WPL: ರಿಚಾ ಘೋಷ್​ ಹೋರಾಟ ವ್ಯರ್ಥ; ಆರ್​ಸಿಬಿಗೆ ಸತತ 2ನೇ ಸೋಲು

ವಡೋದರ: ಇಂಗ್ಲೆಂಡ್​ ಆಲ್ರೌಂಡರ್​ ನ್ಯಾಟ್​ ಸೀವರ್​-ಬ್ರಂಟ್​ (100*ರನ್​, 57 ಎಸೆತ, 16 ಬೌಂಡರಿ, 1 ಸಿಕ್ಸರ್) ಸಿಡಿಸಿದ ವುಮೆನ್ಸ್​ ಪ್ರೀಮಿಯರ್​ ಲೀಗ್​ (WPL) ಇತಿಹಾಸದ ಚೊಚ್ಚಲ ಶತಕ ಮತ್ತು ಹೀಲಿ ಮ್ಯಾಥ್ಯೂಸ್​ (56 ರನ್​, 39 ಎಸೆತ, 9 ಬೌಂಡರಿ, 10ಕ್ಕೆ 3 ವಿಕೆಟ್​) ಆಲ್ರೌಂಡ್​ ಆಟದ ಎದುರು ಮಂಕಾದ ಆರ್​ಸಿಬಿ (RCB) ತಂಡ ಹಾಲಿ ಚಾಂಪಿಯನ್​ ಮುಂಬೈ ಇಂಡಿಯನ್ಸ್​ ವಿರುದ್ಧ 15 ರನ್​ಗಳಿಂದ ಪರಾಭವಗೊಂಡಿದೆ. ಇದರಿಂದ ಸ್ಮೃತಿ ಮಂದನಾ ಬಳಗ ಇನ್ನು ನೇರವಾಗಿ ಫೈನಲ್​ಗೇರುವುದನ್ನು ಖಾತ್ರಿಪಡಿಸಿಕೊಳ್ಳಲು ಕೊನೇ ಲೀಗ್​ ಪಂದ್ಯದವರೆಗೆ ಕಾಯಬೇಕಾಗಿದೆ. ಆರ್​ಸಿಬಿಗೆ ಸತತ 5 ಗೆಲುವಿನ ಬಳಿಕ ಇದು ಸತತ 2ನೇ ಸೋಲಾಗಿದೆ.

ಕೋಟಂಬಿ ಸ್ಟೇಡಿಯಂನಲ್ಲಿ ಸೋಮವಾರ ನಡೆದ 4ನೇ ಆವೃತ್ತಿಯ 16ನೇ ಲೀಗ್​ ಪಂದ್ಯದಲ್ಲಿ ಟಾಸ್​ ಗೆದ್ದ ಆರ್​ಸಿಬಿ ಬೌಲಿಂಗ್​ ಆಯ್ದುಕೊಂಡಿತು. ನ್ಯಾಟ್​ ಸೀವರ್​ ಮತ್ತು ಹೇಲಿ ಮ್ಯಾಥ್ಯೂಸ್​ 2ನೇ ವಿಕೆಟ್​ಗೆ 73 ಎಸೆತಗಳಲ್ಲಿ 131 ರನ್​ ಜತೆಯಾಟವಾಡುವ ಮೂಲಕ ಆರ್​ಸಿಬಿ ಬೌಲರ್​ಗಳನ್ನು ಕಾಡಿದರು. ನ್ಯಾಟ್​ ಸೀವರ್​ ಇನಿಂಗ್ಸ್​ನ ಕೊನೇ ಓವರ್​ನ 4ನೇ ಎಸೆತದಲ್ಲಿ ಸಿಂಗಲ್ಸ್​ ಕಸಿಯುವ ಮೂಲಕ 57 ಎಸೆತಗಳಲ್ಲಿ ಶತಕ ಪೂರೈಸಿದರು. ಅಂತಿಮವಾಗಿ ಮುಂಬೈ ತಂಡ 4 ವಿಕೆಟ್​ಗೆ 199 ರನ್​ ಕಲೆಹಾಕಿತು.

ಪ್ರತಿಯಾಗಿ ಆರ್​ಸಿಬಿ ತಂಡ 35 ರನ್​ಗಳಿಗೆ 5 ವಿಕೆಟ್​ ಕಳೆದುಕೊಂಡು ಸೋಲಿನ ಸುಳಿಗೆ ಸಿಲುಕಿತು. ನಾಯಕಿ ಸ್ಮೃತಿ ಮಂದನಾ (6), ಗ್ರೇಸ್​ ಹ್ಯಾರಿಸ್​ (15), ಜಾರ್ಜಿಯಾ ವೊಲ್​ (9) , ಗೌತಮಿ ನಾಯ್ಕ್​ (1) ವೈಫಲ್ಯ ಆರ್​ಸಿಬಿ ತಂಡವನ್ನು ಬೃಹತ್​ ಮೊತ್ತದ ಚೇಸಿಂಗ್​ನ ಆರಂಭದಲ್ಲೇ ಸಂಕಷ್ಟಕ್ಕೆ ಸಿಲುಕಿಸಿತು. ಕೊನೆಗೆ ಆರ್​ಸಿಬಿ 9 ವಿಕೆಟ್​ಗೆ 184 ರನ್​ಗಳಿಗೆ ಸರ್ವಪತನ ಕಂಡು ಶರಣಾಯಿತು. (Richa Ghosh) ರಿಚಾ ಘೋಷ್​ (90 ರನ್​, 50 ಎಸೆತ, 10 ಬೌಂಡರಿ, 6 ಸಿಕ್ಸರ್​) ಹೋರಾಟ ಸೋಲಿನ ಅಂತರವನ್ನಷ್ಟೇ ತಗ್ಗಿಸಿತು. ಆರ್​ಸಿಬಿ ಇನ್ನು ತನ್ನ ಕೊನೇ ಲೀಗ್​ ಪಂದ್ಯದಲ್ಲಿ ಗುರುವಾರ ಯುಪಿ ವಾರಿಯರ್ಸ್​ ವಿರುದ್ಧ ಆಡಲಿದೆ.

ಮುಂಬೈ ಇಂಡಿಯನ್ಸ್​: 4 ವಿಕೆಟ್​ಗೆ 199 (ಮ್ಯಾಥ್ಯೂಸ್​ 56, ಸಜನಾ 7, ನ್ಯಾಟ್​ ಸೀವರ್​ 100*, ಹರ್ಮಾನ್​ಪ್ರೀತ್​ 20, ಅಮನ್​ಜೋತ್​ 4, ಲಾರೆನ್​ ಬೆಲ್​ 21ಕ್ಕೆ 2, ನಾಡಿನ್​ ಡಿ ಕ್ಲರ್ಕ್​ 40ಕ್ಕೆ 1, ಶ್ರೇಯಾಂಕಾ 34ಕ್ಕೆ 1). ಆರ್​ಸಿಬಿ: 9 ವಿಕೆಟ್​ಗೆ 184 (ಹ್ಯಾರಿಸ್​ 15, ಸ್ಮೃತಿ 6, ವೊಲ್​ 9, ಗೌತಮಿ ನಾಯ್ಕ್​ 1, ರಾಧಾ 0, ರಿಚಾ 90, ನಾಡಿನ್​ 28, ಅರುಂಧತಿ 14, ಶ್ರೇಯಾಂಕಾ 12* ಮ್ಯಾಥ್ಯೂಸ್​ 10ಕ್ಕೆ 3, ಶಬ್ನಿಲ್​ 25ಕ್ಕೆ 2, ಕೆರ್​ 37ಕ್ಕೆ 2).