ದಾರೆ. ಪುಣೆಯ ಸಿಂಬಯೋಸಿಸ್ ಕಾಲೇಜ್ ಆಫ್ ಆರ್ಟ್ಸ್ ಅಂಡ್ ಕಾಮರ್ಸ್‌ನಿಂದ ಬಿಕಾಂ (ಆನರ್ಸ್) ಪದವಿ ಪೂರ್ಣಗೊಳಿಸಿರುವ ಸಮ್ರೀನ್​, ಬಳಿಕ ಮಾಡೆಲಿಂಗ್ ಹಾಗೂ ಅಭಿನಯ ಕ್ಷೇತ್ರಕ್ಕೆ ಪಾದಾರ್ಪಣೆ ಮಾಡಿದರು. 2018 ರಲ್ಲಿ 'ಫೆಮಿನಾ ಮಿಸ್ ಇಂಡಿಯಾ' ಸ್ಪರ್ಧೆಯಲ್ಲಿ ಜಮ್ಮು ಮತ್ತು ಕಾಶ್ಮೀರವನ್ನು ಪ್ರತಿನಿಧಿಸಿ ಫೈನಲಿಸ್ಟ್ ಆಗಿ ಹೊರಹೊಮ್ಮುವ ಮೂಲಕ ಇವರ ವೃತ್ತಿಜೀವನಕ್ಕೆ ದೊಡ್ಡ ತಿರುವು ಸಿಕ್ಕಿತು. ಈ ಸ್ಪರ್ಧೆಯ ನಂತರ ಸಾಲು ಸಾಲು ಮಾಡೆಲಿಂಗ್ ಅವಕಾಶಗಳನ್ನು ಪಡೆದ ಸಮ್ರೀನ್, ಆ ಬಳಿಕ ಚಿತ್ರರಂಗ ಹಾಗೂ ಡಿಜಿಟಲ್ ವೇದಿಕೆಗಳತ್ತ ಮುಖ ಮಾಡಿದರು. ಜೀ5 (ZEE5) ನಿರ್ಮಿಸಿದ 'ನೇಲ್ ಪಾಲಿಶ್' ವೆಬ್ ಸರಣಿಯಲ್ಲಿ ಅಭಿನಯಿಸಿರುವ ಇವರು, ಬಾಲಿವುಡ್‌ನ '83' ಹಾಗೂ ಪಂಜಾಬಿ ಚಿತ್ರ 'ಸರ್ದಾರ್ ಜಿ 2' ನಂತಹ ಜನಪ್ರಿಯ ಸಿನಿಮಾಗಳಲ್ಲೂ ಕಾಣಿಸಿಕೊಂಡಿದ್ದಾರೆ.

ಅಭಿನಯದ ಜೊತೆಗೆ ಜುಬಿನ್ ನೌಟಿಯಾಲ್, ಬಾದ್‌ಶಾ ಹಾಗೂ ಗುರು ರಾಂಧವಾ ಅವರಂತಹ ಪ್ರಸಿದ್ಧ ಗಾಯಕರ ಸಂಗೀತ ವಿಡಿಯೋಗಳಲ್ಲಿ ಅಭಿನಯಿಸಿರುವ ಸಮ್ರೀನ್, 'ಬಾವ್ಲಾ' ಮತ್ತು 'ತುಝೇ ಭೂಲ್ನಾ ತೋ ಚಾಹಾ' ಹಾಡುಗಳ ಮೂಲಕ ಪ್ರೇಕ್ಷಕರಲ್ಲಿ ಅಪಾರ ಜನಪ್ರಿಯತೆ ಗಳಿಸಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲೂ ಸಕ್ರಿಯರಾಗಿರುವ ಇವರು ತಮ್ಮ ವೃತ್ತಿಜೀವನ, ಪ್ರವಾಸ ಹಾಗೂ ಫ್ಯಾಷನ್ ಕುರಿತಾದ ಅಪ್‌ಡೇಟ್‌ಗಳನ್ನು ಆಗಾಗ ಅಭಿಮಾನಿಗಳೊಂದಿಗೆ ಹಂಚಿಕೊಳ್ಳುತ್ತಿರುತ್ತಾರೆ.

ಐಪಿಎಲ್ 2026ರ ಅವಧಿಯಲ್ಲಿ ಅರ್ಷದೀಪ್ ಸಿಂಗ್ ಮತ್ತು ಸಮ್ರೀನ್ ಕೌರ್ ಅವರ ಪ್ರೇಮ ವಿಚಾರ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸದ್ದು ಮಾಡಿತು. ವೈರಲ್ ಆಗಿದ್ದ ಸ್ನ್ಯಾಪ್‌ಚಾಟ್ ಪೋಸ್ಟ್ ಒಂದರಲ್ಲಿ ಅರ್ಷದೀಪ್ ಯುವತಿಯೊಬ್ಬರ ಕೈ ಹಿಡಿದಿರುವುದು ಕಂಡುಬಂದಿತ್ತು. ಆ ಚಿತ್ರದಲ್ಲಿದ್ದ ಹಚ್ಚೆ (ಟ್ಯಾಟೂ), ಧರಿಸಿದ್ದ ಆಭರಣಗಳು ಮತ್ತು ಉಡುಪುಗಳನ್ನು ಸಮ್ರೀನ್ ಅವರ ಇನ್‌ಸ್ಟಾಗ್ರಾಮ್ ಫೋಟೋಗಳಿಗೆ ಹೋಲಿಸಿ ನೋಡಿದ ನೆಟ್ಟಿಗರು, ಆ ಯುವತಿ ಸಮ್ರೀನ್ ಕೌರ್ ಅವರೇ ಎಂದು ಖಚಿತಪಡಿಸಿಕೊಂಡು ವದಂತಿಗಳಿಗೆ ಮತ್ತಷ್ಟು ರೆಕ್ಕೆಪುಕ್ಕ ನೀಡಿದ್ದರು. ಪಂಜಾಬ್ ಕಿಂಗ್ಸ್ ತಂಡದ ಪಂದ್ಯಗಳಲ್ಲಿ ಸಮ್ರೀನ್ ಸತತವಾಗಿ ಕಾಣಿಸಿಕೊಂಡಿದ್ದು ಈ ಅನುಮಾನವನ್ನು ನಿಜವಾಗಿಸಿತು. ಮುಂಬೈನ ವಾಂಖೆಡೆ ಕ್ರೀಡಾಂಗಣದಲ್ಲಿ ನಡೆದ ಮುಂಬೈ ಇಂಡಿಯನ್ಸ್ ವಿರುದ್ಧದ ಪಂದ್ಯ ಹಾಗೂ ಚಂಡೀಗಢದಲ್ಲಿ ನಡೆದ ಹಲವು ಪಂದ್ಯಗಳಲ್ಲಿ ಸಮ್ರೀನ್​ ಅವರು ಪಂಜಾಬ್ ತಂಡವನ್ನು ಬೆಂಬಲಿಸುತ್ತಿರುವುದು ಕಂಡುಬಂದಿತ್ತು. ಕ್ರೀಡಾಂಗಣಗಳ ಹೊರಗೆ ಪಾಪರಾಜಿಗಳ ಕ್ಯಾಮೆರಾಗಳಿಗೆ ಸಿಕ್ಕಿಬಿದ್ದದ್ದು, ಸಾಮಾಜಿಕ ಜಾಲತಾಣಗಳಲ್ಲಿನ ಇಬ್ಬರ ಚಟುವಟಿಕೆಗಳು ಹಾಗೂ ಪ್ರವಾಸದ ಪೋಸ್ಟ್‌ಗಳನ್ನು ಗಮನಿಸಿದ ಅಭಿಮಾನಿಗಳು ಅರ್ಷದೀಪ್ ತಮ್ಮ ಪ್ರೀತಿಯನ್ನು ಅಧಿಕೃತವಾಗಿ ಘೋಷಿಸುವ ಮುನ್ನವೇ ಈ ಜೋಡಿ ಡೇಟಿಂಗ್‌ನಲ್ಲಿದೆ ಎಂಬುದನ್ನು ಕಂಡುಕೊಂಡಿದ್ದರು.

ಅರ್ಷದೀಪ್ ಸಿಂಗ್​ಗೂ ಮುನ್ನ ಸಮ್ರೀನ್ ಕೌರ್ ಅವರು ಪ್ರಸಿದ್ಧ ಯೂಟ್ಯೂಬರ್ ಆಶಿಶ್ ಚಂಚಲಾನಿ ಜೊತೆ ಡೇಟಿಂಗ್ ಮಾಡುತ್ತಿದ್ದಾರೆ ಎಂಬ ವದಂತಿಗಳು ವ್ಯಾಪಕವಾಗಿ ಹರಿದಾಡಿದ್ದವು. ಆದರೆ ಆ ಸಮಯದಲ್ಲಿ ಇಬ್ಬರೂ ತಾವು ಕೇವಲ ಆಪ್ತ ಸ್ನೇಹಿತರಷ್ಟೇ, ಯಾವುದೇ ಪ್ರೇಮ ಸಂಬಂಧದಲ್ಲಿಲ್ಲ ಎಂದು ಸ್ಪಷ್ಟನೆ ನೀಡಿದ್ದರು. ಆ ನಂತರ ವೈಯಕ್ತಿಕ ಕಾರಣಗಳಿಂದಾಗಿ ತಮ್ಮಿಬ್ಬರ ನಡುವಿನ ಒಡನಾಟದಲ್ಲಿ ಒಂದಿಷ್ಟು ಬದಲಾವಣೆಗಳಾಗಿವೆ ಎಂದು ಸಮ್ರೀನ್ ತಿಳಿಸಿದ್ದರೂ, ಪರಸ್ಪರ ಗೌರವ ಮಾತ್ರ ಹಾಗೆಯೇ ಇದೆ ಎಂದು ಹೇಳಿದ್ದರು. ಇದೀಗ ಅರ್ಷದೀಪ್ ಸಿಂಗ್ ಹಂಚಿಕೊಂಡಿರುವ ಇನ್‌ಸ್ಟಾಗ್ರಾಮ್ ಪೋಸ್ಟ್ ಈ ಹಿಂದಿನ ಎಲ್ಲ ಊಹಾಪೋಹಗಳಿಗೆ ಮತ್ತು ಗೊಂದಲಗಳಿಗೆ ಪೂರ್ಣವಿರಾಮ ಇಟ್ಟಿದೆ. ಈ ಮೂಲಕ ಈ ಮುದ್ದಾದ ಜೋಡಿ ತಮ್ಮ ಸುಂದರ ಪ್ರೇಮ ಬಂಧವನ್ನು ಪ್ರಥಮ ಬಾರಿಗೆ ಸಾರ್ವಜನಿಕವಾಗಿ ಅಧಿಕೃತಗೊಳಿಸಿ ಹೊಸ ಪಯಣಕ್ಕೆ ಕಾಲಿಟ್ಟಿದೆ, (ಏಜೆನ್ಸೀಸ್​).