ಗುವಾಹಟಿ (ಅಸ್ಸಾಂ): ಇಲ್ಲಿನ ಬರ್ಸಾಪುರ ಸ್ಟೇಡಿಯಂನಲ್ಲಿ ನಿನ್ನೆ (ಸೆ.30) ನಡೆದ ಭಾರತ ಮತ್ತು ವೆಸ್ಟ್ ಇಂಡೀಸ್ ನಡುವಿನ ಎರಡನೇ ಏಕದಿನ ಪಂದ್ಯದಲ್ಲಿ ರನ್ಗಳ ಸುರಿಮಳೆಯೊಂದಿಗೆ ಟೀಮ್ ಇಂಡಿಯಾ ( Gautam Gambhir ) ಭರ್ಜರಿ ಜಯ ಸಾಧಿಸಿತು.
ಈ ಪಂದ್ಯದಲ್ಲಿ ನಾಯಕ ಶುಭಮಾನ್ ಗಿಲ್ ಅವರ ದಾಖಲೆಯ ದ್ವಿಶತಕದ ಬಲದಿಂದ ಭಾರತ ತಂಡವು 405 ರನ್ಗಳ ಬೃಹತ್ ಗುರಿಯನ್ನು ಸಲೀಸಾಗಿ ಬೆನ್ನಟ್ಟಿ ಐತಿಹಾಸಿಕ ಜಯ ದಾಖಲಿಸಿತು. ಆದರೆ, ಈ ರನ್ ಹೊಳೆಯ ಪಂದ್ಯದ ಬಳಿಕ ಮಾತನಾಡಿದ ಭಾರತ ತಂಡದ ಮುಖ್ಯ ಕೋಚ್ ಗೌತಮ್ ಗಂಭೀರ್, ಪಿಚ್ ಬಗ್ಗೆ ತೀವ್ರ ಅಸಮಾಧಾನ ವ್ಯಕ್ತಪಡಿಸಿ, ಅವರು ನೀಡಿರುವ ಸ್ಪೋಟಕ ಹೇಳಿಕೆಗಳು ಇದೀಗ ಕ್ರಿಕೆಟ್ ವಲಯದಲ್ಲಿ ದೊಡ್ಡ ಚರ್ಚೆಗೆ ಗ್ರಾಸವಾಗಿವೆ.
ಪಂದ್ಯದ ಬಳಿಕ ಬ್ರಾಡ್‌ಕಾಸ್ಟರ್‌ಗಳ ಜತೆ ಮಾತನಾಡಿದ ಕೋಚ್ ಗೌತಮ್ ಗಂಭೀರ್, ಇಂತಹ ಬ್ಯಾಟಿಂಗ್ ಪಿಚ್‌ಗಳ ವಿರುದ್ಧ ಬಹಿರಂಗವಾಗಿಯೇ ಅಸಮಾಧಾನ ಹೊರಹಾಕಿದರು. ನಾವು ಕ್ರಿಕೆಟ್ ಆಡುತ್ತಿದ್ದೇವೆ ಎಂದು ಕೊಳ್ಳುತ್ತೇವೆ, ಆದರೆ ಇದು ನಿಜವಾದ ಕ್ರಿಕೆಟ್ ಅಲ್ಲ, ಇದು ಕೇವಲ ಬ್ಯಾಟಿಂಗ್ ಎಂದು ನೇರವಾಗಿಯೇ ಅಭಿಪ್ರಾಯಪಟ್ಟರು. ಬ್ಯಾಟಿಂಗ್ ಮತ್ತು ಬೌಲರ್ಗಳ ನಡುವೆ ಯಾವುದೇ ಸಮಾನ ಸ್ಪರ್ಧೆ ಇಲ್ಲದಿರುವುದೇ ತಮ್ಮ ಅಸಮಾಧಾನಕ್ಕೆ ಮುಖ್ಯ ಕಾರಣ ಎಂದು ಸ್ಪಷ್ಟಪಡಿಸಿದರು.
ಪ್ರೇಕ್ಷಕರಿಗೆ ಮತ್ತು ಪ್ರಸಾರಕರಿಗೆ (ಬ್ರಾಡ್‌ಕಾಸ್ಟರ್‌ಗಳಿಗೆ) ರನ್ ಮಳೆ ಹಾಗೂ ದಾಖಲೆಗಳು ನೋಡಲು ಅತ್ಯಂತ ರೋಮಾಂಚನಕಾರಿಯಾಗಿ ಕಾಣಬಹುದು. ಆದರೆ, ಒಬ್ಬ ನಿಜವಾದ ಕ್ರಿಕೆಟ್ ಅಭಿಮಾನಿಯಾಗಿ ಮತ್ತು ತಂಡದ ಕೋಚ್ ಆಗಿ ತಾನು ಬೌಲರ್ಗಳ ಕಷ್ಟವನ್ನೂ ಅರ್ಥಮಾಡಿಕೊಳ್ಳಬೇಕಾಗುತ್ತದೆ ಎಂದು ಗಂಭೀರ್ ತಿಳಿಸಿದರು. ಇಂತಹ ಪಿಚ್‌ಗಳಲ್ಲಿ ಯುವ ಬೌಲರ್‌ಗಳು ಬೌಲ್ ಮಾಡಿದಾಗ ಅವರ ಸ್ಥಿತಿ ಏನಾಗಬಹುದು ಎಂದು ಆತಂಕ ವ್ಯಕ್ತಪಡಿಸಿದರು.
ಇನ್ನೂ ಪಂದ್ಯ ವಿಚಾರಕ್ಕೆ ಬರುವುದಾದರೆ, ಮೊದಲು ಬ್ಯಾಟ್ ಮಾಡಿದ ವೆಸ್ಟ್ ಇಂಡೀಸ್ ತಂಡವು ನಿಗದಿತ 50 ಓವರ್‌ಗಳಲ್ಲಿ 7 ವಿಕೆಟ್ ಕಳೆದುಕೊಂಡು ಬೃಹತ್ ಆದ 405 ರನ್ ಕಲೆಹಾಕಿತು. ವಿಂಡೀಸ್ ಪರ ಜಾನ್ ಕ್ಯಾಂಪ್ಬೆಲ್, ಶಾಯ್ ಹೋಪ್ ಮತ್ತು ಅಮೀರ್ ಜಂಗು ಅದ್ಭುತ ಶತಕಗಳನ್ನು ಸಿಡಿಸಿ ಬೌಲರ್‌ಗಳನ್ನು ದಂಡಿಸಿದರು. ಭಾರತದ ಪರ ಬೌಲರ್‌ಗಳು ರನ್ ನಿಯಂತ್ರಿಸಲು ಪರದಾಡಬೇಕಾಯಿತು.
ವಿಂಡೀಸ್ ನೀಡಿದ 406 ರನ್ಗಳ ದೈತ್ಯ ಗುರಿಯನ್ನು ಬೆನ್ನಟ್ಟಿದ ಭಾರತಕ್ಕೆ ಆರಂಭಿಕರೇ ಭರ್ಜರಿ ಆಧಾರವಾದರು. ರೋಹಿತ್ ಶರ್ಮಾ 101 ರನ್ ಗಳಿಸಿ ಔಟಾದರೆ, ಅಜೇಯರಾಗಿ ಉಳಿದ ನಾಯಕ ಶುಭಮಾನ್ ಗಿಲ್ ಕೇವಲ 133 ಎಸೆತಗಳಲ್ಲಿ 223 ರನ್ಗಳ ರಾಕ್ಷಸ ಇನ್ನಿಂಗ್ಸ್ ಕಟ್ಟಿ ವಿಶ್ವದಾಖಲೆ ಬರೆದರು. ಇದರೊಂದಿಗೆ ಭಾರತ ತಂಡವು 43.3 ಓವರ್‌ಗಳಲ್ಲಿ ಕೇವಲ 2 ವಿಕೆಟ್ ಕಳೆದುಕೊಂಡು 406 ರನ್ ಬಾರಿಸಿ ಸರಣಿಯನ್ನು 2-0 ಅಂತರದಿಂದ ವಶಪಡಿಸಿಕೊಂಡಿತು.
ಕೇವಲ ಬೌಲಿಂಗ್ ಸ್ಟಾಟ್ಸ್ ನೋಡಿ ಯುವ ಬೌಲರ್‌ಗಳನ್ನು ಕಠಿಣವಾಗಿ ನಿರ್ಣಯಿಸಬಾರದು ಎಂದು ಗಂಭೀರ್ ಎಚ್ಚರಿಸಿದರು. ಆಧುನಿಕ ಕ್ರಿಕೆಟ್‌ನಲ್ಲಿ ಎರಡು ಹೊಸ ಚೆಂಡುಗಳು, ಫೀಲ್ಡಿಂಗ್ ನಿರ್ಬಂಧಗಳು ಮತ್ತು ಫ್ಲ್ಯಾಟ್ ಪಿಚ್‌ಗಳಿಂದಾಗಿ ಬೌಲಿಂಗ್ ಕಡುಕಷ್ಟವಾಗಿದೆ ಎಂದ ಗಂಭೀರ್, 2027ರ ಏಕದಿನ ವಿಶ್ವಕಪ್ ದೃಷ್ಟಿಯಿಂದ ಯುವ ಬೌಲರ್‌ಗಳಿಗೆ ಇಂತಹ ಒತ್ತಡದ ಪರಿಸ್ಥಿತಿಗಳಲ್ಲಿ ಬೆಂಬಲ ನೀಡುವುದು ಅತ್ಯಗತ್ಯ ಎಂದು ಪ್ರತಿಪಾದಿಸಿದರು, (ಏಜೆನ್ಸೀಸ್).