ಮತ್ತೊಮ್ಮೆ ಟ್ರೋಫಿ ಗೆಲ್ಲುವ ಅವಕಾಶ ಕೆಕೆಆರ್ ತಂಡಕ್ಕೆ ಈಗಲೂ ಇದೆ ಆದರೆ ಇದು ನಡೆದರೆ ಮಾತ್ರ! Kolkata Knight Riders

Kolkata Knight Riders : ಪ್ರಸ್ತುತ ನಡೆಯುತ್ತಿರುವ 19ನೇ ಆವೃತ್ತಿಯ ಐಪಿಎಲ್ ಟೂರ್ನಿ​ ಕೋಲ್ಕತ್ತ ನೈಟ್ ರೈಡರ್ಸ್ (KKR) ತಂಡದ ಪಾಲಿಗೆ ನಿರಾಶದಾಯಕವಾಗಿದೆ. ಇಲ್ಲಿಯವರೆಗೂ ಐದು ಪಂದ್ಯಗಳನ್ನು ಆಡಿರುವ ಕೆಕೆಆರ್​, ನಾಲ್ಕು ಪಂದ್ಯಗಳಲ್ಲಿ ಸೋಲುಂಡಿದ್ದು, ಒಂದು ಪಂದ್ಯ ಮಳೆಯಿಂದಾಗಿ ರದ್ದಾಗಿದೆ. ಹೀಗಾಗಿ, ಕೇವಲ ಒಂದು ಅಂಕ ಗಳಿಸಿ, ಅಂಕಪಟ್ಟಿಯಲ್ಲಿ ಕೊನೆಯ ಸ್ಥಾನದಲ್ಲಿದೆ. ತಂಡದ ನೆಟ್​ ರನ್ ರೇಟ್​ (-1.383) ಕೂಡ ಮೈನಸ್​ ಇದೆ.

ತೀವ್ರ ಕಳಪೆ ಪ್ರದರ್ಶನ ನೀಡುತ್ತಿರುವ ಕೆಕೆಆರ್​, ಈ ಬಾರಿ ಪ್ಲೇ ಆಫ್​ ಹಂತಕ್ಕೆ ತಲುಪುವುದು ತುಂಬಾನೇ ಕಷ್ಟ ಎಂಬ ಅಭಿಪ್ರಾಯಗಳು ಕೇಳಿಬರುತ್ತಿವೆ. ಬೆರಳೆಣಿಕೆ ಆಟಗಾರರನ್ನು ಬಿಟ್ಟರೆ, ತಂಡದ ಯಾವೊಬ್ಬ ಆಟಗಾರನು ಕೂಡ ನಿರೀಕ್ಷಿಯ ಪ್ರದರ್ಶನ ನೀಡುತ್ತಿಲ್ಲ. ಬ್ಯಾಟಿಂಗ್​ ಮತ್ತು ಬೌಲಿಂಗ್​ ಎರಡರಲ್ಲೂ ಕೆಕೆಆರ್​ ತಂಡ ಭಾರಿ ವೈಫಲ್ಯ ಅನುಭವಿಸುತ್ತಿದೆ. ಹೀಗಾಗಿ, ಕೆಕೆಆರ್​ ಮೇಲೆ ಈ ಬಾರಿಗ ಯಾರಿಗೂ ಭರವಸೆ ಇಲ್ಲ.

ಆದರೆ, ಅಚ್ಚರಿಯ ಸಂಗತಿ ಏನೆಂದರೆ, ಕೆಕೆಆರ್​ ತಂಡಕ್ಕೆ ಈಗಲೂ ಅವಕಾಶಗಳಿವೆ. ಸತತ ನಾಲ್ಕು ಪಂದ್ಯಗಳನ್ನು ಸೋತರು ಕೂಡ ಪ್ಲೇ ಆಫ್​​ ತಲುಪುವ ಹಾದಿ ಇನ್ನೂ ತೆರೆದೇ ಇದೆ. ಆದರೆ, ಹಾದಿಯಲ್ಲಿ ಸಾಗಬೇಕಾದರೆ, ಕೆಕೆಆರ್​ ತಂಡವು ಉಳಿದ ಪಂದ್ಯಗಳಲ್ಲಿ ತನ್ನ ಪ್ರದರ್ಶನವನ್ನು ಸುಧಾರಿಸಿಕೊಳ್ಳಬೇಕು ಮತ್ತು ಅಸಾಧಾರಣ ಪ್ರದರ್ಶನವನ್ನು ನೀಡಬೇಕು. ಒಂದು ವೇಳೆ ಕೆಕೆಆರ್​ ತಂಡ ಉಳಿದ ಪಂದ್ಯಗಳಲ್ಲಿ ಅಬ್ಬರಿಸಿದರೆ ಪ್ಲೇ ಆಫ್​ ತಲುಪುವುದು ಖಚಿತವಾಗಲಿದೆ.

ಕಳೆದ ಋತುಗಳನ್ನು ಗಮನಿಸಿದರೆ, 16 ಅಂಕಗಳನ್ನು ಗಳಿಸಿದ ತಂಡಗಳು ಪ್ಲೇಆಫ್ ಪ್ರವೇಶಿಸಿವೆ. ಇದರರ್ಥ ಕೋಲ್ಕತ್ತ ಇನ್ನೂ 15 ಅಂಕಗಳನ್ನು ಗಳಿಸಬೇಕಾಗಿದೆ. ಆದಾಗ್ಯೂ, ಇದಕ್ಕಾಗಿ ಕೋಲ್ಕತ್ತ 8 ಪಂದ್ಯಗಳನ್ನು ಗೆಲ್ಲಬೇಕು. ಈ ಋತುವಿನಲ್ಲಿ ಕೋಲ್ಕತ್ತ ತಂಡವು ಇನ್ನೂ 9 ಪಂದ್ಯಗಳನ್ನು ಆಡಬೇಕಾಗಿದೆ. ಅವರು 8 ಪಂದ್ಯಗಳನ್ನು ಗೆದ್ದರೆ, ತಂಡವು 17 ಅಂಕಗಳನ್ನು ಹೊಂದಿರುತ್ತದೆ. ಇದು ನಡೆದರೆ, ಯಾವುದೇ ಅಡೆತಡೆ ಇಲ್ಲದೇ ಕೆಕೆಆರ್ ಪ್ಲೇಆಫ್‌ಗೆ ಪ್ರವೇಶಿಸುತ್ತದೆ.

ಆದರೆ, ಉಳಿದಿರುವ 9 ಪಂದ್ಯಗಳಲ್ಲಿ ಎರಡು ಪಂದಗಳಲ್ಲಿ ಸೋತರೂ ಕೆಕೆಆರ್​ ತಂಡ ಪ್ರಸಕ್ತ ಐಪಿಎಲ್​ ಟೂರ್ನಿಯಿಂದ ಹೊರಬೀಳಲಿದೆ. ಈ ರೀತಿ ಆಗಬಾರದು ಅಂದರೆ, ಮುಂದಿನ ಪ್ರತಿಯೊಂದು ಪಂದ್ಯಗಳನ್ನು ಮಾಡು ಇಲ್ಲವೇ ಮಡಿ ಎಂಬಂತೆ ಪರಿಗಣಿಸಿ, ಅದ್ಭುತ ಪ್ರದರ್ಶನ ನೀಡಬೇಕಾಗುತ್ತದೆ. ಹೀಗಾಗಿ, ಮುಂದಿನ ಪಂದ್ಯಗಳಲ್ಲಿ ಕೆಕೆಆರ್​ ಯಾವ ರೀತಿ ಪ್ರದರ್ಶನ ನೀಡುತ್ತವೆ ಎಂಬುದನ್ನು ಕಾದು ನೋಡಬೇಕಾಗಿದೆ, (ಏಜೆನ್ಸೀಸ್​).