ಮಹಿಳಾ ರಾಷ್ಟ್ರೀಯ ಟಿ20 ಟೂರ್ನಿಯಲ್ಲಿ ಫೈನಲ್​ಗೇರಿದ ಕರ್ನಾಟಕದ ಕಿರಿಯರ ತಂಡ

ಬೆಂಗಳೂರು: ವಿಕೆಟ್​ ಕೀಪರ್​-ಬ್ಯಾಟರ್​ ಶ್ರೇಯಾ ಎಸ್​. ಚವಣ್​ (58 ರನ್​, 48 ಎಸೆತ, 10 ಬೌಂಡರಿ) ಅರ್ಧಶತಕದಾಟ ಮತ್ತು ಸಂಟಿತ ಬೌಲಿಂಗ್​, ಬಿಗಿ ಫೀಲ್ಡಿಂಗ್​ ನಿರ್ವಹಣೆಯ ಬಲದಿಂದ ಕರ್ನಾಟಕ ತಂಡ 19 ವಯೋಮಿತಿಯ ರಾಷ್ಟ್ರೀಯ ಮಹಿಳಾ ಟಿ20 (womens t20 cricket) ಟ್ರೋಫಿಯಲ್ಲಿ ಫೈನಲ್​ ಪ್ರವೇಶಿಸಿದೆ.

ಕೋಲ್ಕತದ ಆದಿತ್ಯ ಅಕಾಡೆಮಿ ಗ್ರೌಂಡ್​ನಲ್ಲಿ ಸೋಮವಾರ ನಡೆದ ಮೊದಲ ಸೆಮಿಫೈನಲ್​ ಪಂದ್ಯದಲ್ಲಿ ಕರ್ನಾಟಕ ತಂಡ ಬರೋಡ ವಿರುದ್ಧ 48 ರನ್​ಗಳಿಂದ ಗೆಲುವು ದಾಖಲಿಸಿತು. ಟಾಸ್​ ಸೋತು ಮೊದಲು ಬ್ಯಾಟಿಂಗ್​ಗೆ ಇಳಿದ ಕರ್ನಾಟಕ 6 ವಿಕೆಟ್​ಗೆ 117 ರನ್​ ಗಳಿಸಿತು. ಪ್ರತಿಯಾಗಿ ದೀಕ್ಷಾ ಜೆ (9ಕ್ಕೆ 2) ಮತ್ತು ನಾಯಕಿ ವಂದಿತಾ ಕೆ. ರಾವ್​ (21ಕ್ಕೆ 2) ಬಿಗಿ ದಾಳಿ ಮತ್ತು 3 ರನೌಟ್​ನಿಂದ ಲಯ ತಪ್ಪಿದ ಬರೋಡ 19.2 ಓವರ್​ಗಳಲ್ಲಿ 69 ರನ್​ಗಳಿಗೆ ಸರ್ವಪತನ ಕಂಡಿತು. ಕೋಲ್ಕತದಲ್ಲಿ ಬುಧವಾರ ನಡೆಯಲಿರುವ ಫೈನಲ್​ ಪಂದ್ಯದಲ್ಲಿ ಕರ್ನಾಟಕ ತಂಡ ಆಂಧ್ರ ವಿರುದ್ಧ ಪ್ರಶಸ್ತಿಗಾಗಿ ಸೆಣಸಲಿದೆ. ಆಂಧ್ರ 2ನೇ ಸೆಮಿಫೈನಲ್​ನಲ್ಲಿ ಬಂಗಾಳ ವಿರುದ್ಧ 5 ವಿಕೆಟ್​ಗಳಿಂದ ಜಯ ಸಾಧಿಸಿತು. 

ಕರ್ನಾಟಕ: 6 ವಿಕೆಟ್​ಗೆ 117 (ರಚಿತಾ 5, ಶ್ರೇಯಾ 58, ಕಾಶ್ವಿ 10, ಕಾರ್ಣಿಕಾ 27*, ವಂದಿತಾ 6*, ರಿಧಿ 29ಕ್ಕೆ 2), ಬರೋಡ: 19.2 ಓವರ್​ಗಳಲ್ಲಿ 69 (ವಾಣಿ 10, ವಿಧಿ 18, ರಿಧಿ 10*, ದೀಕ್ಷಾ 9ಕ್ಕೆ 2, ವಂದಿತಾ 21ಕ್ಕೆ 2, ಕಾಶ್ವಿ 9ಕ್ಕೆ 1, ಶ್ರೀನಿಧಿ 8ಕ್ಕೆ 1).