IPL-2026: ಆಡಿಸದಿದ್ದರೂ ಬದಲಿ ಆಟಗಾರರ ಸೇರ್ಪಡೆ; ಇದರ ಹಿಂದಿದೆ ರಿಟೇನ್ ಪ್ಲ್ಯಾನ್!
ನವದೆಹಲಿ: ಐಪಿಎಲ್ 19ನೇ (IPL 2026) ಆವೃತ್ತಿಯಲ್ಲಿ ಕೊನೇ ಲೀಗ್ ಪಂದ್ಯಕ್ಕೆ ಮುನ್ನ 3 ತಂಡಗಳು ನಾಲ್ವರು ಆಟಗಾರರನ್ನು ಬದಲಿಗರನ್ನಾಗಿ (replacement) ಸೇರ್ಪಡೆ ಮಾಡಿಕೊಂಡವು. ಮುಂಬೈ ಇಂಡಿಯನ್ಸ್ ತಂಡ ಗಾಯದಿಂದಾಗಿ ಹೊರಬಿದ್ದ ಕ್ವಿಂಟನ್ ಡಿಕಾಕ್ ಮತ್ತು ರಾಜ್ ಬಾವಾ ಬದಲಿಗೆ ಮಹಿಪಾಲ್ ಲೊಮ್ರೊರ್ ಮತ್ತು ರುಚಿತ್ ಅಹಿರ್ರನ್ನು ಸೇರಿಸಿಕೊಂಡರೆ, ರಾಜಸ್ಥಾನ ರಾಯಲ್ಸ್ ತಂಡ ರವಿ ಸಿಂಗ್ ಬದಲಿಗೆ ಇಮಾನ್ಜೋತ್ ಚಾಹಲ್ ಮತ್ತು ಕೆಕೆಆರ್ ತಂಡ ಮಥೀಶ್ ಪಥಿರಣ ಬದಲಿಗೆ ಕನ್ನಡಿಗ ಲವನೀತ್ ಸಿಸೋಡಿಯಾರನ್ನು ಸೇರಿಸಿಕೊಂಡಿತು. ಆದರೆ ಈ ನಾಲ್ವರು ಬದಲಿಗರಿಗೂ ಕೊನೇ ಲೀಗ್ ಪಂದ್ಯಗಳಲ್ಲಿ ಆಡುವ ಅವಕಾಶ ಸಿಗಲಿಲ್ಲ. ಕಣಕ್ಕಿಳಿಸದ ನಡುವೆಯೂ ಬದಲಿ ಆಟಗಾರರನ್ನು ಸೇರಿಸಿಕೊಂಡ ಈ ನಡೆಯ ಹಿಂದೆ ಜಾಣ ಕಾರ್ಯತಂತ್ರವೊಂದೂ ಇದೆ.
ಅದೆಂದರೆ, ಬದಲಿಗರಾಗಿ ಸೇರಿಸಿಕೊಂಡ ಈ ಆಟಗಾರರನ್ನು ಮುಂದಿನ ಆವೃತ್ತಿಗೆ ರಿಟೇನ್ (retention) ಮಾಡಿಕೊಳ್ಳುವ ಅವಕಾಶವೂ ಈ ತಂಡಗಳಿಗೆ ಲಭಿಸಿದೆ. ಐಪಿಎಲ್ ನಿಯಮಾವಳಿ ಪ್ರಕಾರ, ತಂಡವೊಂದು ತನ್ನ 12ನೇ ಪಂದ್ಯದವರೆಗೆ ಗಾಯಗೊಂಡ ಆಟಗಾರರಿಗೆ ಬದಲಿಗರನ್ನಾಗಿ ಸೇರಿಸಿಕೊಂಡವರನ್ನು ಮತ್ತು ಗಾಯದಿಂದ ಹೊರಬಿದ್ದ ಇಬ್ಬರನ್ನೂ ಮುಂದಿನ ಆವೃತ್ತಿಗೂ ರಿಟೇನ್ ಮಾಡಿಕೊಳ್ಳಬಹುದು. ಹೀಗಾಗಿ ತಂಡಗಳು ಕೊನೇ ಲೀಗ್ ಪಂದ್ಯಕ್ಕೆ ಅಗತ್ಯವಿಲ್ಲದಿದ್ದರೂ, ಬದಲಿ ಆಟಗಾರರನ್ನು ಸೇರಿಸಿಕೊಂಡು, ಆಟಗಾರರ ರಿಟೇನ್ ಆಯ್ಕೆಯ ಅವಕಾಶ ಸೃಷ್ಟಿಸಿಕೊಂಡಿವೆ.
ಕಳೆದ ವರ್ಷ ಸಿಎಸ್ಕೆ ತಂಡ ಇದೇ ರೀತಿ, ಗುರುಜಪ್ನೀತ್ ಬದಲಿಗೆ ಡಿವಾಲ್ಡ್ ಬ್ರೆವಿಸ್ರನ್ನು ಸೇರಿಸಿಕೊಂಡು ಬಳಿಕ, ಹಾಲಿ ಆವೃತ್ತಿಗೆ ಇಬ್ಬರನ್ನೂ ರಿಟೇನ್ ಮಾಡಿಕೊಂಡಿತ್ತು.