ಲಿಂಕಾನ್: ಧ್ರುವ ಜುರೆಲ್ (71 ರನ್, 95 ಎಸೆತ, 9 ಬೌಂಡರಿ, 2 ಸಿಕ್ಸರ್), ತಿಲಕ್ ವರ್ಮ (81*ರನ್, 164 ಎಸೆತ, 5 ಬೌಂಡರಿ, 2 ಸಿಕ್ಸರ್), ವಾಷಿಂಗ್ಟನ್ ಸುಂದರ್ (50* ರನ್, 107 ಎಸೆತ, 2 ಬೌಂಡರಿ) ಅರ್ಧಶತಕದಾಟ ಮತ್ತು ಕನ್ನಡಿಗ ಪ್ರಸಿದ್ಧಕೃಷ್ಣ (12ಕ್ಕೆ 2) ಹೊಸ ಚೆಂಡಿನಲ್ಲಿ ನಡೆಸಿದ ಬಿಗಿ ದಾಳಿಯ ನೆರವಿನಿಂದ ಭಾರತ ಎ ತಂಡ ಆತಿಥೇಯ ನ್ಯೂಜಿಲೆಂಡ್ ಎ ವಿರುದ್ಧದ 3ನೇ ಹಾಗೂ ಅಂತಿಮ ಚತುರ್ದಿನ ಪಂದ್ಯದಲ್ಲಿ ಮೇಲುಗೈ ಸಾಧಿಸಿದೆ.
ಬೆರ್ಟ್ ಓವಲ್ ಮೈದಾನದಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಭಾನುವಾರ 2 ವಿಕೆಟ್ಗೆ 227 ರನ್ಗಳಿಂದ 2ನೇ ದಿನದಾಟ ಆರಂಭಿಸಿದ ಭಾರತ ಎ ತಂಡ, ಚಹಾ ವಿರಾಮದ ಬಳಿಕ 146 ಓವರ್ಗಳಲ್ಲಿ 5 ವಿಕೆಟ್ಗೆ 464 ರನ್ ಗಳಿಸಿ ಡಿಕ್ಲೇರ್ ಮಾಡಿಕೊಂಡಿತು. ಪ್ರತಿಯಾಗಿ ನ್ಯೂಜಿಲೆಂಡ್ ಎ ಪ್ರಸಿದ್ಧಕೃಷ್ಣ ನೀಡಿದ ಆರಂಭಿಕ ಆಘಾತದಿಂದ ದಿನದಂತ್ಯಕ್ಕೆ 14 ಓವರ್ಗಳಲ್ಲಿ 2 ವಿಕೆಟ್ಗೆ 36 ರನ್ ಗಳಿಸಿ ಸಂಕಷ್ಟದಲ್ಲಿದೆ. ಧ್ರುವ ಜುರೆಲ್ ಪಡೆ ಸದ್ಯ 428 ರನ್ ಮುನ್ನಡೆಯಲ್ಲಿದೆ.
ಕ್ರಮವಾಗಿ 77 ಮತ್ತು 12 ರನ್ಗಳಿಂದ ದಿನದಾಟ ಆರಂಭಿಸಿದ ಸಾಯಿ ಸುದರ್ಶನ್ ಮತ್ತು ಧ್ರುವ ಜುರೆಲ್ ಬೇಗನೆ ಬೇರ್ಪಟ್ಟರು. ಸುದರ್ಶನ್ 88 ರನ್ಗೆ ಔಟಾಗಿ ಶತಕವಂಚಿತರಾದರು. ಬಳಿಕ ಜುರೆಲ್, ತಿಲಕ್ ವರ್ಮ ಬೆಂಬಲದೊಂದಿಗೆ ಅರ್ಧಶತಕ ಪೂರೈಸಿ ನಿರ್ಗಮಿಸಿದರು. ಬಳಿಕ ರವೀಂದ್ರ ಜಡೇಜಾ-ತಿಲಕ್ 5ನೇ ವಿಕೆಟ್ಗೆ 123 ಎಸೆತಗಳಲ್ಲಿ 44 ರನ್ ಸೇರಿಸಿದರು. ಜಡೇಜಾ ಔಟಾದ ಬಳಿಕ ತಿಲಕ್, ವಾಷಿಂಗ್ಟನ್ ಜತೆಗೂಡಿ ಮುರಿಯದ 6ನೇ ವಿಕೆಟ್ಗೆ 203 ರನ್ಗಳಲ್ಲಿ 114 ರನ್ ಜತೆಯಾಟವಾಡಿ ತಂಡದ ಮೊತ್ತವನ್ನು 450ರ ಗಡಿ ದಾಟಿಸಿದರು.
ಭಾರತ ಎ: 146 ಓವರ್ಗಳಲ್ಲಿ 5 ವಿಕೆಟ್ಗೆ 464 ಡಿಕ್ಲೇರ್ (ಸುದರ್ಶನ್ 88, ಜುರೆಲ್ 71, ತಿಲಕ್ 81*, ಜಡೇಜಾ 25, ವಾಷಿಂಗ್ಟನ್ 50*, ಗಿಬ್ಸನ್ 73ಕ್ಕೆ 2, ಮೆಕ್ಕೇ 45ಕ್ಕೆ 1), ನ್ಯೂಜಿಲೆಂಡ್ ಎ: 14 ಓವರ್ಗಳಲ್ಲಿ 2 ವಿಕೆಟ್ಗೆ 36 (ಹೀಫಿ 19, ಗಿಬ್ಸನ್ 1*, ಪ್ರಸಿದ್ಧಕೃಷ್ಣ 12ಕ್ಕೆ 2).