IPL-2026: ಇಂದು ಆರ್ಸಿಬಿ-ಗುಜರಾತ್ ಟೈಟಾನ್ಸ್ ಫೈನಲ್; ಯಾರೇ ಗೆದ್ದರೂ 2ನೇ ಬಾರಿ ಚಾಂಪಿಯನ್!
ಅಹಮದಾಬಾದ್: ವಿಶ್ವದ ಶ್ರೀಮಂತ ಟಿ20 ಲೀಗ್ ಐಪಿಎಲ್ನಲ್ಲಿ (IPL) ಮೊದಲ ಕಪ್ ಗೆಲ್ಲಲು ಬರೋಬ್ಬರಿ 18 ವರ್ಷಗಳ ಕಾಲ ಕಾದಿದ್ದ ಕನ್ನಡಿಗರ ನೆಚ್ಚಿನ ತಂಡವಾದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ಇದೀಗ ಒಂದೇ ವರ್ಷದ ಅಂತರದಲ್ಲಿ ಎರಡನೇ ಚಾಂಪಿಯನ್ ಪಟ್ಟಕ್ಕೇರುವ ಹೊಸ್ತಿಲಲ್ಲಿ ಬಂದು ನಿಂತಿದೆ. ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ಭಾನುವಾರ ನಡೆಯಲಿರುವ ಐಪಿಎಲ್ 19ನೇ ಆವೃತ್ತಿಯ ಫೈನಲ್ ಪಂದ್ಯದಲ್ಲಿ ಆರ್ಸಿಬಿ ತಂಡ ಗುಜರಾತ್ ಟೈಟಾನ್ಸ್ ಎದುರು ಸೆಣಸಾಡಲಿದೆ. ಈ ಕಾದಾಟದಲ್ಲಿ ಯಾರೇ ಗೆದ್ದರೂ 2ನೇ ಬಾರಿ ಐಪಿಎಲ್ ಕಿರೀಟ ಒಲಿಸಿಕೊಳ್ಳಲಿದ್ದಾರೆ. ಎಲ್ಲ ವಿಭಾಗಗಳಲ್ಲೂ ಬಲಿಷ್ಠವಾಗಿರುವ ಮತ್ತು ಟೂರ್ನಿಯುದ್ದಕ್ಕೂ ಸ್ಥಿರ ನಿರ್ವಹಣೆ ತೋರುತ್ತ ಬಂದಿರುವ ರಜತ್ ಪಾಟೀದಾರ್ ಪಡೆ ಈ ಪಂದ್ಯದಲ್ಲಿ ಫೇವರಿಟ್ ತಂಡವಾಗಿ ಕಣಕ್ಕಿಳಿಯಲಿದ್ದು, ಸತತ 2ನೇ ಬಾರಿ ಕಪ್ ಗೆದ್ದು ಹೊಸ ಇತಿಹಾಸ ನಿರ್ಮಿಸುವ ಹಂಬಲದಲ್ಲಿದೆ. "ಈ ಸಲ ಕಪ್ ನಮ್ದೇ' ಎಂಬ ಅಭಿಮಾನಿಗಳ ಆಸೆಯನ್ನು ಕೊನೆಗೂ ಕಳೆದ ವರ್ಷ ಈಡೇರಿಸಿದ್ದ ಆರ್ಸಿಬಿ, "ಈ ಸಲ ಕೂಡ ಕಪ್ ನಮ್ದೇ' ಎಂಬ ಈ ಬಾರಿಯ ಪರಿಷ್ಕೃತ ಘೋಷವಾಕ್ಯವನ್ನೂ ನನಸಾಗಿಸಲು ಸರ್ವಸನ್ನದ್ಧವಾಗಿದೆ. ಮತ್ತೊಂದೆಡೆ ಭಾರತ ಟೆಸ್ಟ್-ಏಕದಿನ ತಂಡದ ಸಾರಥಿ ಶುಭಮಾನ್ ಗಿಲ್, "ಐಪಿಎಲ್ ಟ್ರೋಫಿ' ಗೆದ್ದ ನಾಯಕರ ಪಟ್ಟಿಗೆ ಸೇರುವ ತವಕದಲ್ಲಿದ್ದಾರೆ.
ಹಾಲಿ ಆವೃತ್ತಿಯಲ್ಲಿ ಉಭಯ ಫೈನಲಿಸ್ಟ್ಗಳ ಹಾದಿ ಬಹುತೇಕ ಭಿನ್ನ ರೀತಿಯಲ್ಲಿ ಸಾಗಿ ಬಂದಿದೆ. ರಜತ್ ಪಾಟೀದಾರ್ ಪಡೆ ಆರಂಭದಿಂದಲೇ ಬಲಿಷ್ಠ ನಿರ್ವಹಣೆ ತೋರುತ್ತ ಮೊದಲ ತಂಡವಾಗಿ ಪ್ಲೇಆಫ್ ಹಂತಕ್ಕೇರಿತ್ತು ಮತ್ತು ಲೀಗ್ ಹಂತದ ಅಂಕಪಟ್ಟಿಯಲ್ಲೂ ಅಗ್ರಸ್ಥಾನ ಅಲಂಕರಿಸಿತ್ತು. ಬಹುತೇಕ ಎಲ್ಲ ವಿಭಾಗಗಳಲ್ಲೂ ಆರ್ಸಿಬಿ ಹೆಚ್ಚಿನ ಲೋಪದೋಷಗಳಿಲ್ಲದೆ ಪ್ರಾಬಲ್ಯ ಮೆರೆದಿದೆ. ಅತ್ತ ಗುಜರಾತ್ ತಂಡ ಟೂರ್ನಿಯ ಆರಂಭಿಕ 2 ಪಂದ್ಯ ಸೋತು ಆಘಾತಕಾರಿ ಆರಂಭವನ್ನೇ ಕಂಡಿತ್ತು. ಆದರೆ ಬಳಿಕ ಸತತ 3 ಜಯದೊಂದಿಗೆ ಲಯಕ್ಕೆ ಮರಳಿತ್ತು. ಅದರಲ್ಲೂ ಆಲ್ರೌಂಡರ್ ಜೇಸನ್ ಹೋಲ್ಡರ್ ಸೇರ್ಪಡೆಯ ಬಳಿಕ ಹೆಚ್ಚಿನ ಸಮತೋಲನ ಕಂಡಿದ್ದ ಶುಭಮಾನ್ ಗಿಲ್ ಪಡೆ, ಸತತ 5 ಜಯದೊಂದಿಗೆ ಪ್ಲೇಆಫ್ ರೇಸ್ನಲ್ಲಿ ಮುಂಚೂಣಿಗೆ ಬಂದಿತ್ತು. ಕೊನೇ ಲೀಗ್ ಪಂದ್ಯದಲ್ಲಿ ಸಿಎಸ್ಕೆ ಎದುರು ಬೃಹತ್ ಜಯದೊಂದಿಗೆ ಅಗ್ರ 2ರೊಳಗೂ ಸ್ಥಾನ ಭದ್ರಪಡಿಸಿಕೊಂಡಿತ್ತು. ಬಳಿಕ ಮೊದಲ ಕ್ವಾಲಿಫೈಯರ್ನಲ್ಲಿ ಆರ್ಸಿಬಿ ಎದುರು ಸೋತರೂ, 2ನೇ ಕ್ವಾಲಿಫೈಯರ್ನಲ್ಲಿ ರಾಜಸ್ಥಾನದ ಯುವ ಬ್ಯಾಟಿಂಗ್ ಸೆನ್ಸೇಶನ್ ವೈಭವ್ ಸೂರ್ಯವಂಶಿ ಪ್ರತಿರೋಧದ ನಡುವೆಯೂ ಗೆದ್ದು ಫೈನಲ್ ಟಿಕೆಟ್ ಒಲಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದೆ. ಇದೀಗ ಟೀಮ್ ಇಂಡಿಯಾದ "ಕಿಂಗ್' ವಿರಾಟ್ ಕೊಹ್ಲಿ ಮತ್ತು "ಪ್ರಿನ್ಸ್' ಶುಭಮಾನ್ ಗಿಲ್ ಪೈಕಿ ಭಾನುವಾರ ಒಬ್ಬರಿಗೆ ಮಾತ್ರ ಟ್ರೋಫಿಯೊಂದಿಗೆ ಸಂಭ್ರಮಿಸುವ ಅವಕಾಶವಿದೆ.
ಸಾಲ್ಟ್, ಸಿರಾಜ್ ಫಿಟ್ನೆಸ್ ಕಳವಳ
ಕೈಬೆರಳು ಗಾಯದಿಂದ ಚೇತರಿಸಿಕೊಂಡಿರುವ ಆರಂಭಿಕ ಫಿಲ್ ಸಾಲ್ಟ್ ಈಗಾಗಲೆ ಆರ್ಸಿಬಿ ತಂಡವನ್ನು ಮರಳಿ ಕೂಡಿಕೊಂಡಿದ್ದರೂ, ಮೊದಲ ಕ್ವಾಲಿಫೈಯರ್ನಲ್ಲಿ ಆಡಿರಲಿಲ್ಲ. ಫೈನಲ್ನಲ್ಲಿ ಅವರು ಆಡುವ ಬಗ್ಗೆಯೂ ಸ್ಪಷ್ಟತೆ ಇಲ್ಲ. ಅತ್ತ ಗುಜರಾತ್ ವೇಗಿ ಮೊಹಮದ್ ಸಿರಾಜ್ ಕೂಡ ಫಿಟ್ನೆಸ್ ಕಳವಳ ಹೊಂದಿದ್ದಾರೆ. 2ನೇ ಕ್ವಾಲಿಫೈಯರ್ ವೇಳೆ ಅವರು ಭುಜ ನೋವಿನ ನಡುವೆ 4 ಓವರ್ಗಳ ಕೋಟಾ ಮುಗಿಸಿದರೂ, ಬೇಗನೆ ಮೈದಾನ ತೊರೆದಿದ್ದರು.
ಟಾಪ್ ಬ್ಯಾಟರ್ಸ್: ವಿರಾಟ್ ಕೊಹ್ಲಿ (600), ರಜತ್ ಪಾಟೀದಾರ್ (486), ದೇವದತ್ ಪಡಿಕ್ಕಲ್ (463).
ಟಾಪ್ ಬೌಲರ್ಸ್: ಭುವನೇಶ್ವರ್ (26), ರಸಿಕ್ ದಾರ್ (16), ಜೋಶ್ ಹ್ಯಾಸಲ್ವುಡ್ (13).
*ಎಲ್ಲ ವಿಭಾಗಗಳಲ್ಲೂ ಬಲಿಷ್ಠ.
*ಕೊಹ್ಲಿ, ಪಾಟೀದಾರ್ ಬ್ಯಾಟಿಂಗ್.
*ಭುವನೇಶ್ವರ್ ಭರ್ಜರಿ ಫಾರ್ಮ್
*ಟಿಮ್ ಡೇವಿಡ್, ಜಿತೇಶ್ ರನ್ಬರ.
*ಫಿಲ್ ಸಾಲ್ಟ್ ಫಿಟ್ನೆಸ್ ಕಳವಳ.
*ರೊಮಾರಿಯೊ ಶೆಫರ್ಡ್ ದುಬಾರಿ.
ಟೂರ್ನಿ ನಿರ್ವಹಣೆ: ಪಂದ್ಯ: 15, ಜಯ: 10, ಸೋಲು: 5.
ಟಾಪ್ ಬ್ಯಾಟರ್ಸ್: ಶುಭಮಾನ್ ಗಿಲ್ (722), ಸಾಯಿ ಸುದರ್ಶನ್ (507), ಜೋಸ್ ಬಟ್ಲರ್ (507).
ಟಾಪ್ ಬೌಲರ್ಸ್: ಕಗಿಸೊ ರಬಾಡ (28), ರಶೀದ್ ಖಾನ್ (19), ಮೊಹಮದ್ ಸಿರಾಜ್ (18).
*ರಬಾಡ, ಹೋಲ್ಡರ್ ಬಿಗಿ ಬೌಲಿಂಗ್.
*ಎರಡನೇ ಸ್ಪಿನ್ನರ್ ವೈಫಲ್ಯ.
ಟೂರ್ನಿ ನಿರ್ವಹಣೆ: ಪಂದ್ಯ: 16, ಜಯ: 10, ಸೋಲು: 6.
ನೇರಪ್ರಸಾರ: ಸ್ಟಾರ್ ಸ್ಪೋರ್ಟ್ಸ್, ಜಿಯೋ ಹಾಟ್ಸ್ಟಾರ್.