'ರೋಕೊ' ಜೋಡಿ ಆಡದಿರುವುದೇ... ಮೊದಲ ಟಿ20 ಪಂದ್ಯಕ್ಕೂ ಮುನ್ನ ಐಡೆನ್ ಮಾರ್ಕ್ರಾಮ್ ಹೇಳಿಕೆ ವೈರಲ್​

ನವದೆಹಲಿ: ಇಂದು ಕಟಕ್​ ಕ್ರೀಡಾಂಗಣದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧದ ಮೊದಲ ಟಿ20 ಪಂದ್ಯ ನಡೆಯಲಿದ್ದು, ಟೀಮ್ ಇಂಡಿಯಾ ಶುಭಾರಂಭಕ್ಕೆ ಎದುರುನೋಡುತ್ತಿದೆ. ಇತ್ತೀಚೆಗಷ್ಟೇ, ಏಕದಿನ ಸರಣಿಯಲ್ಲಿ 2-1 ಅಂತರದಲ್ಲಿ ಭಾರತ ಸರಣಿ ಗೆದ್ದು ಬೀಗಿದ್ದು, ತಂಡದ ಉತ್ಸಾಹವನ್ನು ಇನ್ನೊಂದು ಹಂತಕ್ಕೆ ಕೊಂಡೊಯ್ದಿದೆ. ಇದರಲ್ಲಿ, ಎರಡನೇ ಮಾತಿಲ್ಲ. ಈಗ ಮೊದಲ ಪಂದ್ಯಕ್ಕೆ ಎರಡು ತಂಡಗಳು ಭರ್ಜರಿ ತಯಾರಿಗಳನ್ನು ಮಾಡಿಕೊಂಡಿದ್ದು, ಹರಿಣರ ಕ್ಯಾಪ್ಟನ್​ ಐಡೆನ್ ಮಾರ್ಕ್ರಾಮ್ ನೀಡಿದ ಹೇಳಿಕೆ ಸದ್ಯ ಜಾಲತಾಣಗಳಲ್ಲಿ ಹರಿದಾಡಿದೆ.

ಪಂದ್ಯ ಆರಂಭಕ್ಕೂ ಒಂದು ದಿನದ ಮೊದಲು ಸುದ್ದಿಗಾರರೊಂದಿಗೆ ಮಾತನಾಡಿದ ದಕ್ಷಿಣ ಆಫ್ರಿಕಾ ತಂಡದ ನಾಯಕ, "ಟಿ20 ಸರಣಿಗೆ ನಾವು ಸಿದ್ಧವಾಗಿದ್ದೇವೆ. 20 ಓವರ್​ ಫಾರ್ಮೆಟ್​ನಲ್ಲಿ ಟೀಮ್ ಇಂಡಿಯಾ ಒಂದು ಬಲಿಷ್ಠ ತಂಡವಾಗಿದೆ. ಖುಷಿ ವಿಷಯ ಏನೆಂದರೆ, ಟಿ20 ತಂಡದಲ್ಲಿ ರೋಹಿತ್ ಶರ್ಮ ಮತ್ತು ವಿರಾಟ್​ ಕೊಹ್ಲಿ ಇಲ್ಲದಿರುವುದು. ಆದರೂ ಭಾರತ ತಂಡ ಬಲಿಷ್ಠವಾಗಿದೆ" ಎಂದರು.

"ನಮಗೆ ಇಂತದ್ದೇ, ಅಂತದ್ದೇ ಅಂತ ಯಾವುದೇ ನಿರ್ದಿಷ್ಟ ಪ್ಲ್ಯಾನ್​ಗಳು ಇಲ್ಲ. ಇದು ಟಿ20 ಕ್ರಿಕೆಟ್ ಆಗಿರುವುದರಿಂದ ಖಂಡಿತ ಆಟದಲ್ಲಿ ಮಜಾವಿರಲಿದೆ. ಇಲ್ಲಿ ಆಟಗಾರರು ತಮ್ಮನ್ನು ತಾವು ಸಂಪೂರ್ಣವಾಗಿ ತೊಡಗಿಸಿಕೊಳ್ಳಬೇಕು ಮತ್ತು ಆಟವನ್ನು ಆನಂದಿಸಿ, ತಮ್ಮ ಅತ್ಯುತ್ತಮ ಕೌಶಲ್ಯಗಳನ್ನು ಪ್ರದರ್ಶಿಸಬೇಕು. ಪಿಚ್​ ನಮ್ಮ ಪರವಿದ್ದರೆ ಸೂಕ್ತ ಎಂಬ ಭಾವನೆ ನಮ್ಮಲ್ಲಿ ಮೂಡುತ್ತದೆ. ಕಾರಣ, ಹೆಚ್ಚುವರಿ ರನ್​ಗಳನ್ನು ಕಲೆಹಾಕಬಹದು ಎಂದು. ಅಕಸ್ಮಾತ್​ ಇಲ್ಲವಾದರೆ, ಆಟದ ನಡುವೆಯೇ ಪಿಚ್​ಗೆ ಹೊಂದಿಕೊಳ್ಳುತ್ತೇವೆ" ಎಂದು ಹೇಳಿದ್ದಾರೆ,(ಏಜೆನ್ಸೀಸ್).