ಆ ಪಿಚ್​ನಲ್ಲಿ ನಾನೂ ಬೌಲಿಂಗ್​ ಮಾಡಿದ್ರು ವಿಕೆಟ್​ ಕಬಳಿಸುತ್ತಿದ್ದೆ! ಗಂಭೀರ್ ಹೇಳಿಕೆಗೆ ಕ್ರಿಸ್​ ಶ್ರೀಕಾಂತ್ ಕೆಂಡಾಮಂಡಲ

ಮುಂಬೈ: ಕೋಲ್ಕತದ ಈಡನ್ ಗಾರ್ಡನ್ಸ್‌ನಲ್ಲಿ ನಡೆದ ದಕ್ಷಿಣ ಆಫ್ರಿಕಾ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಟೀಮ್ ಇಂಡಿಯಾ 30 ರನ್‌ಗಳಿಂದ ಹೀನಾಯ ಸೋಲುಂಡಿದ್ದು ಸದ್ಯ ಹಲವರ ಟೀಕೆ, ವ್ಯಂಗಗಳಿಗೆ ಗುರಿಯಾಗಿದೆ. ಎರಡು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಭಾರತ 1-0 ಹಿನ್ನಡೆಯಲ್ಲಿದೆ. ಪಿಚ್​ ಕುರಿತು ಹೆಡ್​ ಕೋಚ್ ಗೌತಮ್ ಗಂಭೀರ್ ಕೊಟ್ಟ​ ಹೇಳಿಕೆಗೆ ಇದೀಗ ಟೀಮ್ ಇಂಡಿಯಾದ ಮಾಜಿ ಹಿರಿಯ ಕ್ರಿಕೆಟಿಗ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಪಂದ್ಯ ಸೋತ ಬೆನ್ನಲ್ಲೇ ಟೀಮ್ ಇಂಡಿಯಾ ಬ್ಯಾಟರ್​ಗಳ ವಿಫಲತೆಯನ್ನು ಎತ್ತಿಹಿಡಿದ ಗಂಭೀರ್​, ಈಡನ್ ಗಾರ್ಡನ್ಸ್ ಪಿಚ್​ನಲ್ಲಿ ಏನು ಸಮಸ್ಯೆ ಇರಲಿಲ್ಲ. ಇಲ್ಲಿ ಬ್ಯಾಟರ್​ಗಳ ವೈಫಲ್ಯವೇ ಸೋಲಿಗೆ ಮುಖ್ಯ ಕಾರಣವಾಯಿತು ಎಂದರು. ಇದು ಕ್ರಿಕೆಟ್​ ಪ್ರಿಯರ ಹಾಗೂ ಮಾಜಿ ಕ್ರಿಕೆಟಿಗರ ಕೆಂಗಣ್ಣಿಗೆ ಗುರಿಯಾಯಿತು. ಪಿಚ್ ಬೆಂಬಲಿಸಿ ಮಾತನಾಡಿದ ಗಂಭೀರ್​ ವಿರುದ್ಧ ಕಿಡಿಕಾರಿರುವ ಕೃಷ್ಣಮಾಚಾರಿ ಶ್ರೀಕಾಂತ್, ಅಸಲಿಗೆ ಈ ಪಿಚ್ ಟೆಸ್ಟ್ ಕ್ರಿಕೆಟ್‌ಗೆ ಸೂಕ್ತವಲ್ಲ ಎಂದಿದ್ದಾರೆ.

"ನಮ್ಮ ಸ್ವಂತ ನೆಲದಲ್ಲಿ ನಾವು ಹೀನಾಯ ಸೋಲನ್ನು ಅನುಭವಿಸಿದ್ದೇವೆ. ಪೂರ್ಣ ತಂಡದೊಂದಿಗೆ ಆಡುತ್ತಿದ್ದರೂ, ಟೀಮ್ ಇಂಡಿಯಾ ಇಂತಹ ಅವಮಾನಕರ ಸೋಲನ್ನು ಅನುಭವಿಸಿದೆ ಎಂಬುದನ್ನು ನನ್ನಿಂದ ಅರಗಿಸಿಕೊಳ್ಳಲು ಸಾಧ್ಯವಿಲ್ಲ. ವಿಕೆಟ್​ ಹೋಗುತ್ತಿದ್ದ ರೀತಿ ನೋಡಿದ ಮೇಲೂ ಪಿಚ್​ ಬೆಂಬಲಿಸಿಕೊಂಡು ಮಾತನಾಡಿದ್ದು ಸರಿಯಲ್ಲ. ಮೊದಲಿಗೆ ಇದು ಟೆಸ್ಟ್ ಕ್ರಿಕೆಟ್‌ಗೆ ಸೂಕ್ತವಾದ ಪಿಚ್ ಅಲ್ಲವೇ ಅಲ್ಲ. ಮೊದಲ ದಿನದಿಂದಲೇ ಪಿಚ್ ಸಾಕಷ್ಟು ತಿರುವು ಪಡೆದುಕೊಂಡಿತು. ನಾವು ಈ ತಪ್ಪನ್ನು ಹಲವು ವರ್ಷಗಳಿಂದ ಮಾಡುತ್ತಿದ್ದೇವೆ. ತಿರುಗುವ ಪಿಚ್‌ಗಳನ್ನು ಕೇಳುತ್ತಿದ್ದೇವೆ. ಆದರೆ, ನಾವು ನಮ್ಮ ಸೋಲುಗಳಿಂದ ಕಲಿಯುತ್ತಿಲ್ಲ" ಎಂದರು.

"ಇದು ಭಯಾನಕ ಪಿಚ್ ಎಂಬುದರಲ್ಲಿ ಅನುಮಾನವಿಲ್ಲ.​ ಅಂತಹ ಕಷ್ಟಕರವಾದ ಅಖಾಡದಲ್ಲಿ ಬ್ಯಾಟರ್​ಗಳು ಟೆಕ್ನಿಕ್​ನಿಂದ ಆಡಬೇಕು ಎಂದು ಗಂಭೀರ್ ಹೇಳಿರುವುದು ಒಪ್ಪುವಂತದ್ದಲ್ಲ. ಆ ಪಿಚ್​ನಲ್ಲಿ ನಾನೂ ಬೌಲಿಂಗ್ ಮಾಡಿದ್ರೂ ವಿಕೆಟ್ ಸಿಗುತ್ತಿತ್ತು. ಎರಡೂ ತಂಡಗಳು ಹೆಣಗಾಡಿವೆ. ಗಂಭೀರ್ ಒತ್ತಡದಲ್ಲಿದ್ದಾರೋ ಅಥವಾ ಇಲ್ಲವೋ ಅನ್ನೋದು ನನಗೆ ತಿಳಿದಿಲ್ಲ. ಆದರೆ, ಟೀಮ್ ಇಂಡಿಯಾ ಮಾತ್ರ ಒತ್ತಡದಲ್ಲಿದೆ ಎಂಬುದು ಖಚಿತ" ಎಂದು ಶ್ರೀಕಾಂತ್ ಹೇಳಿದ್ದಾರೆ,(ಏಜೆನ್ಸೀಸ್).