ಬಾಬರ್​ ಏನಾದರೂ ನಿಮ್ಮ ಐಪಿಎಲ್​ನಲ್ಲಿ ಇದ್ದಿದ್ರೆ... ಮತ್ತೊಮ್ಮೆ ನಾಲಿಗೆ ಹರಿಬಿಟ್ಟ ತನ್ವೀರ್​​ ಅಹ್ಮದ್​

IPL 2026: ಇದೇ ಮಾ.28ರಿಂದ ಐಪಿಎಲ್​ 19ನೇ ಆವೃತ್ತಿಗೆ ಅದ್ಧೂರಿ ಚಾಲನೆ ಸಿಗಲಿದ್ದು, ಮೊದಲ ಪಂದ್ಯವೇ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮತ್ತು ಸನ್​ರೈಸರ್ಸ್​ ಹೈದರಾಬಾದ್ ನಡುವೆ ನಡೆಯಲಿದೆ. ಈ ಕ್ಷಣಕ್ಕಾಗಿ ತೀರ ಕುತೂಹಲದಿಂದ ಕಾಯುತ್ತಿರುವ ಭಾರತೀಯ ಹಾಗೂ ಇತರೆ ದೇಶಗಳ ಕ್ರಿಕೆಟ್​ ಅಭಿಮಾನಿಗಳು, ತಮ್ಮ ನೆಚ್ಚಿನ ಫ್ರಾಂಚೈಸಿಗೆ ಬೆಂಬಲ ನೀಡಲು ಉತ್ಸುಕರಾಗಿದ್ದಾರೆ. ಆದರೆ, ಸದಾ ಭಾರತೀಯ ಕ್ರಿಕೆಟ್​ ವಿರುದ್ಧ ಏನಾದರೂ ಒಂದು ಹೇಳಿಕೆ ನೀಡದಿದ್ದರೆ ಪಾಕ್​ ಆಟಗಾರರಿಗೆ ತಿಂದ ಅನ್ನ ಅರಗುವುದಿಲ್ಲ ಅನಿಸುತ್ತೆ.

​

ಟೀಮ್ ಇಂಡಿಯಾ ಟಿ20 ವಿಶ್ವಕಪ್ ಟೂರ್ನಿಯಲ್ಲಿ ಭಾಗಿಯಾದ ಮೊದಲ ದಿನದಿಂದಲೂ ಟೀಕಿಸುತ್ತಲೇ ಬಂದ ಪಾಕ್ ಮಾಜಿ ಕ್ರಿಕೆಟಿಗ ತನ್ವೀರ್ ಅಹ್ಮದ್​, ಈಗ ಐಪಿಎಲ್​ ಉಲ್ಲೇಖಿಸಿ ವಿವಾದಾತ್ಮಕ ಹೇಳಿಕೆ ನೀಡಿದ್ದಾರೆ. ಬಿಸಿಸಿಐ ನಡೆಸುವ ಐಪಿಎಲ್​ ಒಂದು ನಕಲಿ ಲೀಗ್ ಎಂದಿರುವ ಅಹ್ಮದ್​, ಅದೇ ಸಮಯದಲ್ಲಿ, ಪಾಕ್​ ಆರಂಭಿಕ ಬ್ಯಾಟರ್​ ಬಾಬರ್ ಅಜಮ್ ಐಪಿಎಲ್​ನಲ್ಲಿ ಇದ್ದಿದ್ದರೆ, ಅವರು ಹರಾಜಿನಲ್ಲಿ ಸುಮಾರು 50 ಕೋಟಿ ರೂ.ಗೆ ಬಿಡ್ ಆಗುತ್ತಿದ್ದರು ಎಂದಿದ್ದಾರೆ.

ಬಾಬರ್​ನಂತಹ ಆಟಗಾರರು ಭಾರತದಲ್ಲಿ ಇಲ್ಲ. ಈ ಸಂದರ್ಭದಲ್ಲಿ, ಅವರೇನಾದರೂ ಐಪಿಎಲ್‌ ಟೂರ್ನಿಯಲ್ಲಿ ಭಾಗವಹಿಸಿದಿದ್ದರೆ, ಖಂಡಿತ ಬೇರೆಯವರಿಗಿಂತ ಹೆಚ್ಚು ಸಂಖ್ಯೆಗೆ ಬಿಡ್ ಆಗುತ್ತಿದ್ದರು ಎಂದರು. ತನ್ವೀರ್​ ಅಹ್ಮದ್​ನ ಇಂತಹ ಹುಚ್ಚು ಹೇಳಿಕೆಗಳಿಗೆ ಸದ್ಯ ನೆಟ್ಟಿಗರು ಛೀಮಾರಿ ಹಾಕಿದ್ದು, ಮೊದಲು ಫಾರ್ಮ್​ ಕಳೆದುಕೊಂಡಿರುವ ಆಟಗಾರ ಉತ್ತಮ ಪ್ರದರ್ಶನ ನೀಡುವಂತಾಗಲಿ, ತಮ್ಮದೇ ತಂಡದಲ್ಲಿ ಸ್ಥಾನ ಉಳಿಸಿಕೊಳ್ಳಲಿ ಎಂದು ಮುಖಕ್ಕೆ ಹೊಡೆದಂತೆ ಹೇಳಿದ್ದಾರೆ.

ಪಾಕಿಸ್ತಾನ ಕ್ರಿಕೆಟ್‌ನಲ್ಲಿ ಸದ್ಯ ಬಾಬರ್ ಅಜಮ್ ಪರಿಸ್ಥಿತಿ ಅತ್ಯಂತ ಕೆಟ್ಟದಾಗಿದೆ. ಸರಣಿ ವೈಫಲ್ಯಗಳಿಂದ ನಾಯಕತ್ವ ಕಳೆದುಕೊಂಡ ಬೆನ್ನಲ್ಲೇ, ಬ್ಯಾಕ್​ ಟು ಬ್ಯಾಕ್​ ಪ್ರದರ್ಶನದಲ್ಲಿ ಫ್ಲಾಪ್​ ಆಗುತ್ತಿರುವ ಬಾಬರ್, ತಮ್ಮ ತಂಡದಲ್ಲಿ ಸ್ಥಾನ ಪಡೆಯಲು ಹೆಣಗಾಡುತ್ತಿದ್ದಾರೆ. ಇದೆಲ್ಲ ಗೊತ್ತಿದ್ದರೂ, ಇಂತಹ ಹೇಳಿಕೆ ನೀಡಿದ ತನ್ವೀರ್ ಅಹ್ಮದ್ ವಿರುದ್ಧ ಹಲವರು ಕಿಡಿಕಾರಿದ್ದಾರೆ,(ಏಜೆನ್ಸೀಸ್).