ಮಹಿಳಾ ಕ್ರಿಕೆಟಿಗರು ತಾಯ್ತನದ ಬಿಡುವಿನ ಬಳಿಕ ಕ್ರಿಕೆಟ್​ಗೆ ಮರಳಲು ಐಸಿಸಿ ನೆರವು!

"ಗರ್ಭಧಾರಣೆಯ ನಂತರ ಆಟಕ್ಕೆ ಮರಳಲು ಮಾರ್ಗಸೂಚಿ' (Return to Play Post-Pregnancy) ಹೆಸರಿನಲ್ಲಿ ಐಸಿಸಿ ಮಹಿಳಾ ಕ್ರಿಕೆಟಿಗರಿಗೆ ಸಿದ್ಧ, ವಿಮರ್ಶೆ, ಮರುಸ್ಥಾಪನೆ, ಮರುಪರಿಶೀಲನೆ, ವಾಪಸ್​ ಮತ್ತು ಪರಿಷರಣೆ (ರೆಡಿ, ರಿವೀವ್​, ರಿಸ್ಟೋರ್​, ರಿಕಂಡೀಷನ್​, ರಿರ್ಟನ್​, ರಿಫೈನ್​) ಸಹಿತ "ಆರು ಆರ್​' ಒಳಗೊಂಡ ರೂಪುರೇಷೆ ರೂಪಿಸಿದೆ. ಇದು ಮಹಿಳಾ ಕ್ರಿಕೆಟಿಗರು ಮಗುವಿಗೆ ಜನ್ಮ ನೀಡಿದ ಬಳಿಕ ಆರಂಭಿಕ ಚೇತರಿಕೆ, ವೈದ್ಯಕಿಯ ಮತ್ತು ಯೋಗಕ್ಷೇಮ ವಿಮರ್ಶೆ, ರಚನಾತ್ಮಕ ತರಬೇತಿಗೆ ಕ್ರಮೇಣ ಮರಳುವಿಕೆ, ಕ್ರಿಕೆಟ್​ ನಿರ್ದಿಷ್ಟ ಕಂಡೀಷನಿಂಗ್​, ಆಟಕ್ಕೆ ಮರಳುವಿಕೆ ಮತ್ತು ಆಟಗಾರ್ತಿ ಕ್ರಿಕೆಟ್​ ಪರಿಸರಕ್ಕೆ ಮರಳಿದಾಗ ನಿರಂತರ ಮೇಲ್ವಿಚಾರಣೆಯ ವಿಧಾನವನ್ನು ಒಳಗೊಂಡಿದೆ ಎಂದು ಐಸಿಸಿ ತಿಳಿಸಿದೆ.

ತಾಯ್ತನದ ಬಳಿಕ ಮಹಿಳಾ ಕ್ರಿಕೆಟಿಗರು ಸ್ಪರ್ಧಾತ್ಮಕ ಕ್ರಿಕೆಟ್​ಗೆ ಮರಳುವ ಹಾದಿಯ ಮೇಲ್ವಿಚಾರಣೆ ನೋಡಿಕೊಳ್ಳಲು ಐಸಿಸಿ "ಕೇಸ್​ ಮ್ಯಾನೇಜರ್​'ಅನ್ನೂ ನೇಮಿಸಲಿದೆ. ಇವರು ವೈದ್ಯರು ಅಥವಾ ಫಿಸಿಯೋ ಥೆರಪಿಸ್ಟ್​ ಆಗಿರಲಿದ್ದಾರೆ.

ಈ ಮಾರ್ಗಸೂಚಿಗಳು ಮಹಿಳೆಯರು ಮೈದಾನದ ಒಳಗೆ ಮತ್ತು ಹೊರಗೆ ಬೆಳವಣಿಗೆ ಕಾಣಬಹುದಾದಂಥ ಆಟದ ವಾತಾವರಣವನ್ನು ನಿರ್ಮಿಸುವ ನಮ್ಮ ಬದ್ಧತೆಯ ಪ್ರತಿಬಿಂಬವಾಗಿವೆ ಎಂದು ಐಸಿಸಿ ಚೇರ್ಮನ್​ ಜಯ್​ ಷಾ ತಿಳಿಸಿದ್ದಾರೆ.

ಸ್ಥಳಿಯ ಕಾನೂನಿಗೆ ಅನುಗುಣವಾಗಿಯೇ ಐಸಿಸಿ ಈ ಮಾರ್ಗಸೂಚಿಗಳನ್ನು ಸಿದ್ಧಪಡಿಸಿದೆ. ಭಾರತದ ಕಾರ್ಮಿಕ ಕಾನೂನಿನ ಅನ್ವಯ, ಮಹಿಳೆಯರು ಆರು ತಿಂಗಳ ವೇತನ ಸಹಿತ ಮಾತೃತ್ವ ರಜೆಯನ್ನು ಪಡೆಯಬಹುದಾಗಿದೆ. ಇದು ಇನ್ನು ಮಹಿಳಾ ಕ್ರಿಕೆಟಿಗರಿಗೂ ಅನ್ವಯಿಸಲಿದೆ.

2022ರ ಮಹಿಳಾ ಏಕದಿನ ವಿಶ್ವಕಪ್​ನಲ್ಲಿ 8 ತಾಯಂದಿರು ಆಡಿದ್ದರು. ವೆಸ್ಟ್​ ಇಂಡೀಸ್​ನ ಆಫಿ ಫ್ಲೆಚರ್​ ಹಾಲಿ ಮಹಿಳಾ ಟಿ20 ವಿಶ್ವಕಪ್​ನಲ್ಲಿ ಆಡುತ್ತಿರುವ ಏಕೈಕ ಅಮ್ಮನಾಗಿದ್ದಾರೆ.

ಇದುವರೆಗಿನ ಪರಿಸ್ಥಿತಿಯಲ್ಲಿ ತಾಯಿಯಾದರೆ ಕ್ರಿಕೆಟ್​ ಜೀವನ ಮುಗಿಯಿತು ಎಂದೇ ಯೋಚಿಸಲಾಗುತಿತ್ತು. ಆದರೆ ಇನ್ನು ಹಾಗೆ ಆಗಲ್ಲ. ಅದಕ್ಕಾಗಿಯೇ ಈ ಮಾರ್ಗಸೂಚಿ ಸಿದ್ಧಪಡಿಸಲಾಗಿದೆ ಎಂದು ಐಸಿಸಿಯ ವೈದ್ಯಕಿಯ ಸಲಹಾ ಸಮಿತಿಯ ಸದಸ್ಯೆ ಡಾ. ಫಿಲಿಪ್ಪಾ ಇಂಗೆ ತಿಳಿಸಿದ್ದಾರೆ.