ಸೋತ ಕೂಡಲೇ ಹೀಗಾ ಹೇಳೋದು! ತಮ್ಮದೇ ತಂಡದ ಮೂವರು ಆಟಗಾರರಿಗೆ ಶಾಹಿದ್​ ಆಫ್ರಿದಿ ಛೀಮಾರಿ | IND vs PAK

IND vs PAK: ನಿನ್ನೆ (ಫೆ.15) ಕೊಲೊಂಬೊದಲ್ಲಿ ನಡೆದ ಭಾರತ ಮತ್ತು ಪಾಕಿಸ್ತಾನ ನಡುವಿನ ಹೈವೋಲ್ಟೇಜ್ ಪಂದ್ಯದಲ್ಲಿ ಸೂರ್ಯಕುಮಾರ್ ಯಾದವ್ ಪಡೆ 61 ರನ್​ಗಳ ಭರ್ಜರಿ ಜಯ ದಾಖಲಿಸಿತು. ಈ ಮೂಲಕ ಟಿ20 ವಿಶ್ವಕಪ್​ನಲ್ಲಿ ಮತ್ತೆ ಪಾಕ್​ ತಂಡಕ್ಕೆ ಹೀನಾಯ ಸೋಲುಣಿಸಿದ ಭಾರತಕ್ಕೆ ಇದು 8ನೇ ಗೆಲುವು. ಸೂರ್ಯಕುಮಾರ್ ಯಾದವ್ ಪಡೆ ವಿರುದ್ಧ ಸೋತ ಬೆನ್ನಲ್ಲೇ ಪಾಕ್​ನಲ್ಲಿ ಅಭಿಮಾನಿಗಳ ಆಕ್ರೋಶ ಸ್ಫೋಟಗೊಂಡಿದೆ.

ಟೀಮ್ ಇಂಡಿಯಾ ಎದುರು 61 ರನ್​ಗಳಿಂದ ಸೋತ ಕಾರಣ, ಪಾಕಿಸ್ತಾನಿ ಅಭಿಮಾನಿಗಳು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. ಕೆಲವರು ಟಿವಿಗಳನ್ನು ಹೊಡೆದು ಹಾಕಿದರೆ, ಇನ್ನೂ ಕೆಲವರು ತಂಡದ ಆಟಗಾರರಿಗೆ ಹಿಡಿಶಾಪ ಹಾಕುವ ಮೂಲಕ ಅಸಮಾಧಾನ ಹೊರಹಾಕುತ್ತಿದ್ದಾರೆ. ಪಾಕ್​ ಅಭಿಮಾನಿಗಳ ಮಧ್ಯೆ ಮಾಜಿ ಕ್ಯಾಪ್ಟನ್​ ಶಾಹಿದ್​ ಆಫ್ರಿದಿ ತಮ್ಮದೇ ಆಟಗಾರರಿಗೆ ಛೀಮಾರಿ ಹಾಕಿದ್ದಾರೆ.

ಈ ವಿಷಯದಲ್ಲಿ ಒಂದು ಹೆಜ್ಜೆ ಮುಂದೆ ಹೋಗಿ ತಮ್ಮ ಸ್ವಂತ ಅಳಿಯ ಮತ್ತು ಇತರ ಇಬ್ಬರು ಆಟಗಾರರನ್ನು ತಂಡದಿಂದ ತಕ್ಷಣವೇ ಕಿತ್ತು ಬಿಸಾಡಬೇಕೆಂದು ಒತ್ತಾಯಿಸಿದ್ದಾರೆ. ನಮ್ಮ ತಂಡ ಏನಾದರೂ ಸೂಪರ್ 8 ತಲುಪಲು ಬಯಸಿದ್ದೇ ಆದರೆ, ನಮೀಬಿಯಾ ವಿರುದ್ಧದ ಪಂದ್ಯದಿಂದ ಈ ಮೂವರನ್ನು ತೆಗೆದುಹಾಕಬೇಕು ಮತ್ತು ಹೊಸಬರಿಗೆ ಅವಕಾಶ ನೀಡಬೇಕು ಎಂದು ಹೇಳಿದ್ದಾರೆ.

"ಕೆಲವು ಸಮಯದಿಂದ ಈಗಿರುವ ಪಾಕಿಸ್ತಾನ ತಂಡವು, ಉತ್ತಮ ಟೀಮ್​ಗಳ ವಿರುದ್ಧ ಪ್ರದರ್ಶನ ನೀಡಲು ಸತತವಾಗಿ ವಿಫಲವಾಗುತ್ತಿರುವುದನ್ನು ನೋಡುತ್ತಿದ್ದೇವೆ. ಹೀಗಾಗಿ, ಇಲ್ಲಿ ಯುವ ಆಟಗಾರರಿಗೆ ಅವಕಾಶ ನೀಡುವ ಸಮಯ ಸನ್ನಿಹಿತವಾಗಿದೆ. ನಾನೇನಾದರೂ ಆಯ್ಕೆಗಾರನಾಗಿದ್ದರೆ, ಬಾಬರ್ ಅಜಮ್, ಶಾಹೀನ್ ಅಫ್ರಿದಿ ಮತ್ತು ಶಾದಾಬ್ ಅವರನ್ನು ಮೊದಲು ತಂಡದಿಂದ ಕೈಬಿಡುತ್ತಿದ್ದೆ ಎಂದು ಅಫ್ರಿದಿ ಗುಡುಗಿದ್ದಾರೆ.

ಟಾಸ್​ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಭಾರತ, 20 ಓವರ್ ಅಂತ್ಯಕ್ಕೆ 7 ವಿಕೆಟ್​ ನಷ್ಟಕ್ಕೆ 175 ರನ್​ ಕಲೆಹಾಕಿತು. 176 ರನ್​ಗಳ ಗುರಿಯನ್ನು ಬೆನ್ನತ್ತಿದ ಪಾಕಿಸ್ತಾನಕ್ಕೆ ಆರಂಭಿಕ ಹಂತದಲ್ಲೇ ಶಾಕ್​ ಎದುರಾಯಿತು. ಶೂನ್ಯಕ್ಕೆ ವಿಕೆಟ್​ ಕಳೆದುಕೊಂಡ ಪಾಕ್​, ಆ ಬಳಿಕ ಸರಣಿ ವಿಕೆಟ್​ಗಳನ್ನು ಕಳೆದುಕೊಳ್ಳುವ ಮೂಲಕ ಪೈಪೋಟಿ ನೀಡುವಲ್ಲಿ ಮುಗ್ಗರಿಸಿತು. 61 ರನ್​ಗಳಿಂದ ಟೀಮ್ ಇಂಡಿಯಾ ರೋಚಕ ಜಯ ಸಾಧಿಸಿದ್ದು ಅದ್ಭುತ. ಈ ಪಂದ್ಯದಲ್ಲಿ 40 ಎಸೆತಗಳಲ್ಲಿ 77 ರನ್ ಸಿಡಿಸಿದ ಇಶಾನ್ ಕಿಶನ್​, ತಂಡದ ಪರ ಸ್ಫೋಟಕ ಇನ್ನಿಂಗ್ಸ್ ನೀಡಿದರು,(ಏಜೆನ್ಸೀಸ್).