ನಿನಗೆ ಹೊಸತು, ನಮಗಲ್ಲ... ವೈಭವ್​ ಸೂರ್ಯವಂಶಿಗೆ ಮುಂಬೈ ಇಂಡಿಯನ್ಸ್​ ಕೋಚ್​ ಖಡಕ್ ವಾರ್ನಿಂಗ್​

RR vs MI: ಇಂದು (ಏ.07) ಅಸ್ಸಾಂನ ಗುವಾಹಟಿಯಲ್ಲಿ ರಾಜಸ್ಥಾನ ರಾಯಲ್ಸ್ ಮತ್ತು ಮುಂಬೈ ಇಂಡಿಯನ್ಸ್ ತಂಡಗಳು ಮುಖಾಮುಖಿಯಾಗಲಿವೆ. ಈಗಾಗಲೇ ಐಪಿಎಲ್​ 19ನೇ ಆವೃತ್ತಿಯಲ್ಲಿ ಎದುರಾಳಿ ತಂಡದ ಬೌಲರ್​ಗಳಲ್ಲಿ ನಡುಕ ಹುಟ್ಟಿಸಿರುವ 15 ವರ್ಷದ ವೈಭವ್ ಸೂರ್ಯವಂಶಿ, ಅಂತಾರಾಷ್ಟ್ರೀಯ ಬೌಲರ್​ಗಳೇ ಬೌಲಿಂಗ್ ಮಾಡಲು ಯೋಚಿಸುವಂತೆ ಮಾಡಿದ್ದಾರೆ. ಇದನ್ನೇ ಮುಂದಿಟ್ಟು ಮಾತನಾಡಿರುವ ಮುಂಬೈ ಕೋಚ್​, ಅಚ್ಚರಿ ಹೇಳಿಕೆಗಳನ್ನು ನೀಡಿದ್ದಾರೆ.

ವಿಶ್ವದ ಬೆಸ್ಟ್​ ಬೌಲರ್​ ಎಂದೇ ಖ್ಯಾತಿ ಗಳಿಸಿರುವ ಜಸ್ಪ್ರೀತ್ ಬುಮ್ರಾ, ಮುಂಬೈ ಇಂಡಿಯನ್ಸ್​ ತಂಡದ ಅದ್ಭುತ ಶಕ್ತಿ. ಇವರ ಬೌಲಿಂಗ್​​ಗೆ ಆಡುವುದು ಎಂಥಾ ಬ್ಯಾಟರ್​ಗಾದರೂ ಕಷ್ಟಸಾಧ್ಯವೇ. ಹೀಗಿರುವಾಗ, ಬೇಬಿ ಬಾಸ್​ ಇಂದಿನ ಪಂದ್ಯದಲ್ಲಿ ಹೇಗೆ ಆಡುತ್ತಾರೆ? ಸಿಕ್ಸರ್​, ಬೌಂಡರಿಗಳನ್ನು ಹರಿಸುತ್ತಾರೆ? ಎಂಬ ಕುತೂಹಲ ಸದ್ಯ ಕ್ರಿಕೆಟ್ ಅಭಿಮಾನಿಗಳಲ್ಲಿ ಕಾಡತೊಡಗಿದೆ.

ಮುಂಬೈ ಕೋಚ್ ಪರಾಸ್ ಮಾಂಬ್ರೆ ಮಾತನಾಡಿ, ವೈಭವ್ ಸೂರ್ಯವಂಶಿ ಅವರ ಆಟವು ನನಗೆ ಹೊಸದೇನಲ್ಲ. ಇದು ವೈಭವ್​ಗೆ ಎರಡನೇ ಐಪಿಎಲ್ ಸೀಸನ್. ಆದಾಗ್ಯೂ, ಅವರು ತಮ್ಮ ತಂಡದ ಪರ ಉತ್ತಮವಾಗಿಯೇ ಆಡುತ್ತಿದ್ದಾರೆ. ಆರ್‌ಆರ್ ತಂಡಕ್ಕೆ ಅಮೂಲ್ಯ ಆಟಗಾರ ಎಂದರೆ ತಪ್ಪಾಗಲಾರದು. ಅದರ ಬಗ್ಗೆ ಯಾವುದೇ ಸಂದೇಹವೂ ಇಲ್ಲ. ಆದರೆ, ಸೂರ್ಯವಂಶಿ ಅಬ್ಬರದ ಬ್ಯಾಟಿಂಗ್​ ರೀತಿ ನಮಗೆ ಹೊಸದಲ್ಲ. ಇದರ ಬಗ್ಗೆ ಯಾವುದೇ ಚಿಂತೆಯೂ ಇಲ್ಲ. ಬೇರೆ ಬ್ಯಾಟರ್​ಗಳನ್ನು ಹೇಗೆ ಕಟ್ಟಿಹಾಕಬೇಕು ಎಂದು ಪ್ಲ್ಯಾನ್​ ಮಾಡುತ್ತೇವೋ, ಅಂತೆಯೇ ಇವರನ್ನೂ ಯಾವ ರೀತಿ ಪೆವಿಲಿಯನ್​ಗೆ ಕಳುಹಿಸಬೇಕು ಎಂಬುದನ್ನು ಚಿಂತಿಸಿದ್ದೇವೆ ಎಂದರು.

ಐಪಿಎಲ್‌ ಟೂರ್ನಿಯಲ್ಲಿ ಇಲ್ಲಿಯವರೆಗೆ ರಾಜಸ್ಥಾನ ರಾಯಲ್ಸ್ ಮತ್ತು ಮುಂಬೈ ಇಂಡಿಯನ್ಸ್ ತಂಡಗಳು 30 ಬಾರಿ ಮುಖಾಮುಖಿಯಾಗಿವೆ. ಈ ಪೈಕಿ 14 ಪಂದ್ಯಗಳನ್ನು ಆರ್‌ಆರ್ ಗೆದ್ದಿದೆ. ಉಳಿದ 16 ಪಂದ್ಯಗಳಲ್ಲಿ ಮುಂಬೈ ಇಂಡಿಯನ್ಸ್ ಗೆಲುವು ದಾಖಲಿಸಿದೆ,(ಏಜೆನ್ಸೀಸ್).