ಕೌಂಟಿಯಲ್ಲಿ ಡರ್​ಹ್ಯಾಂ ಪರ ಕನ್ನಡಿಗ ಮಯಾಂಕ್ ಅಗರ್ವಾಲ್​ ಕಣಕ್ಕೆ

ಡರ್​ಹ್ಯಾಂ ತಂಡ ಬುಧವಾರದಿಂದ ಕೌಂಟಿ ಗ್ರೌಂಡ್​ನಲ್ಲಿ ನಾಟಿಂಗ್​ಹ್ಯಾಂಶೈರ್​ ವಿರುದ್ಧ ಆಡಲಿರುವ ಮುಂದಿನ ಪಂದ್ಯಕ್ಕೆ ಮಯಾಂಕ್​ ಅಗರ್ವಾಲ್​ ಲಭ್ಯರಿರುತ್ತಾರೆ ಎಂದು ಕೌಂಟಿ ತಂಡ ತಿಳಿಸಿದೆ. ಡಿವಿಜನ್​ 2ರ ಅಂಕಪಟ್ಟಿಯಲ್ಲಿ ಡರ್​ಹ್ಯಾಂ ತಂಡ ಸದ್ಯ ಅಗ್ರಸ್ಥಾನದಲ್ಲಿದೆ. ಇದುವರೆಗೆ ಆಡಿರುವ 10 ಪಂದ್ಯಗಳಲ್ಲಿ 7ರಲ್ಲಿ ಗೆದ್ದಿದ್ದು, 3ರಲ್ಲಿ ಡ್ರಾ ಸಾಧಿಸಿದ್ದು, ಒಟ್ಟು 191 ಅಂಕ ಕಲೆಹಾಕಿದೆ.

35 ವರ್ಷದ ಮಯಾಂಕ್​ ಭಾರತ ಪರ 21 ಟೆಸ್ಟ್​ ಪಂದ್ಯಗಳಲ್ಲಿ ಆಡಿದ್ದು, 41.33ರ ಸರಾಸರಿಯಲ್ಲಿ 1,500ಕ್ಕೂ ಅಧಿಕ ರನ್​ ಗಳಿಸಿದ್ದಾರೆ. ಇದರಲ್ಲಿ 4 ಶತಕ ಮತ್ತು 6 ಅರ್ಧಶತಕಗಳು ಸೇರಿವೆ. ಜತೆಗೆ ಒಟ್ಟಾರೆ 124 ಪ್ರಥಮ ದರ್ಜೆ ಪಂದ್ಯಗಳಲ್ಲಿ 8,929 ರನ್​ ಗಳಿಸಿದ ಅನುಭವವನ್ನೂ ಹೊಂದಿದ್ದಾರೆ. ಮಯಾಂಕ್​ ಕಳೆದ ವರ್ಷ ಕೌಂಟಿಯಲ್ಲಿ ಯಾರ್ಕ್​ಶೈರ್​ ಪರ ಆಡಿದ್ದರು ಮತ್ತು ಡರ್​ಹ್ಯಾಂ ವಿರುದ್ಧ 175 ರನ್​ ಸಿಡಿಸಿ ಮಿಂಚಿದ್ದರು.