2026ರ ಕಿರಿಯರ ವಿಶ್ವಕಪ್ ವೇಳಾಪಟ್ಟಿ ಪ್ರಕಟ: ಭಾರತಕ್ಕೆ ಅಮೆರಿಕ ಮೊದಲ ಎದುರಾಳಿ
ನವದೆಹಲಿ: ಮುಂದಿನ ವರ್ಷ ನಮೀಬಿಯಾ-ಜಿಂಬಾಬ್ವೆ ಜಂಟಿ ಆತಿಥ್ಯದಲ್ಲಿ ನಡೆಯಲಿರುವ 16ನೇ ಆವೃತ್ತಿಯ 19 ವಯೋಮಿತಿ ಪುರುಷರ ಏಕದಿನ ವಿಶ್ವಕಪ್ ಟೂರ್ನಿಯ (Under 19 cricket world cup) ವೇಳಾಪಟ್ಟಿಯನ್ನು ಐಸಿಸಿ ಬುಧವಾರ ಪ್ರಕಟಿಸಿದೆ. ಜನವರಿ 15ರಿಂದ ಫೆಬ್ರವರಿ 6ರವರೆಗೆ ನಡೆಯಲಿರುವ ಟೂರ್ನಿಯಲ್ಲಿ ಐದು ಬಾರಿಯ ಚಾಂಪಿಯನ್ ಭಾರತ ತಂಡ ಅಮೆರಿಕ ವಿರುದ್ಧ ಉದ್ಘಾಟನಾ ಪಂದ್ಯ ಆಡಲಿದೆ.
ಒಟ್ಟು 16 ತಂಡಗಳು ಆಡಲಿರುವ ಟೂರ್ನಿಯ ಸ್ವರೂಪ ಹಿಂದಿನ ಆವೃತ್ತಿಗಳಂತೆಯೇ ಇರಲಿದ್ದು, ತಂಡಗಳನ್ನು ತಲಾ 4ರಂತೆ 4 ಗುಂಪುಗಳಲ್ಲಿ ವಿಂಗಡಿಸಲಾಗಿದೆ. ಪ್ರತಿ ಗುಂಪಿನ ಅಗ್ರ 2 ತಂಡಗಳು ಸೂಪರ್-6 ಹಂತಕ್ಕೇರಲಿದ್ದು, ಇಲ್ಲೂ ತಲಾ 6 ತಂಡಗಳ 2 ಗುಂಪುಗಳು ಇರಲಿವೆ. ಸೂಪರ್-6 ಗುಂಪಿನ ಅಗ್ರ 2 ತಂಡಗಳು ಸೆಮಿಫೈನಲ್ಗೇರಲಿವೆ. ಜನವರಿ 24ರಿಂದ ಫೆಬ್ರವರಿ 1ರವರೆಗೆ ಸೂಪರ್-6 ಹಂತದ ಪಂದ್ಯಗಳು ನಡೆದರೆ, ಫೆಬ್ರವರಿ 3 ಮತ್ತು 4ರಂದು ಸೆಮಿಫೈನಲ್ ಮತ್ತು ಫೆಬ್ರವರಿ 6ರಂದು ಫೈನಲ್ ನಡೆಯಲಿದೆ. ನಾಕೌಟ್ ಪಂದ್ಯಗಳಿಗೆ ಮಾತ್ರ ಮರುದಿನ ಮೀಸಲು ದಿನವಾಗಿರುತ್ತದೆ.
23 ದಿನಗಳ ಅಂತರದಲ್ಲಿ ಜಿಂಬಾಬ್ವೆಯ 3 ಮತ್ತು ನಮೀಬಿಯಾದ 2 ತಾಣಗಳಲ್ಲಿ ಒಟ್ಟಾರೆ 41 ಪಂದ್ಯಗಳು ನಡೆಯಲಿವೆ. ಪೂರ್ವ ಆಫ್ರಿಕಾದ ತಂಜಾನಿಯಾ ದೇಶ ಮೊದಲ ಬಾರಿಗೆ ಟೂರ್ನಿಯಲ್ಲಿ ಆಡಲಿದೆ. ಆಸ್ಟ್ರೆಲಿಯಾ ತಂಡ ಟೂರ್ನಿಯ ಹಾಲಿ ಚಾಂಪಿಯನ್ ಎನಿಸಿದೆ.
"19 ವಯೋಮಿತಿಯ ವಿಶ್ವಕಪ್ ಭವಿಷ್ಯದ ತಾರೆಯರನ್ನು ಪರಿಚಯಿಸುವ ಟೂರ್ನಿಯಾಗಿದೆ. ಬ್ರಿಯಾನ್ ಲಾರಾ, ಸನತ್ ಜಯಸೂರ್ಯ, ವಿರಾಟ್ ಕೊಹ್ಲಿ, ಕೇನ್ ವಿಲಿಯಮ್ಸನ್, ಸ್ಟೀವನ್ ಸ್ಮಿತ್ ಮತ್ತು ಶುಭಮಾನ್ ಗಿಲ್ ಇಲ್ಲಿಂದಲೇ ಬೆಳಕಿಗೆ ಬಂದವರು. 2026ರ ಆವೃತ್ತಿಯಲ್ಲಿ ಮತ್ತಷ್ಟು ಯುವ ಕ್ರಿಕೆಟಿಗರನ್ನು ಜಗತ್ತಿಗೆ ಪರಿಚಯಿಸಲು ಸಜ್ಜಾಗಿದ್ದೇವೆ' ಎಂದು ಐಸಿಸಿ ಚೇರ್ಮನ್ ಜಯ್ ಷಾ ತಿಳಿಸಿದ್ದಾರೆ.
ಜಿಂಬಾಬ್ವೆಯ ಹರಾರೆಯ ಹರಾರೆ ಸ್ಪೋರ್ಟ್ಸ್ ಕ್ಲಬ್, ತಕಶಿಂಗ ಸ್ಪೋರ್ಟ್ಸ್ ಕ್ಲಬ್, ಬುಲವಾಯೊದ ಕ್ವೀನ್ಸ್ ಸ್ಪೋರ್ಟ್ಸ್ ಕ್ಲಬ್, ನಮೀಬಿಯಾದ ವಿಂಡೋಕ್ ಕ್ರಿಕೆಟ್ ಗ್ರೌಂಡ್, ಎಚ್ಪಿ ಓವಲ್ಗಳಲ್ಲಿ ಪಂದ್ಯಗಳು ನಡೆಯಲಿವೆ.
ಎಲ್ಲ ತಂಡಗಳು ಜನವರಿ 8ರಂದು ಆತಿಥೇಯ ದೇಶವನ್ನು ತಲುಪಲಿದ್ದು, ಜನವರಿ 9ರಿಂದ 14ರವರೆಗೆ ಅಭ್ಯಾಸ ಪಂದ್ಯಗಳನ್ನು ಆಡಲಿವೆ.
ಎ: ಭಾರತ, ಬಾಂಗ್ಲಾದೇಶ, ನ್ಯೂಜಿಲೆಂಡ್, ಅಮೆರಿಕ.
ಬಿ: ಇಂಗ್ಲೆಂಡ್, ಪಾಕಿಸ್ತಾನ, ಸ್ಕಾಟ್ಲೆಂಡ್, ಜಿಂಬಾಬ್ವೆ.
ಸಿ: ಆಸ್ಟ್ರೆಲಿಯಾ, ಐರ್ಲೆಂಡ್, ಜಪಾನ್, ಶ್ರೀಲಂಕಾ.
ಡಿ: ದ. ಆಫ್ರಿಕಾ, ಅಫ್ಘಾನಿಸ್ತಾನ, ತಂಜಾನಿಯಾ, ವೆಸ್ಟ್ ಇಂಡೀಸ್.