ಅಂಧರ ಟಿ20 ವಿಶ್ವಕಪ್: ಪ್ರಶಸ್ತಿ ಸುತ್ತಿಗೇರಿದ ಭಾರತದ ಮಹಿಳೆಯರು
ಬೆಂಗಳೂರು: ಕನ್ನಡತಿ ದೀಪಿಕಾ ಟಿ.ಸಿ. ಸಾರಥ್ಯದ ಭಾರತ ತಂಡ ಚೊಚ್ಚಲ ಆವೃತಿಯ ಮಹಿಳಾ ಅಂಧರ ಟಿ20 ವಿಶ್ವಕಪ್ (Women’s T20 World Cup Cricket) ಟೂರ್ನಿಯಲ್ಲಿ ಪ್ರಶಸ್ತಿ ಸುತ್ತಿಗೇರಿದೆ. ಶ್ರೀಲಂಕಾದ ಕೊಲಂಬೊದಲ್ಲಿ ಶನಿವಾರ ನಡೆದ ಸೆಮಿಫೈನಲ್ ಪಂದ್ಯದಲ್ಲಿ ಭಾರತ ತಂಡ ಆಸ್ಟ್ರೆಲಿಯಾ ವಿರುದ್ಧ 9 ವಿಕೆಟ್ಗಳಿಂದ ಸುಲಭ ಗೆಲುವು ದಾಖಲಿಸುವ ಮೂಲಕ ಈ ಸಾಧನೆ ಮಾಡಿದೆ. ಇತ್ತೀಚೆಗಷ್ಟೇ ಏಕದಿನ ವಿಶ್ವಕಪ್ ಗೆದ್ದಿದ್ದ ಭಾರತದ ಮಹಿಳೆಯರು ಕ್ರಿಕೆಟ್ನಲ್ಲಿ ಇನ್ನೊಂದು ವಿಶ್ವ ಕಿರೀಟ ಜಯಿಸುವ ಸನಿಹ ತಲುಪಿದ್ದಾರೆ.
ಪಿ. ಸಾರಾ ಓವಲ್ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದು ಕ್ಷೇತ್ರರಕ್ಷಣೆಯನ್ನು ಆಯ್ದುಕೊಂಡ ಭಾರತ ತಂಡ, ಚುರುಕಿನ ಫೀಲ್ಡಿಂಗ್ ಮತ್ತು ಬಿಗಿ ಬೌಲಿಂಗ್ ನಿರ್ವಹಣೆಯ ಮೂಲಕ ಆಸ್ಟ್ರೆಲಿಯಾವನ್ನು 9 ವಿಕೆಟ್ಗೆ 109 ರನ್ಗಳಿಗೆ ನಿಯಂತ್ರಿಸಿತು. ಆಸೀಸ್ ಪರ ಜೂಲಿ ನ್ಯೂಮನ್ (25), ಚನಕನ್ ಬುವಾಖಾವೊ (34) ಮತ್ತು ಕರ್ಟ್ನಿ ಲೆವಿಸ್ (14) ಉಪಯುಕ್ತ ಕೊಡುಗೆ ನೀಡಿ ಮೊತ್ತವನ್ನು 100ರ ಗಡಿ ದಾಟಿಸಿದರು. ಪ್ರತಿಯಾಗಿ ಭಾರತ ತಂಡ 11.5 ಓವರ್ಗಳಲ್ಲೇ 1 ವಿಕೆಟ್ಗೆ 112 ರನ್ ಗಳಿಸಿ ಜಯಭೇರಿ ಬಾರಿಸಿತು.
ಬಿ3 ಆಟಗಾರ್ತಿ ಗಂಗಾ ಕದಂ ಅಜೇಯ 41 ರನ್ (31 ಎಸೆತ) ಬಾರಿಸಿದರು. ಭಾರತಕ್ಕೆ ಬಿರುಸಿನ ಆರಂಭ ಒದಗಿಸಿ ಗೆಲುವು ಖಾತ್ರಿಪಡಿಸಿದ ಬಸಂತಿ ಹನ್ಸದಾ (45 ರನ್, 39 ಎಸೆತ) ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು. ದಿನದ ಇನ್ನೊಂದು ಸೆಮಿೈನಲ್ ಪಂದ್ಯದಲ್ಲಿ ಪಾಕಿಸ್ತಾನ ವಿರುದ್ಧ ನೇಪಾಳ 7 ವಿಕೆಟ್ಗಳಿಂದ ಜಯ ಸಾಧಿಸಿತು.
ಆಸ್ಟ್ರೆಲಿಯಾ: 9 ವಿಕೆಟ್ಗೆ 109 (ಬುವಾಖಾವೊ 34, ನ್ಯೂಮನ್ 25, ಜಮುನಾ ರಾಣಿ 30ಕ್ಕೆ 1, ಅನು ಕುಮಾರಿ 21ಕ್ಕೆ 1, ಸಿಮ್ರನ್ಜೀತ್ 6ಕ್ಕೆ 1), ಭಾರತ: 11.5 ಓವರ್ಗಳಲ್ಲಿ 1 ವಿಕೆಟ್ಗೆ 112 (ಬಸಂತಿ ಹನ್ಸದಾ 45, ಗಂಗಾ ಕದಂ 41*, ಕರುಣಾ 16*).