ಎಂಸಿಸಿಗೆ ಜೂಲಿಯನ್ ಮೆಥೆರೆಲ್ ಹೊಸ ಅಧ್ಯಕ್ಷ
ಲಂಡನ್: ದಿ ಹಂಡ್ರೆಡ್ ಟೂರ್ನಿಯ ಲಂಡನ್ ಸ್ಪಿರಿಟ್ ಫ್ರಾಂಚೈಸಿಯ ಚೇರ್ಮನ್ ಜೂಲಿಯನ್ ಮೆಥೆರೆಲ್ (Julian Metherell) ಪ್ರತಿಷ್ಠಿತ ಮೆರಿಲ್ಬೋನ್ ಕ್ರಿಕೆಟ್ ಕ್ಲಬ್ನ (MCC) ನೂತನ ಅಧ್ಯಕ್ಷರಾಗಿ ಆಯ್ಕೆಯಾಗಿದ್ದಾರೆ. ಅವರು ಮುಂದಿನ ಅಕ್ಟೋಬರ್ನಿಂದ ಮೂರು ವರ್ಷದ ಅವಧಿ ಹೊಂದಿರುತ್ತಾರೆ.
ಹಾಲಿ ಅಧ್ಯಕ್ಷರಾಗಿರುವ ಇಂಗ್ಲೆಂಡ್ ಮಾಜಿ ಬ್ಯಾಟರ್ ಎಡ್ ಸ್ಮಿತ್ ಉತ್ತರಾಧಿಕಾರಿ ಆಗಲಿರುವ ಮೆಥೆರೆಲ್ ಕಳೆದ 40 ವರ್ಷಗಳಿಂದ ಎಂಸಿಸಿ ಸದಸ್ಯರಾಗಿದ್ದು, 2025ರ ಎಜಿಎಂ ನಂತರ ಎಂಸಿಸಿ ಸಮಿತಿಯ ಸದಸ್ಯರೂ ಆಗಿದ್ದರು. ಅವರು ನಿರ್ಗಮನ ಅಧ್ಯಕ್ಷ ಸ್ಮಿತ್ ಅವರಿಂದಲೇ ನಾಮನಿರ್ದೇಶನಗೊಂಡಿದ್ದಾರೆ.
1787ರಲ್ಲಿ ಸ್ಥಾಪನೆಯಾದ ಎಂಸಿಸಿ, ಕ್ರಿಕೆಟ್ ಕಾಶಿ ಎನಿಸಿರುವ ಲಾರ್ಡ್ಸ್ ಕ್ರಿಕೆಟ್ ಮೈದಾನದ ಒಡೆತನ ಹೊಂದಿದೆ. ಜತೆಗೆ ಕ್ರಿಕೆಟ್ ನಿಯಮಾವಳಿಗಳ ಮಹಾರಕ್ಷಕನೂ ಆಗಿದೆ.