'ಬರೀ ಬಾಲ್​ಗಳನ್ನು ತಿನ್ನೋ ತಿಲಕ್​ ವರ್ಮಾನನ್ನು ಕೈಬಿಟ್ಟು ಅಬ್ಬರಿಸುವ ರಜತ್​ ಪಾಟೀದರ್​ಗೆ ಒಂದು ಚಾನ್ಸ್​ ಕೊಡ್ರಪ್ಪಾ'! Rajat Patidar

ನವದೆಹಲಿ: ಜಿಂಬಾಬ್ವೆ ವಿರುದ್ಧದ ಮೂರನೇ ಟಿ20 ಪಂದ್ಯದಲ್ಲಿ ಭಾರತ ಕ್ರಿಕೆಟ್ ತಂಡ 35 ರನ್‌ಗಳ ಭರ್ಜರಿ ಜಯ ಸಾಧಿಸಿ ಸರಣಿಯನ್ನು 3-0 ಅಂತರದಲ್ಲಿ ಕ್ಲೀನ್ ಸ್ವೀಪ್ ಮಾಡಿದರೂ, ಸ್ಟಾರ್​ ಬ್ಯಾಟರ್​ ತಿಲಕ್ ವರ್ಮಾ ಅವರ ಬ್ಯಾಟಿಂಗ್ ಪ್ರದರ್ಶನ ಮತ್ತೆ ಚರ್ಚೆಗೆ ಗ್ರಾಸವಾಗಿದೆ. ಮಾಜಿ ಭಾರತೀಯ ಆಯ್ಕೆಗಾರ ಮತ್ತು ಹಿರಿಯ ಕ್ರಿಕೆಟಿಗ ಕ್ರಿಸ್ ಶ್ರೀಕಾಂತ್, ಟಿ20 ತಂಡದಲ್ಲಿ ತಿಲಕ್ ವರ್ಮಾ ಅವರ ಸ್ಥಾನವನ್ನು ಬಲವಾಗಿ ಪ್ರಶ್ನಿಸಿದ್ದು, ರಜತ್ ಪಟೀದಾರ್ ( Rajat Patidar ) ಅವರಂತಹ ಉದಯೋನ್ಮುಖ ಆಟಗಾರರು ಅವಕಾಶಕ್ಕಾಗಿ ಕಾಯುತ್ತಿರುವಾಗ ತಿಲಕ್ ಅವರ ಸತತ ವೈಫಲ್ಯಗಳು ಕಳವಳಕಾರಿಯಾಗಿದೆ ಎಂದು ಹೇಳಿದ್ದಾರೆ.

ಮೂರನೇ ಪಂದ್ಯದಲ್ಲಿ ಭಾರತ ತಂಡ 192/5 ರನ್‌ಗಳ ಬೃಹತ್ ಮೊತ್ತ ಕಲೆಹಾಕಿದರೂ, ತಿಲಕ್ ವರ್ಮಾ 9 ಎಸೆತಗಳಲ್ಲಿ ಕೇವಲ 11 ರನ್ ಗಳಿಸಿ ಅಜೇಯರಾಗಿ ಉಳಿದರು. ಈ ಇನಿಂಗ್ಸ್ ಭಾರತದ ಗೆಲುವಿಗೆ ತೊಡಕಾಗದಿದ್ದರೂ, ಚುಟುಕು ಮಾದರಿಯ ಕ್ರಿಕೆಟ್‌ನಲ್ಲಿ ಅವರ ಬ್ಯಾಟಿಂಗ್ ಶೈಲಿ ಮತ್ತು ಪಾತ್ರದ ಕುರಿತು ಮತ್ತೊಮ್ಮೆ ದೊಡ್ಡ ಚರ್ಚೆಯನ್ನು ಹುಟ್ಟುಹಾಕಿದೆ. ಈ ಹಿಂದಿನ ಪಂದ್ಯದಲ್ಲಿ ಅವರು 29 ಎಸೆತಗಳಲ್ಲಿ ಅಬ್ಬರದ 60 ರನ್ ಗಳಿಸಿ ಮಿಂಚಿದ್ದರಾದರೂ, ಅವರ ಬ್ಯಾಟಿಂಗ್‌ನಲ್ಲಿ ಸ್ಥಿರತೆಯ ಕೊರತೆ ಮತ್ತು ಸ್ಪಿನ್ನರ್‌ಗಳ ವಿರುದ್ಧ ರನ್ ಕಲೆಹಾಕಲು ಪಡುತ್ತಿರುವ ಹೆಣಗಾಟ ಸದಾ ಪ್ರಶ್ನಾರ್ಹವಾಗಿದೆ.

ತಮ್ಮ ಯೂಟ್ಯೂಬ್ ಚಾನೆಲ್‌ನಲ್ಲಿ ಮಾತನಾಡಿದ ಶ್ರೀಕಾಂತ್, ತಿಲಕ್ ವರ್ಮಾ ಹಾಗೂ ರಜತ್ ಪಟೀದಾರ್ ಅವರನ್ನು ಹೋಲಿಕೆ ಮಾಡುತ್ತಾ ಬೋರ್ಡ್ ಆಯ್ಕೆ ಪ್ರಕ್ರಿಯೆಯನ್ನು ಬಹಿರಂಗವಾಗಿ ವಿಮರ್ಶಿಸಿದ್ದಾರೆ. ತಿಲಕ್ ವರ್ಮಾ ಮತ್ತೆ 9 ಎಸೆತಗಳನ್ನು ವ್ಯರ್ಥ ಮಾಡಿದರು, ಅವರಿಗೆ ದೀರ್ಘಕಾಲದವರೆಗೆ ವೇಗವಾಗಿ ರನ್ ಗಳಿಸಲು ಸಾಧ್ಯವಾಗುತ್ತಿಲ್ಲ. ಎಲ್ಲಿದೆ ಅವರ ಪ್ರದರ್ಶನದಲ್ಲಿ ಸ್ಥಿರತೆ? ಇಂಗ್ಲೆಂಡ್ ಪ್ರವಾಸದಲ್ಲೂ ಅವರು ಮಾಡಿದ್ದೇನು? ಎಲ್ಲೋ ಒಮ್ಮೆ ಒಂದೆರಡು ಇನಿಂಗ್ಸ್ ಆಡಿದರೆ ಸಾಲದು, ರಜತ್ ಪಟೀದಾರ್‌ಗೆ ಹೋಲಿಸಿದರೆ ತಿಲಕ್ ಏನೂ ಅಲ್ಲ. ಟಿ20ಯಲ್ಲಿ ಭದ್ರವಾದ ಇನಿಂಗ್ಸ್ ಬೇಕಿದ್ದರೆ ಪಟೀದಾರ್‌ಗೆ ಅವಕಾಶ ನೀಡಿ, ಯಶ್ ಠಾಕೂರ್ ಸೇರಿದಂತೆ ಎಲ್ಲರಿಗೂ ಅವಕಾಶ ನೀಡುತ್ತಿರುವಾಗ ಪಾಟೀದಾರ್‌ಗೂ ನ್ಯಾಯ ಒದಗಿಸಿ" ಎಂದು ಖಾರವಾಗಿ ನುಡಿದಿದ್ದಾರೆ.

ಬರುವ ಪ್ರಮುಖ ಜಾಗತಿಕ ಟೂರ್ನಿಗಳಿಗೆ ಮುನ್ನ ಭಾರತ ತಂಡದ ಮಧ್ಯಮ ಕ್ರಮಾಂಕದ ಆಯ್ಕೆಯ ಕುರಿತು ದೊಡ್ಡ ಮಟ್ಟದ ಚರ್ಚೆ ನಡೆಯುತ್ತಿದ್ದು, ಶ್ರೀಕಾಂತ್ ಅವರ ಹೇಳಿಕೆಗಳು ಈ ಚರ್ಚೆಗೆ ಮತ್ತಷ್ಟು ಕಾವು ನೀಡಿದೆ. ತಿಲಕ್ ವರ್ಮಾ ಭಾರತದ ಅತ್ಯಂತ ಭರವಸೆಯ ಯುವ ಬ್ಯಾಟರ್‌ಗಳಲ್ಲಿ ಒಬ್ಬರೆಂದು ಪರಿಗಣಿಸಲ್ಪಟ್ಟಿದ್ದರೂ, ಎದುರಾಳಿ ತಂಡಗಳು ಮಧ್ಯಮ ಓವರ್‌ಗಳಲ್ಲಿ ಸ್ಪಿನ್‌ ದಾಳಿ ನಡೆಸುವ ಮೂಲಕ ಅವರ ರನ್ ವೇಗಕ್ಕೆ ತಡೆಯೊಡ್ಡಲು ಯಶಸ್ವಿಯಾಗುತ್ತಿವೆ. ಇದು ಟಿ20 ಕ್ರಿಕೆಟ್‌ನಲ್ಲಿ ಅವರು ನಿರಂತರವಾಗಿ ಪ್ರಭುತ್ವ ಸಾಧಿಸಲು ಪ್ರಮುಖ ಅಡಚಣೆಯಾಗಿದೆ.

ಈ ಸಮಸ್ಯೆಯನ್ನು ಮೆಟ್ಟಿಬಾರಲು, ಭಾರತೀಯ ಕ್ರಿಕೆಟ್ ಮಂಡಳಿ ಮತ್ತು ತಂಡದ ಮ್ಯಾನೇಜ್​ಮೆಂಟ್​ ತಿಲಕ್ ಅವರನ್ನು ಬ್ಯಾಟಿಂಗ್ ಕ್ರಮಾಂಕದಲ್ಲಿ ಕೆಳಗಿನ ಸ್ಥಾನಕ್ಕೆ ಇಳಿಸಿ, ಫಿನಿಷರ್ ರೂಪದಲ್ಲಿ ಬೆಳೆಸಲು ಪ್ರಯೋಗಗಳನ್ನು ನಡೆಸುತ್ತಿದೆ. ಆದರೆ, ಫಿನಿಷರ್ ಜವಾಬ್ದಾರಿಯನ್ನು ನಿರ್ವಹಿಸಲು ಈಗಾಗಲೇ ತಂಡದಲ್ಲಿ ಹಾರ್ದಿಕ್ ಪಾಂಡ್ಯ ಮತ್ತು ಶಿವಂ ದುಬೆ ಅವರಂತಹ ಪ್ರಬಲ ಮತ್ತು ಅನುಭವಿ ಆಟಗಾರರ ದೊಡ್ಡ ಪಡೆಯೇ ಸಿದ್ಧವಾಗಿದೆ.

ಮತ್ತೊಂದೆಡೆ, ರಜತ್ ಪಟೀದಾರ್ ಐಪಿಎಲ್‌ನಲ್ಲಿ ಸ್ಪಿನ್ ಬೌಲಿಂಗ್ ಅನ್ನು ಅತ್ಯಂತ ದಕ್ಷತೆಯಿಂದ ಎದುರಿಸಬಲ್ಲ ಅತ್ಯುತ್ತಮ ಆಟಗಾರ ಎಂಬುದನ್ನು ಸಾಬೀತುಪಡಿಸಿದ್ದಾರೆ. 2026ರ ಐಪಿಎಲ್ ಆವೃತ್ತಿಯಲ್ಲಿ ಆರ್‌ಸಿಬಿ (RCB) ಚಾಂಪಿಯನ್ ಪಟ್ಟಕ್ಕೇರುವಲ್ಲಿ ಪಾಟೀದಾರ್ ಪ್ರಮುಖ ಪಾತ್ರ ವಹಿಸಿದ್ದರು. ಅವರು 14 ಇನಿಂಗ್ಸ್‌ಗಳಲ್ಲಿ 41.75 ರ ಸರಾಸರಿ ಹಾಗೂ 192.69 ರ ಸ್ಟ್ರೈಕ್ ರೇಟ್‌ನಲ್ಲಿ 5 ಅರ್ಧಶತಕಗಳೊಂದಿಗೆ ಒಟ್ಟು 501 ರನ್ ಗಳಿಸಿ ಅಬ್ಬರಿಸಿದ್ದರು. ಇಂತಹ ಆಟಗಾರ ಮಧ್ಯಮ ಕ್ರಮಾಂಕದಲ್ಲಿ ಭಾರತ ತಂಡಕ್ಕೆ ಹೊಸ ಬಲ ತರಬಲ್ಲರು ಎಂಬುದು ತಜ್ಞರ ಅಭಿಪ್ರಾಯವಾಗಿದೆ.

ಹೀಗಿದ್ದರೂ, ಇತ್ತೀಚೆಗಷ್ಟೇ ಭಾರತ ತಂಡವು ತಿಲಕ್ ವರ್ಮಾ ಅವರನ್ನು ಟಿ20 ಮಾದರಿಯ ಉಪನಾಯಕನನ್ನಾಗಿ ನೇಮಕ ಮಾಡಿದೆ. ಇದು ತಂಡದ ಮ್ಯಾನೇಜ್‌ಮೆಂಟ್ ಅವರ ಮೇಲೆ ಇನ್ನೂ ಅಪಾರ ಭರವಸೆ ಹೊಂದಿದ್ದು, ತಮ್ಮ ದೀರ್ಘಕಾಲೀನ ಯೋಜನೆಯ ಪ್ರಮುಖ ಭಾಗವಾಗಿ ಅವರನ್ನು ಕಾಣುತ್ತಿದೆ ಎಂಬುದನ್ನು ಸ್ಪಷ್ಟಪಡಿಸುತ್ತದೆ. ಆದಾಗ್ಯೂ, ಪಾಟೀದಾರ್‌ಗೆ ಸೂಕ್ತ ಅವಕಾಶ ನೀಡಬೇಕೆಂಬ ಕೂಗು ಕ್ರಿಕೆಟ್ ವಲಯದಲ್ಲಿ ದಿನದಿಂದ ದಿನಕ್ಕೆ ಬಲವಾಗುತ್ತಿದೆ, (ಏಜೆನ್ಸೀಸ್​).